VOV4.Sêdang - Khu xiâm ngăn pơkeăng ƀă khăm pơlât tối ăm ‘nâi sap ing kố troh mơ’nui hơnăm 2021, kơxô̆ vaccine hbrâ mơdât COVID-19 kô vêh hên, xua mê mâu kong pơlê kal hbrâ rơnáu mơngế, tơmeăm khoăng ƀă mâu tơdroăng ki kal vâ rĕng pâk vaccine vâ rĕng châ lâp lu mơngế pâk vaccine. Ing mê pro tơ’lêi hlâu kal khât vâ rế kâi trâng ƀă pơreăng, rế mơnhông mơdêk cheăng kâ – rêh ối pơlê pơla.

Tiô tơbleăng dêi Kơ koan xiâm khăm pơlât ƀă hbrâ mơdât pơreăng ƀă Hngêi pơkeăng xôh kơdê pơreăng troh tâi hâi lơ 10/10, Việt Nam hiăng tơdah lối 87 rơtuh kong kếo vaccine hbrâ, mơdât pơreăng COVID-19 ƀă hiăng pêi pro 57 roh xing xoăng ƀă tâi tâng 81,7 rơtuh kong kếo vaccine ăm mâu kong pơlê.

Tiô tối hdrối tung la ngiâ kơxô̆ vaccine kô châ rôe hên. Vâ tơniăn xúa vaccine rĕng má môi, châ tơƀrê, Khu xiâm pơkuâ ngăn pơkeăng ƀă khăm pơlât pơkâ thế mâu kong pơlê, pơlê kong kơdrâm ngăn tơdroăng pâk vaccine hbrâ mơdât COVID-19 cho hnoăng cheăng ki xiâm, kơjo má môi tung hneăng nôkố.

A Sa Ly tơplôu ƀă tơbleăng