Tung khế 7 pơla hdrối kố nah, a mâu kơxo hâi môi, hâi péa, hâi pái, hâi pơtăm rêm măng tĭng, vâ chê 30 chât ngế o tung pơla hriâm râ má môi ƀă râ má péa tơkŭm a hngêi trá xŏn dêi pâ Jiwon, a ƀuôn Akŏ Dhông, pơlê kong kơdrâm Ƀuôn Ma Thuột, kong pơlê Dak Lak. Akố, ai 2 lâm hnê nâl Ănglê ôh ta xo liăn xua mâu sinh viên ki pleăng dêi hnoăng dêi kong pơlê po tung pơla pơtê hriâm. Hriâm tung lâm mâu vâi o châ rơbot mâu ‘noăng chư, chêh, pơchuât, tơpui nâl Ănglê ing mâu tơdroăng ki xah, ƀai hơdruê. O Đỗ Thanh Nhã Ƀyă (10 hơnăm), a ƀuôn Akŏ Dhông hâk xuâ:

“Á châ hriâm a lâm hnê nâl Ănglê tê kơtê xua mâu ngoh nâ sinh viên hnê. A hlo ai pơxúa khât ăm á. Ƀă tung rơnó pơtê hriâm kố á ối hriâm ƀối hên nâl tơpui ki ê nếo, malối á rơhêng vâ chiâng tơpui mâu nâl tơpui ki ê hía ƀă á kô hriâm túa ki tơpui ƀă rêm ngế tâ tá, lơ cho ngế kong têa ê”.

Ƀă o H’Da Rin Êñuôl (15 hơnăm) a ƀuôn Alê B, bêng Ea Tam, pơlê kong kơdrâm Ƀuôn Ma Thuột, mâu hâi pơtê hriâm rế pro tơ’nôm hâk vâ drêng á châ ‘nâi túa lĕm tro hdroâng Rơđế ing lâm hnê xuăng xua Tíu xiâm Hnê tối tơdroăng kal, Túa lĕm tro ƀă Tơ’noăng ivá pơlê kong kơdrâm Ƀuôn Ma Thuột tơkŭm po. H’Da Rin ăm ‘nâi: tung 1 khế hdrối, o ƀă mâu vâi pú hiăng tăng ‘nâi ‘na khôi hmâ, vêa vong dêi mơngế Rơđế, mâu tơdroăng po mơdĭng, mâu ƀai kơhnhon xuăng. Ing mê, gum vâi o hlê hên tâ ƀă hâk vâ tâ ‘na khôi túa lĕm tro hdroâng kuăn ngo.

“Á hiăng châ hriâm ƀối hên tơdroăng tâ ‘na túa lĕm tro dêi hdroâng kuăn ngo tơná. Á ‘nâi tơ’nôm hên túa ki kơhnhon xuăng chiâng vâ tơrŭm mâu ƀai hriâm ing mâu thái cô, ngế ki hnê chiâng ai hên ƀai xuăng xuân chiâng vâ hnê ăm mâu vâi o a mâu lâm hriâm kơ’nâi. Ing mê, tung mâu roh po mơdĭng lơ ai mâu rôh ki lâi ‘lo tung mâu bêng tơkŭm po mê ngin kô hâk tơngăm mơđah xuăng a ngiâ rêm ngế”.

Môi tơdroăng ki ê xuân tơ’mot hên tơdroăng ki veăng dêi mâu vâi o phô̆m vâ xông kân hdroâng kuăn ngo a Dak Lak tung rôh pơtê hriâm. Mê cho “Tíu ki hnê chêh ƀai văn hok ngê̆ thuât” xua Hô̆i Văn hok Ngê̆ thuât Dak Lak tơkŭm po. Hơnăm kố, tơdroăng cheăng kố ai vâ chê 40 ngế hok tro veăng . Kố cho mâu ngế hok tro châ rah xo ing mâu rôh tơ’noăng hok tro rơkê, tơ’noăng chêh kơthô pơtroh a kong têa (UPU), mâu hok tro rơkê a 24 to hngêi trung râ má péa ƀă râ má pái tung kong pơlê.

Rơtế ƀă tơdroăng ki châ mâu ngế ki chêh văn, chêh thơ, ngế hnê kơchuâ um, mâu vâi o ối châ lăm ngăn ƀă trâm mâ tơpui tơno ƀă mâu ngế lêng mố đô̆i gâk tơkăng kong; tăng ‘nâi mâu kong kế, tăng ‘nâi rui kong a Kơdrum kong ilâng Yok Đôn; trâm mâu vâi o phô̆m vâ xông kân a kơpong tơkăng kong; châ mơnúa ngăn ki ai khât a Ƀơrô kăn sat hbrâ mơdât on chếo trếo pơtôu ƀă Tŏng xo mâu ngế hliăng tiâ, Kŏng an kong pơlê Dak Lak ƀă hên ki ê.

Ing mê, gum mâu vâi o ai ƀriê tung hiâm mơno, hriâm xo mâu hlá mơ-éa ki kal ăm tơdroăng ki chêh thơ ƀă kơchuâ um. O Bế Thị Thu Uyên (13 hơnăm, hdroâng kuăn Tày) a cheăm Ea HĐing, tơring Čư̆ Mgar tối, mâu hâi ki veăng hriâm hiăng bro ăm o châ mơnúa ngăn mâu tơdroăng ki nếo, ing mê, o chiâng ngăn nhuô̆m ƀă ‘nâi mơnê khât mâu tơdroăng klâi ki o dế châ hriâm.

“Ngin o hiăng châ pêi mơnúa ngăn hên tơdroăng, môi tiah cho tăng ‘nâi Tíu ‘măn rak tơmeăm khoăng lâp plâi tơnêi kơphế, Tíu ‘măn rak tơmeăm khoăng H’Mai, troh tíu tơkăng kong Việt Nam – Kul, Đông mố đô̆i gâk tơkăng kong Bô Heng ƀă hên mâu tíu ki ê nếo. Tung mê, á hâk vâ khât cho lăm troh a Đông mố đô̆i gâk tơkăng kong Bô Heng ƀă châ kuâ a tơneăn tâp hdró tơkăng kong Việt nam – Kul. Kố cho rôh apoăng á châ lăm prôk troh a tơkăng kong, châ kuâ a tơneăn tâp hdró tơkăng kong mê pro pơxúa ăm môi tơdroăng ki ƀriê tơviah khât ăm á”.

Jâ Niê Thanh Mai, Kăn hnê ngăn Hội Văn học Nghệ thuật Dak Lak mơnhên tối, maluâ hâi ki châ lăm prôk mơnúa ngăn ôh tá ton la mâu vâi o hiăng châ ‘nâi plĕng, hâk vâ ƀă mâu tơdroăng ki châ mơnúa ngăn, pêi pro. Ing rêm hơnăm, tơdroăng kố đi đo ai tơdroăng ki hơ’lêh, ôh tá bô bối dêi pó, vâ mâu tơdroăng ki lăm mơnúa ngăn mê đi đo tâ ro, hơniâp ƀă mâu vâi o ki hiăng châ lăm hlo, lăm ngăn.

“Ngin hlo tiah kố mâu vâi o vâi hâk vâ khât drêng hmâng vâi xăng, vâi tăm tối ‘na khôi hmâ túa lĕm tro mâu hdroâng kuăn ngo ton nah, mâu vâi o pơrá nguăn loi tơmâng ƀă chêh ‘mot tung mơ-éa vâi hâk vâ khât. Pơxiâm ing mâu tơdroăng ki kŭn má môi, môi tiah mâu rôh ki hiăng châ lăm, mâu rôh châ trâm mâu vâi tăm mố đô̆i, mâu vâi tăm kăn sat hbrâ mơdât on chếo trếo pơtôu, mâu ngế ki plâ rơxông pleăng dêi hnoăng tơná vâ veăng kum ăm pơlê”.

Pôa Mai Văn Chuyền, a cheăm Ea MDroh, tơring Čư̆ Mgar, ai kuăn veăng hriâm tối tiah kố, mâu tơdroăng cheăng hnê hriâm hiăng pro pơxúa tơƀrê khât. Xo ah hmôi mâu tơdroăng cheăng, pôa hlo kuăn pôa hiăng pơhlêh hên khât, chiâng khên tơnôu, loi tơngah a dêi tơná ƀă hbrâ rơnáu tơpui tơno ƀă rêm ngế ki ối tâ tá muăn hên tâ”.

“Tung pơla muăn veăng hriâm ƀă drêng vêh a hngêi mê á hlo muăn loi nguăn tâ, tơdroăng ki tơpui, ối ai hên ki pơhlêh tâ. Séa ngăn tơdroăng ki pêi pro ƀă tơpui tơno ƀă khu tơkŭm po tung pơla veăng hriâm a khu Zalo mê á hlo tiah kố khu tơkŭm po ƀă mâu thái cô hnê nhên khât, mê ai tơdjâk tơƀrê troh mâu vâi muăn. Mê xuân cho môi tơdroăng ki châ mơnúa ngăn ai pơxúa khât ăm muăn tung rôh pơtê hriâm”.

Rơnó pơtê hriâm dế hiăng vâ tâi, la ƀă mâu vâi o phô̆m vâ xông kân hdroâng kuăn ngo a Dak Lak, mâu tơdroăng ki châ mơnúa ngăn túa lĕm tro hiăng po ăm rôh vâ khu tí tăng ‘nâi hên tâ ‘na mâu tơdroăng ki lĕm, ki ro dêi mâu hdroâng kuăn ngo. Ing mê, tơbêng tơ’nôm a mâu vâi o tơdroăng ki pâ nhuô̆m ƀă túa lĕm tro, păn roăng hiâm mơno, vâ hneăng pơtê hriâm kố ai tơ’nôm hên tơdroăng ki tro, pơxúa.