Pơtối mê 6 ngế hok tro ai ƀai tơ’noăng châ điêm hên má môi hiăng châ pơ-ô pơ-eăng. Ngế tơ’noăng Tạ Tuấn Anh troh ing Pơlê kong kân Hồ Chí Minh hiăng châ kâ pri má môi, pri má péa cho Nguyễn Hương troh ing Dak Nông, pri má pái châ diâp ăm ngế tơ’noăng Lê Đức Mạnh, kong pơlê Dak Lak ƀă pái pri mơhnhôk cho mâu ngế: Phan Hồng Phong, kong pơlê Quảng Trị, Hồ Hoang Minh Thắng, kong pơlê Kon Tum ƀă Mai Hoàng Phát (pơlê kong kân Hồ Chí Minh).

Tiô khu châm điêm, tơdroăng mơnhên ki dâi lĕm kơphế a roh tơ’noăng tiô mâu pơkâ nếo xua Khu pơkuâ kơphế ki kơhiâm má môi – SCA tối tơbleăng hiăng mơjiâng hên tơdroăng pơloăng mơnúa ăm mâu hok tro veăng roh tơ’noăng hơnăm kố. Laga, mâu ngế tơ’noăng hiăng rơkê tơkâ hluâ ƀă châ điêm hên tiô điêm lâp plâi tơnêi. Tơdroăng kố pơtối mơnhên khu kơ-ốu kơphế Việt Nam rế hiá rế mơnhông rơkê.