Tơ’noăng mê ai hên mâu ƀai ki ro, mơhno túa lĕm tro vêa vong dêi kuăn ngo. Vâ chê 700 ngế ôh tá hmâ dêi 23 khu hơdruê xuăng dêi 21 to cheăm, bêng tung pơlê kong kơdrâm Ƀuôn Ma Thuột hiăng veăng mơđah vâ chê 120 ƀai. Mâu tơdroăng hơdruê môi ngế, péa ngế, hơdruê hlối xuăng, rêi prôa, rêi têng nêng, rơngêi ting ting, hơdruê then.

Mâu ƀai hơdruê xuăng mê mơhno hên tơdroăng pơ-eăng Đảng, Pôa Hồ, tơdroăng pâ pơlê xiâm, pâ tơnêi têa, tơdroăng ‘na tơplâ dêi kăch măng ƀă tơdroăng púi vâ mơjiâng dêi pơlê kro mơdrŏng, kuăn pơlê rơkê. Klêi tơ’noăng, khu tơkŭm po kô diâp 46 pri A, B,C ƀă pri mơhnhôk ăm mâu ƀai ki ro, hơniâp. Diâp 11 pri ăm tâi tâng khu ăm mâu tíu pêi cheăng ki ai hên ƀai châ tơƀrê ƀă ai tŭm mâu tơdroăng hnê tối tiô tơdroăng pơkâ tơ’noăng.