-Koh kơ jâ Nguyễn Thụy Phương Hiếu, tơdroăng tơkŭm po ôm hyô a kong pơlê Dak Lak ối rak vế khôi túa lĕm tro dêi mâu hdroâng kuăn ngo, rak vế mâu tơmeăm khoăng dêi loăng pơlái, kong kế, vâ prôk troh a hnoăng ki mơnhông kân khât. Tơdroăng kố, ai ing troăng hơlâ ki mơnhông dêi kong pơlê ki pang ‘nâng ga ti lâi, ô jâ?

Jâ Nguyễn Thụy Phương Hiếu: Dak Lak hiăng mơnhên ivá ki ó rơdêi dêi tơná cho mơnhông kơvâ ôm hyô ‘na nhâ loăng, kong kế ƀă ‘na túa lĕm tro. Ai 49 hdroâng kuăn ngo rơtế rêh ối, pêi cheăng xuân cho túa ki tơ’ló, tơtro vâ mơnhông hên khôi túa, vêa vong tâng vâ pơchông ngăn pơla Dak Lak ƀă mâu kong pơlê ki ê, ing mê,  mơjiâng chiâng hên kế tơmeăm rế hên tâ vâ tơ’mot vâi krâ-nhŏng o, tơmối ing tíu ê troh pôu ngăn.

Khu kăn pơkuâ hnê ngăn Đảng kong pơlê hiăng mơ’no hlá mơ-éá ki vâ mơnhông ôm hyô, kố cho troăng hơlâ vâ mâu tơring cheăm tơkŭm pơka pêi pro mơnhông 3 hnoăng cheăng xiâm ‘na kơvâ ôm hyô, tung mê ai pơlê kong kơdrâm Ƀuôn Ma Thuột, Lăk ƀă Ƀuôn Đôn. Mâu tơring, pơlê kong krâm tâ tá cho mâu tíu tơníu ki vâ pêi pro mâu hnoăng cheăng veăng tŏng gum, mơjiâng mâu tơmeăm khoăng, túa tơ’mot tơmối mot ôm hyô, mơjiâng tour mâu troăng prôk.

Dak Lak ối tung kơpong ki gok gâ túa lĕm tro ‘na chêng koăng Tây Nguyên, mê xuân hiăng tơkêa ƀă UNESCO ‘na pơtối rak vế chêng koăng. Tung hneăng hơnăm 2021-2025, kong pơlê hiăng mơhno tối hên tơdroăng pơkâ ‘na chêng koăng, tơdroăng pơkâ ‘na tŏng gum ăm kuăn pơlê a mâu thôn pơlê mơnhông ôm hyô pơlê pơla. Tơkŭm pơkâ tơdjuôm ing mâu ngế pơkuâ, mâu kế tơmeăm, mâu tơdroăng i tơkêa pêi, troăng hơlâ ki vâ mơnhông pêi cheăng kâ kơpong dêi hdroâng kuăn ngo, pơtối mơdêk ki xiâm ‘na ôm hyô rế vâ kring vế, rak ngăn ‘na túa lĕm tro, rế châ mơnhông kế tơmeăm ôm hyô.

-Pơla hdrối mê hía nah tơdroăng ki mơnhông ôm hyô tiô troăng pơlâ kố châ tơƀrê ga ai tiah lâi, ô jâ?

Jâ Nguyễn Thụy Phương Hiếu: Rêm hơnăm mê ivá ki mơnhông ‘na ôm hyô, tá tơdroăng ing tơdroăng ôm hyô ƀă tơmối ôm hyô pơrá châ sap ing 10 troh 15%, riân ta tơmối tung tơnêi têa ƀă tơmối tung tơnêi têa. Maluâ hiăng tơkâ luâ 2 hơnăm tro tâ tú pơreăng COVID-19, laga, ivá ki châ mơdêk pơla sap ing hneăng hơnăm 2021-2025 hiăng châ luâ hnoăng pơcháu pêi.

-Mơnhông ‘na kơvâ ôm hyô ‘na nhâ loăng, kong kế ƀă túa lĕm tro ngăn tiô kơ ivá ki tơná ai, tung pơla mê, hên kong pơlê, pơlê kong kân xuân dế pêi pro ƀối tiô troăng hơlâ ki kố, tâng tiah mê, Dak Lak athế pêi pro ti lâi vâ tơbleăng tŭm mâu khôi túa, vêa vong ki krê xêh dêi kong pơlê troh ăm tơmối, vâi krâ-nhŏng o, ô jâ?

Jâ Nguyễn Thụy Phương Hiếu: Tung pơla pơkâ mơ’no mơnhông ôm hyô dêi kong pơlê hiăng pơkâ mơ’no hên tơdroăng ki tơdjêp, tơrŭm ƀă mâu kong pơlê, mê kong pơlê hiăng tơkŭm rah mâu kong pơlê ki rơdêi ‘na tơmeăm khoăng ôm hyô, bă ai troăng prôk ki kân, tơ’liê hlâu ƀă kong pơlê Dak Lak. Dế nôkố, kong pơlê hiăng tơrŭm cheăng ƀă 14 kong pơlê, pơlê kong kân ƀă môi khu tơrŭm cheăng kơmăi kơmok a Pơlê kong kân Hồ Chí Minh. Xua ti mê, a Khu tơrŭm cheăng, ai tơdjêp tơdroăng cheăng ki vâ mơdêk tơdroăng tơmơđah tơbeăng, mê kô mơjiâng mâu troăng ki tơkŭm pơtối mơdêk ivá cheăng dêi têa kơxĭ ƀă kong kế, ngo ngối. Ƀă mâu tíu ki vâ tơdah tơ’mot tơmối kng têa ê, mê kơnôm ing mâu kong pơlê, môi tiah Khánh Hoà, Hà Nội, Pơlê kong kân Hồ Chí Minh vâ tơ’mot tơmối mot ôm hyô troh a kong pơlê, mê xuân kal pơtối tơrŭm, tơdjêp, veăng pêi pro hên mâu tơdroăng ki tơrŭm tơpui kâ, po hneăng trâm mâ, tơpui tơno, hôp dêi pó, vâ ing mê, mơhno, mơđah tơbleăng ‘na um méa, ki ro dêi túa lĕm tro, ‘na kuăn mơngế a Dak Lak troh a mâu kong pơlê, pơlê kong kân.

-Cho môi tiah tơdroăng ki jâ hiăng ai tối mê, pơkal athế kơdo mơ-eăm hên tâ nếo ‘na hnoăng cheăng dêi tơrêm kong pơlê, tơring, cheăm, đi đo athế tơdjêp, tơrŭm cheăng pơla têa kơxĭ ƀă kong vâ veăng tŏng gum dêi pó, mê cho túa ki Dak Lak hiăng  tơrŭm vâ mơnhông tơdroăng ôm hyô. Xua ti mê, krê to a kong pơlê Dak Lak kô thăm mơdêk hnoăng cheăng ki ôm hyô ti lâi vâ tơ’mot ƀă pơtối châ rak chêng tơmối mot ngăn, ô jâ?

Jâ Nguyễn Thụy Phương Hiếu: Khu ngăn ‘na Túa lĕm tro, Tơ’noăng Ivá ƀă Ôm hyô xuân hiăng po troăng hơlâ ăm khu mơdró kâ tơnăng mơjiâng pro dêi xêh kế tơmeăm ki nếo tiô kơ tơdroăng xiâm hiăng pơkâ vâ mơjiâng chiâng tơdroăng ki nêó, ki krê xêh. Thăm mơdêk ki kơnía, ki kơnâ dêi tơmeăm khoăng, ‘na hnoăng pơkuâ ngăn tơnêi têa, tơkŭm hnê hriâm, hnê tối mơjiâng kuăn mơngế ki pơkuâ cheăng a kong pơlê, tơring, cheăm, vâ tơxâng ƀă hiâm mơno pói rơhêng vâ dêi tơmối. Thăm mơdêk hnoăng cheăng dêi Khu tơrŭm cheăng ôm hyô, mơjiâng mâu chi hô̆i kơvâ cheăng, pơtối mơdêk ki rơdêi dêi mâu kơvâ cheăng ki ê, ing mê, thăm mơdêk tơdroăng cheăng túa lĕm tro, ôm hyô lơ mâu pro tơ’noăng ivá ki Dak Lak dế thăm mơdêk vâ tơ’mot tơmối mot ôm hyô troh a mâ pơlê cheăm.

Tung khế 10 kố, Khu ngăn ‘na Túa lĕm tro, Tơ’noăng Ivá ƀă Ôm hyô kô pơtroh Vi ƀan hnê ngăn kong pơlê Dak Lak po hneăng hôp vâ tơkŭm mơnhên tơdroăng ki tơrŭm cheăng, ing mê ah kô mơjiâng tơdroăng pơkâ ăm hnoăng tơrŭm tung hneăng ki nếo châ tơƀrê hên tâ. Tơdrêng amê, Khu tơrŭm ngăn ‘na Ôm hyô kong pơlê Dak Lak kô mơjiâng tơ’nôm 2 chi hô̆i nếo, mê cho chi hô̆i Hngêi ăm tơmối kâ koi ối pơtê ƀă kế kâ ƀă chi hô̆i ki ngăn ‘na Ôm hyô, pơtối mơdêk ivá ki ó rơdêi ƀă mơnhông ôm hyô a kong pơlê kố.

-Hôm, mơnê kơ jâ Nguyễn Thụy Phương Hiếu, Kăn hnê ngăn Tuá lĕm tro, Tơ’noăng Ivá ƀă Ôm hyô kong pơlê Dak Lak.