VOV4.Xơ Đăng – Pôa Y Djuan Mjiao (hmâ khê̆n cho pôa Lot) 65 hơnăm, ối a ƀuôn M’Ngoan, cheăm Ea Hồ, tơring Krông Năng, kong pơlê Dak Lak, cho môi ngế ki rơkê hên tơdroăng. Ôh ti xê to rơkê tŏn tơdrá ƀai chêng, ‘nâi hriăn pro ƀă hlŭm mâu rơpŏng môi tiah tak-tar, đing năm, đing buôt...mê ối ‘nâi hơdruê kưt, eiri, hâk vâ túa tơlá ƀă ôh tá la lâi pơtê hriâm hnê tơdroăng ki tơná hâk vâ hnê aqm rêm rơxông tung pơlê.

VOV4.Xơ Đăng - VOV Tây Nguyên hiăng châ 30 hơnăm mơjiâng ƀă mơnhông tơƀrê, tơplôu tơbleăng, tơpui pơchuât, mơ’no nâl kuăn ngo xuân hiăng châ 30 hơnăm tơbâ hên tơdroăng. Ing tơdroăng tơpui nâl Rơđế ki apoăng châ mơ’no a hơnăm 1993, mê troh nôkố, VOV Tây Nguyên hiăng tơkŭm tơplôu tơbleăng, tơpui pơchuât,  mơ’no 6 nâl kuăn ngo: Rơđế, Jarai, Bơhnéa, Rơteăng, K’Ho, M’Nông. Tung 30 hơnăm mê, ‘nâi to lâi tơdroăng ối chôu vế, vêh tơbâ ƀă mâu khu ngế ki tơpui nâl kuăn ngo a Tây Nguyên.

VOV4.Xơ Đăng - Ing idrâp chuât xơtó pơla idrâp dêi chêng, khiê̆n plôi ƀă idrâp hơkâ, túa kơhnhon xuăng Arya tiô túa vâi krâ roh ton nah, túa kơhnhon xuăng ki rơmuăn, mơhno tối ‘na tơdroăng rêh ối, pêi cheăng tung kuăn pơlê dêi hdroâng kuăn ngo Chu Ru ton nah, châ vêh tơbâ nếo pơla kong kân Tây Nguyên krip tơdrŏm. Ôh tá xê to troh nôkố mê hiăng hên hơnăm tơdrá hơdruê, rơngê ting ting, túa kơhnhon xuăng, chêng hơkâ ki mê hiăng pôa Touneh Ma Bio, ối a thôn Diom A, cheăm Lạc Xuân, tơring Đơn Dương, kong pơlê Lâm Đồng xuân rak vế, chôu ‘măn troh nôkố. Pó vâi krâ nhŏng o ƀă pú hmâ kô tơmâng.

VOV4.Xơ Đăng - Têng nêng (vâi ối hmâ tối dêi ting ning) cho prôa hmâ rêi dêi mâu hdroâng kuăn ngo a Tây Nguyên. Têng nêng hmâ rêi tung mâu rôh xah hêi ro dêi kuăn pơlê, hâi leh mơdĭng, malối tung mâu rôh xah hơdruê tiâ pro tơhmâ dêi rơpó pơla vâi droh rơtăm. Hâk vâ hmâng idrâp têng nêng, mê pôa Y Djưng Êban, ối a cheăm Čư Suê, tơring Čư̆ Mgar, kong pơlê Dak Lak ôh tá xê to rơkê rêi mê ối rơkê hriăn pro têng nêng vâ hnê ăm rơxông kuăn muăn - cháu chái.

VOV4.Xơ Đăng - Kong pơlê Kon Tim ai lối 609 rơpâu 600 ha  kong, tung mê lối 547 rơpâu 700 ha kong ki chiâng xêh ƀă ki xâp rơngiâp lối 63% ƀăng tơnêi dêi kong pơlê. Rơtế ƀă mơnhông cheăng kâ tung kong kế, ngo ngối, mâu hơnăm a chê pơla kố hên kuăn pơlê hdroâng kuăn ngo, mâu khu pêi cheăng, cheăm, tơring dêi kong pơlê Kon Tum ối tơkŭm rak ngăn, tí tăng mâu tơdroăng ki lĕm tơviah krê ƀă mâu khu kuăn kiâ, nhâ loăng dêi kong kế, ngo ngối bro chiâng kế tơmeăm ôm hyô tơ’mot hên tơmối rơhêng troh ôm hyô rế hía rế hên. Khoa Điềm, ngế chêh hlá tơbeăng cheăng tung Rơ’jiu Việt Nam ai ƀai chêh “Kon Plông rak vế ki lĕm kơnâ dêi kong kế vâ mơnhông ‘na ôm hyô”.

VOV4.Xơ Đăng - Koh hâi tơbâ 78 hơnăm hâi Kăch măng Khế Tơheăm ƀă hâi mơjiâng Tơnêi têa lơ 2/9 hơnăm kố, kơvâ cheăng ƀă mâu kăn kong pơlê, mâu tíu ôm hyô ngăn túa lĕm tro mơnúa kâ kế kâ pơchên tiô chal ton nah dêi mâu kong pơlê kơpong Tây Nguyên dế thâ hbrâ mâu tơdroăng ki kal vâ tơdah tơmối troh ôm hyô a kơpong kố. Tơdroăng ôm hyô ngăn túa lĕm tro ton nah kố ôh ta xê to pơtối châ rak vế khôi túa, vêa vong lĕm tro ton nah hdroâng kuăn ngo mê  ối châ tơ’mot tơ’nôm kơxô̆ liăn rêm rôh kong pơlê tơdah tơmối troh:

VOV4.Xơ Đăng – Tung mâu hâi kố, rơtế ƀă kuăn pơlê dêi rêm kơpong tơnêi têa tơdah Têt tơniăn krê, kuăn pơlê mâu hdroâng kuăn ngo lâp lu pơlê Tây Nguyên pơtối pêng păm tơdroăng pâ troh Pôa Hồ. Mơhé tá hâi môi roh châ trâm, laga tung hiêm mơno kuăn pơlê Tây Nguyên đi đo tâ ai Pôa achê, đi đo séa ngăn rêm tơdroăng pêi, pơlê rŭm môi tuăn, gâk kring tơniăn, mơjiâng ivá ó rơdêi tơ’noăng pâ nhuô̆m tơnêi têa, kuăn pơlê mơnhông pêt mơjiâng tơmeăm, tơniăn tơdroăng rêh ối.

VOV4.XơĐăng - Ƀă dó inâi “Amazing Kon Tum – Kon Tum pro hâk vâ’’, kơxê lơ 30/8, a pơlê kong kơdrâm Kon Tum, Khu pơkuâ ‘na mơhno khôi túa lĕm tro, Tơ’noăng ivá ƀă Ôm hyô kong pơlê Kon Tum mơhnhôk roh tơ’noăng pro video clip Ôm hyô Kon Tum hơnăm 2023.

VOV4. Xơ Đăng - Kong măng lơ 29/8, a Hngei hơdruê Hồ Gươm, Hà Nội, pôa Vương Đình Huệ, Kăn xiâm hnê ngăn Kuŏk hô̆i hiăng veăng ai mâ a Rôh po tơdroăng ngê̆ thuât ki hơniâp ro “Nắng Ba Đình”.

VOV4.XơĐăng - A pơlê kong kơdrâm Ƀuôn Ma Thuột, Kơ koan teăng mâ Rơ’jíu Việt Nam a kơpong Tây Nguyên nếo tơkŭm po roh hôp ‘na Troăng hơlâ rak vế, chôu ‘măn tơdroăng rơngê rơngối dêi Rơđế, Jarai tung hyôh rơ’jíu hdroâng kuăn ngo ki iâ mơngế a VOV Tây Nguyên.