VOV.Xơ Đăng - Koh tơdah hơnăm nếo 2026, kơmăng hâi 31/12 la kố ah, kong pơlê Gia Lai kô tơkŭm po mơ’no tung tum tơvi tơdrêng tơdroăng Countdown (riân vêh rŏng) Têt Lo hơnăm Yương Lĭt 2026, pro ăm hơniâp ro, tơbleăng lâp lu ki tơrŭm môi tuăn, ƀă púi vâ mơnhông dêi kuăn pơlê a kong pơlê.

VOV.Xơ Đăng - Tung pơla hdrối mê hía nah, a Tây Nguyên hiăng ai hên mơngế hdrông kuăn ngo hiăng khên vâ mơjiâng túa ôm hyô hnối rak vế dêi khôi túa, vêa vong hdrông kuăn ngo tơná. Mâu tíu ki ôm hyô pơlê pơla cho tíu ki vâ ăm tơmối châ ngăn, châ hlo ‘na tơdroăng rêh kâ ối pêi chiâk pêi deăng, tơdroăng ki mơđah chêng koăng, rêi prôa kuăn ngo, rơngê ting ting. Tung kơxô̆ ki mê, Ea Knir Farm a kong pơlê Dak Lak châ ngăn cho môi tíu ki hiăng rơkê khât tung pêi pro rak ngăn dêi klâng chiâng ki ngiât lĕm tơtro tiô khôi hmâ dêi hdrông mơngế Tây Nguyên. Kơ’nâi kố, pó vâi krâ-nhŏng o rơtế lăm pôu ngăn tíu ki ôm hyô kố, vâ châ mơnúa tế rơhé í pế tơvât ƀă kơxêt klôa ki kơhiâm, tro tiô khôi hmâ dêi kuăn pơlê.

VOV.Xơ Đăng - Mâu hâi ki kố, Đà Lạt, Lâm Đồng dế tơpok tơpâ to reăng ki tơ-eăng lĕm ƀă hơniâp ro tung pơla dế po leh mơdĭng tơmeăm khoăng kơphế lâp plâi tơnêi, leh prôk drô troăng kơphô̆. Kố cho mâu tơdroăng pêi pro tung rôh po Leh mơdĭng tŏn chêng koăng Đông Nam Á hơnăm 2025, tơdroăng leh kân mơhno túa lĕm tro ôm hyô tơ’mot hên tơmối troh a mơ’nui hơnăm 2025 ƀă tơdah hâk ro hơnăm nếo 2026.

VOV.Xơ Đăng - Hên ngế tối tiah kố, mâu ngế cheăng ‘na văn hok ngê̆ thuât ‘na hdroâng kuăn iâ mơngế ối iâ, troăng hơlâ gum tá hâi tơxâng, cheăng chal krâ ai drêng ‘nâ ối tŭm.

VOV.Xơ Đăng - Mâu hâi ki mơ’nui hơnăm 2025, a kong pơlê Lâm Đồng hiăng po hên tơdroăng ki mơhno túa lĕm tro, ki vâ tối mê cho Leh tơbleăng tôu chêng tôu koăng Đông Nam Á dó inâi “Idrâp Kế kơnía-Tơdjêp ƀă la ngiâ”. Mâu tơdroăng pêi pro mê, ai tá rơtế mơđah, tôu chêng tôu koăng dêi mâu ngế vâi krâ-nhŏng o ki rơkê tung tơnêi têa ƀă tung kơpong; kơmăng ki po rơdâ tơdroăng xah ôm hêi ki kân a Plông kân Lâm Viên; ing mê, hiăng mơnhên tối hnoăng cheăng ki rơkê plĕng dêi tíu ki mơđah ƀă mâu idrâp hơdruê xuăng tơrŭm tá tôu chêng koăng. Tơdrêng amê, cho tơdroăng ki mơđah ếo pơtâk kuăn ngo, Leh tơbleăng Kơphế lâp plâi tơnêi hơnăm 2025 ai hên mâu tơmeăm khoăng, tơpui tơno, tơdroăng mơđah-ôm hyô ki ro rih.

VOV.Xơ Đăng - Tung tơdroăng po Leh mơđah Chêng koăng Đông Nam Á 2025, kơmăng lơ 21/12 a Đà Lạt (Lâm Đồng) hiăng pơxiâm po Leh tơbleăng Tơmeăm kơnía kơphế lâp plâi tơnêi 2025 roh má môi.

VOV.Xơ Đăng - Kơmăng hai lơ 21/12, Khu xiâm ngăn túa Lĕm tro, Tơ’noăng ivá ƀă Ôm hyô kong pơlê Dak Lak tơkŭm po mơgêi rôh Tơ’noăng Tŏn chêng koăng ƀă mơđah rêi prôa tiô tơdrá mâu hdroâng kuăn ngo tung kong pơlê.

VOV.Xơ Đăng - Tung tơdroăng rêh ối hơniâp ro dêi chal nôkố, a Gia Lai, hên ngế ối nếo dế rak vế krá tơniăn ƀă pro tơdjâk ivá rêh nếo ăm túa lĕm tro chal krâ. Sap ing chêng koăng châ chuât xtó tung mâu hâi po mơdĭng, mâu khu ki tŏn chêng koăng hơnăm ối nếo khên tơnôu lo a tíu ki hên kơdrâm mơngế, troh túa pơkâ pro ôm hyô pơlê pơla xo túa lĕm tro cho ivá, vâi dế chiâng rơrêk kông tơdjêp tơmeăm kơnía dêi pâ pôa ƀă tơdroăng rêh ối nôkố.

VOV.Xơ Đăng - Pơla tơdroăng rêh ối dêi chal nếo nôkố, drêng hên ki pơxúa lĕm tro ton nah  dế vâ hía, kong pơlê ối mơ-eăm pơtối rak vế ƀă tơbâ  po mâu hâi leh mơdĭng tiô chal krâ nah dêi kuăn ngo tơná. Sap ing tơdroăng mơdĭng kâ báu nếo, mơdĭng rơkâu pâ kong mêi  Xeăng pơtau On troh hên mâu tơdroăng pro mơdĭng ki kuăn pơlê loi nhoăm, mâu tơdroăng pro mơdĭng mê dế châ “tơbâ nếo”, chiâng xiâm ki pơtối vâ rak krá túa vêa vong lĕm tro dêi kuăn ngo a kong pơlê kố tung tơdroăng rêh ối a chal nêo nôkố.

VOV.Xơ Đăng - ­Tung pơla dế xông prôk mơnhông ƀă pơhlêh xúa cheăng kơxô̆ dế lân rơdâ lâp lu a mâu pơlê cheăm kơpong kong ngo, mâu tơdroăng ki kơnía ‘na túa lĕm tro tiô khôi hmâ dêi hdrông kuăn ngo Tây Nguyên ôh tá tro lôi pá rŏng. Teăng amê, kơnôm ai tuăn ki rơkê plĕng ƀă ki kơhnâ mơ-eăm dêi mâu vâi rơxông nếo hdrông kuăn ngo, mâu idrâp chêng koăng, cheăng tĕn hmôu jiâ lơ mâu túa rêh ối, pêi cheăng tiah hmâ trâm hlo dế châ “mơdriu” tiô túa ki nếo, tơ-eăng lân rơdâ tung măng internet, troh ƀă kơdrâm kơdrĕng pơlê pơla.