Troh apoăng khế 8, kong pơlê Dak Lak nếo ‘no lối 3.200 rơtal liăn, châ lối 33% túa pơcháu kơxô̆ liăn ‘no pêi cheăng tơdjuôm châ pơcháu. Vâ pêi klêi pơkâ pêi ‘no liăn 68% hdrối hâi lơ 30/9, Dak Lak athế ‘no tơ’nôm 4.200 rơtal liăn, tơ’mô dâng 2.100 rptal liăn tung môi khế. Kong pơlê ối 181 to kế tơmeăm bro dế trâm pá, tơvâ tơvân, cho mâu tíu ki tro kreăng kân kal châ lêi tah vâ pro ivá thăm mơnhông.

Pôa Đỗ Hữu Huy, Kăn hnê ngăn Vi ƀan kong pơlê Dak Lak pơkâ thế mâu khu râ, kơvâ cheăng, kong pơlê rĕng pêi pro klêi tơdroăng ki xoăng tâi tâng kơxô̆ liăn pêi cheăng tơdjuôm ki u ối, mơdêk rĕng tơdroăng ki ‘no liăn sap ing khế 8. Tơdrêng amê, hlối tơkŭm lêi tah mâu tíu ki tro kreăng tơvâ ‘na tơnêi, xo tơnêi ƀă chêh pro hlá mơ-éa.