Khâu ngăn kuăn pơlê pêi chiâk kong pơlê Dak Lak nôkố ai 102 tíu pêi cheăng tung Khu ƀă vâ chê 300 rơpâu ngế ki hmâ pêi chiâk deăng. Klêi kơ’nâi ‘mot tơkŭm tíu pêi cheăng, pêi pro kăn pơkuâ kong pơlê péa râ ƀă ‘mot tơkŭm thôn, pơlê, tôh kơphô̆, pơkâ thế pơhlêh xúa internet, mơnhông cheăng kâ pú hên ƀă mơjiâng thôn pơlê nếo pơkâ thế pơhlêh nếo rơdêi tơdroăng kal, túa pêi cheăng dêi khâu tiô troăng pêi ai pơxúa, tơƀrê hôm.

A rôh hôp, mâu kăn tối hên túa pêi, túa pêi tơƀrê ƀă mơ’no troăng hơlâ pơhlêh nếo tơdroăng cheăng dêi chi hô̆i tiô troăng ki tro ƀă tơdroăng rơhêng vâ dêi rêm ngế ki cheăng, mơdêk rơdêi pơhlêh xúa internet ƀă mơjiâng mâu chi hô̆i, tôh chi hô̆i pêi cheăng tro ƀă mơjiâng pro tiô troăng tơrŭm khât. Jâ Vũ Thị Thúy Hòa, Kăn hnê ngăn Kuăn pơlê pêi chiâk cheăm Ea Drăng tối ki rơkê dêi cheăm.

“Rơhêng vâ rơtế ƀă kuăn pơlê pêi chiâk pêi deăng mê ki apoăng athế hlê vâi kal ki klâi vâ pin tŏng gum ăm vâi i tro ƀă ăm tro pơkâ pêi mơ’no. Ƀă klêi kơ’nâi ‘mot tơkŭm tơniăn túa pêi cheăng nếo mê pơtối hnê hriâm nhên, râng kŏng mơhno nhên tơdroăng cheăng ăm ngế kăn ngăn chi hô̆i vâ tơbleăng pêi ƀă cheăng pơkuâ tâi tâng mâu hlá mơ-éa chêh ‘măn tung điê̆n tưh xuân hiăng châ chêh ‘mot tâi tâng tung Google Form”.

Pakĭng mâu túa pơkâ pêi hiăng tơtro rơkê mê, hên mâu kăn xuân mơhno mâu tơdroăng ki ối xơpá tung hnoăng cheăng dêi chi hô̆i klêi kơ’nâi ‘mot tơkŭm tíu pêi cheăng, malối cho tơdroăng pơkâ thế pơhlêh xúa internet ƀă mâu kăn ƀô̆ a cheăm bêng. Jâ Châu Thị Hồng Thảo, Kăn hnê ngăn Kuăn pơlê pêi chiâk cheăm Hòa Mỹ pâ thế, sap ing tơdroăng ki ai khât a cheăm bêng mê kal athế tiah kố:

“Pâ thế Khu ngăn kuăn pơlê pêi chiâk kong pơlê po lâm hnê hriâm ‘na tơdroăng pơhlêh xúa mâu tơdroăng chêh ‘măn tung internet, po mâu lâm hnê tối ‘na AI ki tơdjâk troh ƀă rêm chi, tôh hô̆i a pơlê cheăm, vâ rêm ngế kuăn pơlê a cheăm bêng pơrá ‘nâi ƀă xúa kong ngê̆ AI, malối cho tung tơdroăng dế nôkố ai hên khu ngế ki tí tăng hêak pơloi tung măng internet cho môi tơdroăng ki pơloăng ó khât, pro ôh tá tơniăn”.

Mâu kăn môi tuăn tối tiah kố, ƀă tơdroăng pơhlêh nếo hnoăng cheăng ki xiâm, mơdêk ki rơkê cheăng dêi chi hô̆i kal rĕng châ pêi pro pơhlêh ƀă mâu troăng hơlâ pêi cheăng tơtro ƀă tơdroăng ki ai khât dêi rêm to cheăm bêng, rêm tíu pêi cheăng khu. Jâ H’Giang Niê, Kăn hnê ngăn Khu ngăn kuăn pơlê pêi chiâk deăng kong pơlê Dak Lak tối ăm ngin ‘nâi, mâu rơkong tơpui tối ôh tá xê to tối tơbleăng hên túa pêi cheăng, túa pêi tơƀrê mê ối mơ’no hên troăng hơlâ pêi pro ki ai pơxúa khât vâ mơdêk ki rơkê plĕng tung tơdroăng cheăng dêi khu tơrŭm Khu.

“Mâu tơdroăng ki kal châ tơpui tơno môi tuăn athế rĕng châ pêi pro pơhlêh chiâng mâu tơdroăng, túa pơkâ ƀă mâu troăng hơlâ pêi pro tơtro ƀă tơdroăng ki ai khât dêi rêm tíu pêi cheăng, rêm chi hô̆i. Xua mê, rêm râ Khu kuăn pơlê pêi chiâk, rêm chi hô̆i kal mơnhông dêi hnoăng cheăng, hiâm mơno hbrâ rơnáu, tơmiât pêi rơkê, pơhlêh nếo tung tơkŭm pêi pro tơdroăng pơhlêh nhên ‘na ki rơkê plĕng tung hnoăng cheăng dêi chi hô̆i. Ngin kô chêh xo tŭm mâu rơkong tơpui tối, pâ thế vâ hriăn ngăn ‘mot tơ’nôm, chêh ‘mot tung mâu tơdroăng ki kal tung la ngiâ”.