Vâ ai tơdroăng rêh ối chía niân, chiâng kro mơdrŏng môi tiah hâi kố, prế on veăng ngoh Đường ƀă nâ Nẫm ối a thôn 4, cheăm Trà Tân, kong pơlê Lâm Đồng hiăng kơdôu mơ-eăm tơkâ luâ hên mâu khế hơnăm pá puât, tí tăng cheăng kâ vâ rêh rêm hâi. Tơdroăng ki chiâng ía kơ prế  on veăng ngoh Đường ƀă nâ Nẫm, mê cho ai tuăn ‘nâi kơdo mơ-eăm tơkâ luâ pá puât, môi tuăn dêi rơpó ƀă hlối mơ-eăm pêi chiâk pêt loăng plâi vâ hluăn kơtiê ƀă mơnhông tơná châ tơniăn tung rêh ối.

Sap ing péa pái sào tơnêi apoăng dêi nôu pâ peăng péa pâ ăm, prế on veăng kơhnâ pơ’lêh hdrê loăng pêt mơdêk pê lo liăn. Ing pêt báu, pêt tiu, kơphế troh pêt loăng plâi hôt, pêt rơngá, alâi… hlo loăng plâi ki lâi pêi châ liăn hên prế ngoh nâ pêt hdrê loăng ki mê, hlối pơ’lêh tơnêi ăm hơpok, mơdêk pêi châ xo hên, hlối vâ pêi lo liăn ăm rơpŏng hngêi.

Pakĭng pêt loăng plâi, prế ngoh nâ ối păn chu, ro, pu pái,… drêng ai kế kâ, kế ‘măn, ngoh prế nâ rôe tơ’nôm tơnêi po rơdâ tơnêi pêi chiâk. Nôkố rơpŏng hngêi prế ngoh nâ ai 6 ha loăng plâi hôt hiăng kân ai plâi, 1 ha klâng, 2 ha tơnêi pêt loăng plâi ton hơnăm mê cho pêt alâi, rơngá, prá ƀă hên hdrê loăng plâi ki ê, kơxô̆ liăn pê lo tơniăn vâ chê hrĭng rơtuh liăn rêm hơnăm.

Nâ Võ Thị Nẫm ăm ‘nâi, hlo yă kơphế achê kố vêh to nếo, rơpŏng hngêi nâ hiăng pêt tơvât loăng kơphế a kơdrum loăng plâi hôt ƀă kô pơtối pêt tơ‘nôm tiu tâng yă xuân ối kơnâ.

“Hdrối nah pêt tiu, kơphế xuân châ xo liăn hên, la tiu ôh tá châ rak ton môi tiah kơphế ƀă loăng plâi hôt, xua mê má on veăng tơmiât pơ‘lêh pêt loăng plâi hôt tâi tâng. Ƀă nôkố hiăng ăm má châ xo dêi plâi. Má on veăng xuân tơmiât hdrối mê nếo pêt lối 1 ha kơphế tung kơdrum loăng plâi hôt. Tâng mơhúa to lâi hơnăm kơ‘nâi ah nếo kô ko tah loăng plâi hôt pêt tơvât tiu ƀă kơphế”.

Vâ tơdroăng pêi chiâk deăng châ tơbrê, prế on veăng ngoh nâ kơhnâ veăng hriâm lâm hnê túa ki rơkê khoa hok kih thuât tơdrêng amê hlối tăng ‘nâi pleăng ƀă tí tăng rĕng pêi hlối drêng kơchơ mơdró dế vâ rôe loăng plâi ki lâi nôkố vâ ai troăng pơ’lêh hdrê loăng plâi ki pêt ăm tơtro, ƀă hlối pơxúa châ liăn hên.

Ngoh Võ Văn Đường tối, on veăng ngoh hdrối nah xuân pêt tiu, kơphế la klêi kơ’nâi to lâi hơnăm, kơphế tiu chu yă, mê nếo ko tah tiu, kơphế pơ’lêh pêt alâi, loăng plâi hôt, xua pơla hơnăm ki mê plâi hôt kơnâ yă.

 “Nôkố a pêi tiô mâu kăn ƀô̆ ngăn ‘na chiâk deăng hnê mơhno pêi tiô túa pêt loăng plâi hôt hữu cơ, iâ xúa phon hoă hok, ki hên xúa rơvât to phon eâk ro, phon pro ing hrái báu… hlo xuân pơxúa. Tối tơdjuôm, nôkố pêi tiô khoa hok peăng Khu hnê mơhnhôk pêi chiâk hnê thế pin pêi ti mê hlo ga châ tâ”.

Vâ pơtối rak vế ki tơƀrê, prế on veăng ngoh nâ ôh tá la lâi ăm tơnêi châ pơtê, tơdroăng pêi chiâk tơvâ tơvân plâ hơnăm, hiăng klêi pôe báu, krí plâi hôt, troh đôu alâi. Ngoh Đường ăm ‘nâi tơ’nôm, rơnó kố nah ai yă lối 60 rơpâu liăn/kg, rơpŏng ngoh nâ pêi cheăng kâ xo liăn tơniăn.

“Xuân púi vâ Tơnêi têa tơmâng khât, peăng kơvâ ngăn chiâk deăng po lâm hnê hriâm rah mâu hdrê pêt ki tơtro ƀă tơnêi tíu, hlối vâ loăng plâi xông dâi lĕm ai plâi hên hlối kâi trâng ƀă kong tô ó, tê tơmeăm pê lo hlối ai yă kô pro pơxúa hên tâ ‘na cheăng kâ”.

Ôh tá xê to pêi cheăng kâ rơkê, rơpŏng ngoh prế nâ ối djâ troăng a hdrối tung mâu tơdroăng cheăng, mơhnhôk a thôn pơlê, cheăm, mê cho: veăng mơjiâng thôn pơlê nếo, mơjiâng rơpŏng hngêi rêh ối tiô túa lĕm tro, ‘nâi tơrŭm môi tuăn, kơjo kum kuăn pơlê vâ rơtế ƀă dêi rơpó xông tơbrê. Tơpui tối ‘na tơdroăng mơ-eăm tơkâ luâ xơpá mơnhông kro mơdrŏng dêi prế on veăng ngoh Đường ƀă nâ Nẫm, pôa Lâm Văn Nhu, Kăn thôn 4, cheăm Trà Tân, kong pơlê Lâm Đồng ăm ‘nâi:

“Tung thôn 4 ai rơpŏng ngoh Võ Văn Đường cho rơpŏng kuăn pơlê pêi chiâk rơkê, rôh apoăng, rơpŏng hngêi xuân pá puât, la troh nôkố tơdroăng cheăng kâ tung rơpŏng hngêi hiăng tơniăn, xông tơbrê, kơnôm pêt loăng hôt, pêt rơngá, pêt alâi, pêt báu,… Kuăn ‘nĕng prế ngoh nâ ai môi ngế pro kŏng an, môi ngế pro mố đô̆i. Tŭm prế on veăng xuân mơ-eăm kơhnâ pêi cheăng kâ, rơpŏng hngêi ai 5 - 6 ha loăng plâi hôt, cheăng kâ krá tơniăn”.

Prế on veăng ngoh Đường ƀă nâ Nẫm cho kuăn pơlê pêi chiâk kơhnâ khât, chiu pá, ‘nâi kơdôu mơ-eăm pêi cheăng a tơnêi tơná, mê ôh ti xê to hluăn kơtiê mê ối mơ-eăm mơnhông dêi rơpŏng hngêi xông kro mơdrŏng, châ hên kuăn pơlê tung pơlê khĕn tối kơhnâ, ngăn cho mơngế ki djâ troăng kơhnâ prôk hdrối tơxâng vâ hriâm ƀă pêi pro ƀối.