Kố cho rôh apoăng leh tơbleăng plâi sầu riêng a Dak Lak châ tơkŭm po kân râ kong pơlê, po sap hâi lơ 15/8 - lơ 2/9 a bêng Buôn Ma Thuột, cheăm Krông Păč, bêng Tuy Hòa, ƀă mâu cheăm bêng ki ê ai tơnêi kân rơdâ pêt sầu riêng.

Leh tơbleăng ai 17 tơdroăng pêi pro, ki tơƀrê mê cho: Pơxiâm po leh a Plông kân lơ 10/3; Hneăng hôp tơpui ‘na pêi lĕm krúa sầu riêng krá ton; leh tơbleăng ối pơchên kế kâ hên má môi sap nah ta hâi chói ai a Việt Nam ƀă 102 túa kơchâi kế kâ ki pro ing sầu riêng; kơpong tơbleăng mâu sầu riêng ƀă tơmeăm châ mơnên OCOP; mâu tour lăm ngăn kơdrum plâi sầu riêng rơtế ƀă ôm hyô túa lĕm tro – hdrê loăng plâi; rơtế hên tơdroăng ‘na ngê̆ thuât, mơđah tơbleăng ƀă tê mơdró.

A rôh hôp ƀă khu chêh hlá tơbeăng, ai hên mâu ngế chêh hlá tơbeăng kơ-êng ‘na ki tơƀrê khât dêi leh tơbleăng ƀă mơngế pêt sầu riêng, malối cho ivá po rơdâ kơchơ tê, tơ’mot mâu khu ‘no liăn cheăng, mơhnhôk tê mơdró ƀă mâu pơkâ tối ki tơƀrê drêng mơgêi leh tơbleăng ah.

Tiâ kơ-êng tơdroăng mê, jâ Đặng Thị Thủy, Phŏ Pơkuâ ngăn ‘na chiâk deăng ƀă Hyôh kong prâi kong pơlê Dak Lak tối ăm ‘nâi, kong pơlê dế tơbleăng tơdrêng mâu troăng hơlâ rak ngăn mah kơxô̆ kơpong pêt, tíu kơxuô tâ tung kơthung, mơdêk pơ’lêh kơxô̆ pêi cheăng tung măng, klêi hiăng séa ngăn, tơkŭm pêt tiô tơdroăng tơrŭm, mơnhông tơƀrê plĕng trâu lĕm tâ, logistics ƀă hên túa mơdró tê ăm kong têa ê vâ mơjiâng kơvâ pêt sầu riêng mơnhông krá tơniăn.

“Tíu pêi cheăng hiăng mơhnho troăng nhên vâ tí tăng ‘nâi plĕng ăm Vi ƀan kuăn pơlê kong pơlê mâu troăng hơlâ  tŭm tâi tâng dêi mâu kơvâ cheăng tung rak ngăn sầu riêng. Ngin dế tí tăng ‘nâi plĕng ăm Vi ƀan kong pơlê pơkâ mơdêk pơ‘lêh kơxô̆, pêi cheăng tung măng, tung mê ai rôh pêi cheăng 30 hâi măng. Má péa nếo, pêi pro luât séa ngăn, nôkố ƀă tơdroăng ăm mah kơxô̆ kơpong pêt ƀă tíu tâ tung kơthung mê ngin xuân mơdêk rơdêi, pro ti lâi vâ ví ki ôh tá tơdrăng tung mah kơpong pêt”.

Sầu riêng cho plâi tê ki xiâm dêi Dak Lak ƀă tơnêi pêt dâng 45 rơpâu hectar, plâi gá hơnăm 2025 châ 390 rơpâu tâ̆n, ki pơxúa tê ăm kong têa ê châ lối 1,1 rơtal USD.

Tiô Khu tơkŭm po, leh tơbleăng ôh tá xê to tơbleăng inâi plâi sầu riêng Dak Lak mê ối vâ mơjiâng plêi pêt lĕm, mơdêk tơrŭm pêi pêt - tê rôe, tơ’mot khu ‘no liăn cheăng mơjiâng pro trâu lĕm hên túa tâ, logistics ƀă mơnhông ôm hyô ngăn ‘na loăng plâi chiâk deăng. Dak Lak dế chôa hvêa prôk djâ leh tơbleăng plâi sầu riêng chiâng tơdroăng po leh kân râ tơnêi têa, la ngiâ ah kô châ po râ plâi tơnêi.

Pôa Trần Hồng Tiến, Ngế pơkuâ ngăn Túa lĕm tro ƀă Ôm hyô kong pơlê Dak Lak ăm ‘nâi, mâu tuor lăm ngăn kơdrum loăng plâi sầu riêng châ mơjiâng ôh ti xê to vâ pơxúa ăm leh tơbleăng mê ối vâ tí tăng ‘nâi plĕng vâ chiâng tơmeăm ôm hyô đi đo, veăng pro ăm rơnó plâi sầu riêng chiâng tíu tơhrâ troh ôm hyô rêm hơnăm dêi Dak Lak.

“Mâu tour mê ôh ti xê to vâ pro pơxúa tung leh tơbleăng ƀă kơ’nâi mê kô châ tăng ‘nâi plĕng, tối ăm ‘nâi rêm tour ôm hyô đi đo rêm hơnăm. Mơni kô ai mâu hơnăm ôh tá tơkŭm po leh tơbleăng, la vâ rêm ngế troh ƀă Dak Lak kô châ hlo châ ngăn mâu tíu pêt, châ mơnúa kâ, ngăn túa pêi pêt, pro, krí ‘măn, tâ tung kơthung. Klêi leh tơbleăng ngin púi vâ rêm rơnó plâi sầu riêng kô pro rêm ngế ối chôu pâ ƀă kô troh lăm ôm hyô nếo a Dak Lak”.