Tơpui tơno a tơdroăng ki veăng dêi mâu ngế ki teăng mâ mâu kơ koan pơkuâ ngăn Tơnêi têa, kong pơlê, khu hnê mơhnhôk pêi chiâk, rơtế ƀă khu pêi cheăng tơrŭm, khu mơdró kâ mơjiâng pro, uâ pơliê, tâ tơmeăm pêi lo ing chiâk deăng tung tơdrong vâ tê ngi kong têa ê. Mâu kăn tơkŭm tơpui tơno mâu tơdroăng pơkâ thế nếo tung pơkuâ ngăn, rak vế mah kơxô̆ kơpong pêt, mah kơxô̆ tíu tâ tung kơthung; tơdrêng amê hlối tơpui tối leăng mâu tơdroăng ki xơpá tung pêt, hbrâ mơdât pơreăng, tí tăng xiâm kối ƀă tơrŭm pơla kơpong pêt ƀă tíu tâ tung kơthung, khu mơdró kâ tê ngi kong têa ê.

Ing tơdroăng ki ai khât tung pêi chiâk deăng, pôa Nguyễn Thanh Sơn, Kăn pơkuâ Khu pêi cheăng tơrŭm pêi chiâk deăng Dà Mri tối ăm 'nâi, Khu pêi cheăng tơrŭm ai 180 ngế, ƀă vâ chê 450 ha plâi sầu riêng. Ki pá kân nôkố cho túa pơkâ pêi pêt pơla mâu rơpŏng tá hâi tơdâng tơ'mô, tung pơla kơchơ mơdró rế hía rế tơmâng ngăn ôh tá xê to tơmeăm ki mơ'no tê mê tá túa pơkâ, pêi pêt ƀă tơdroăng ki vâ mơnhên dêi kơpong ki pêt.

“Tơdroăng ki hmâ trâm hlo dêi khu pêi chiâk deăng cho rêm ngế pêi pêt tiô túa tơná ‘nâi, ôh tá ai kơbố ƀối tuâ kơbố. Tơdroăng pơkâ mơ’no akố athế tơkŭm pêt môi tiah lâi ga tro. Khu pêi cheăng tơrŭm ngin hiăng ai túa pơkâ, po lâm hnê hriâm, po hôp tơpui tơno, po túa ki mơnúa pêt ngăn; ki xiâm má mơ’nui cho tơkŭm pêt tiô troăng hưh cơ krá tơniăn ton”.

Ki khât gá sap ing Khu pêi cheăng tơrŭm Dà Mri xuân tối tơdroăng pơkâ thế rế hía rế kân tung tơdroăng ki tí tăng mah kơxô̆ kơpong pêt tung lâp kong pơlê Lâm Đồng. Troh nôkố, Lâm Đồng ai 1.611 to mah kơxô̆ kơpong pêt, tung mê ai 1.094 mah vâ tê ngi kong têa ê hiăng châ tơnêi têa roê ‘mot kĭ pơkâ; rơtế ƀă 547 mah kơxô̆ tíu tâ tung kơthung. Ki rơhêng vâ tối, ai troh 173 mah kơxô̆ kơpong pêt ƀă lối 3.600 ha ƀă 61 mah kơxô̆ tíu tâ tung kơthung hiăng tro pơxâu ƀă hiăng tro xo tơvêh.

Mâu kơxô̆ kố ăm hlo, drêng pro hlá mơ-éa ăm mah kơxô̆ rế hía rế châ pro tơ'lêi hlâu, xing xoăng râ ƀă kơxô̆, ki xiâm pơkuâ ngăn kal pơhlêh rơdêi troh tơdroăng rak vế tơniăn klêi kơ'nâi ăm, mơdêk séa ngăn ƀă mơdêk hnoăng cheăng dêi rêm ngế tung tơdroăng pêt mơjiâng.

Pôa Lê Quốc Thanh, Kăn pơkuâ Tíu xiâm hnê mơhnhôk pêi chiâk deăng tơnêi têa tối nhên, mah kơxô̆ kơpong pêt nếo bú cho tơdroăng ki apoăng; ki kơnía khât ối a troăng pêi pêt, tơdroăng pơkâ xúa, tơmeăm xúa ƀă tâi tâng mâu tơdroăng chêh 'măn ƀă tơdroăng pêi pêt.

“Mah kơxô̆ kơpong pêt tá hâi tối ki klâi ôh, gá bu xiâm cho tơdroăng ki pơkâ. Ƀă kuăn pơlê ki pêi pêt ƀă túa ki lâi, xúa tiô pơkâ ki lâi, xúa túa pơkâ ki lâi, tơmeăm khoăng tiah lâi mê tâi tâng mâu tơdroăng dêi mah kơxô̆ mê nếo tối ki dâi lĕm dêi tơmeăm pêi lo mê”.

Ing mâu tơdroăng pơkâ mơ'no, tơpui tơno pơkâ mơdêk tơrŭm cheăng pơla kuăn pơlê pêi chiâk deăng, khu pêi cheăng tơrŭm, tíu ki tâ tung kơthung ƀă khu mơdró kâ tê ngi kong têa ê; mơdêk xúa kŏng ngê̆ kơxô̆ tung pơkuâ ngăn tơdroăng chêh 'măn tung kơmăi, tí tăng 'nâi plĕng, tối hdrối tơdroăng ki ôh tá mơhúa; tơdrêng amê hlối mơdêk ki dâi lĕm dêi kơpong pêt mơjiâng tơmeăm vâ ai tiô tơdroăng púi vâ rế hía rế hên dêi mâu kong têa ki rôe 'mot tơmeăm.