Tiô Khu pơkuâ Kơmăi kơmok tê mơdró Dak Lak, tung 9 khế hiăng hluâ, tâi tâng kơxô̆ liăn châ xo ing tê tơmeăm ngi kong têa ê dêi kong pơlê tiô riân châ 2,3 rơtal dollars Mih, tâk lối 6% tâng vâ pơchông ƀă khế kố hơnăm nah. Krê plâi sầu riêng châ lối 262 rơtuh dollars Mih, tâk lối 61 rơtuh dollars Mih tâng vâ pơchông ƀă lâp plâ hơnăm 2025. A tơdroăng pêi cheăng, khu mơdró kâ tối pá puât tung ăm mah kơxô̆ kơpong pêt ƀă tơdroăng ki roê tá hâi krá tơniăn ƀă tơdroăng ki vâ 'nâi xiâm kối. Pôa Huỳnh Văn Kiều, Kăn pơkuâ kŏng ti tê rôe tơmeăm ngi kong têa ê Hoa Kiều, ăm 'nâi:

“Kuăn pơlê nôkố ối trâm pá tung tơdroăng ki pro mah kơxô̆ kơpong pêt tung pơla rôe plâi sầu riêng ƀă mâu ngế ki ai mah kơxô̆ kơpong pêt ƀă mâu ngế ki tá hâi ai mah kơxô̆ kơpong pêt xuân ôh tá kơtăn hơngế 'na yă. Xua mê kô ôh tá tơdâng tơ'mô tung tơdroăng ki tê ngi kong têa ê, xua mah kơxô̆ kơpong pêt tơdjâk troh xiâm kối, xiâm kối dêi plâi sầu riêng”.

Pakĭng tơvâ tơvân 'na mah kơxô̆ kơpong pêt, hngêi kơmăi uâ mơdiê, 'măn rak ƀă uâ mơdiê a Dak Lak xuân ối iâ. Tơdjêp pơla kơpong pêt, khu pêi cheăng tơrŭm, tíu ki tâ tung kơthung ƀă khu mơdró kâ tê ngi kong têa ê tá hâi krá tơniăn; plâi sầu riêng ki hên tê cho plâi ối drêh. Vâ tah lôi pá puât, kăn teăng mâ pơkâ thế 'mâi mơnhông tơrŭm cheăng, mơdêk ki tơƀrê pơkuâ mah kơxô̆ kơpong pêt ƀă séa ngăn ki dâi lĕm; mơdêk tơdjêp tơdrêng ƀă khu ki rôe vâ rế hía rế po rơdâ kơchơ tê mơdró.

Veăng a tơdroăng kơphế khu mơdró, pôa Đỗ Hữu Huy, Kăn hnê ngăn Vi ƀan kong pơlê Dak Lak pơkâ thế mâu khu râ, kơvâ cheăng tơmâng xo rơkong pâ thế, tŏng kum khu mơdró mơnhông kơvâ plâi sầu riêng krá tơniăn.

‘’Kong pơlê tơmâng khât troh tơdroăng uâ pơliê pro trâu. Hơnăm kố kong pơlê hiăng kĭ tơbleăng mâu kơpong hngêi kơmăi, kơchơ xiâm a mâu kơpong hngêi kơmăi. Tung la ngiâ thế ai tơdroăng ki rơtế prôk dêi Khu tơrŭm pêt plâi sầu riêng tung tơdroăng tơkŭm krí plâi sầu riêng, uâ pơliê lơ têng khăng vâ tê ngi kong têa ê lơ cho uâ pơliê mâu tơmeăm ki uâ pơliê hên tâ, mê pin bu pêt hlối tê tơmeăm ki uâ pơliê môi tiah mê gá ôh tá châ yă kơnâ ‘’.