A roh Hôp pakĭng tối ‘na tơdroăng ki tê phái ăm kong têa ê tung hơnăm 2025, troăng hơlâ pơkuâ cheăng tê phái ăm kong têa ê hơnăm 2026 ƀă tung la ngiâ. ‘Na kong têa ki pin vâ tê ăm vâi phái tung 2 khế apoăng hơnăm 2026 mê cho; Philippines pơtối cho kong têa ki rôe phái Việt Nam hên má môi, lối 55% tung tâi tâng phái tê ăm kong têa ê tung lâp tơnêi têa, châ 711,264 tâ̆n, tâk 30% tâng vâ pơchông ƀă hơnăm 2025; ối má 2 cho kong têa Sinuâ, dâng 14% tung tâi tâng phái dêi Việt Nam châ 178,165 tâ̆n, tâk lối 143% tâng vâ pơchông ƀă hơnăm 2025.

Tiô tối hdrối sap khế 3 Việt Nam tê phái ăm mâu kong têa ê kô tro tơdjâk xua ai tơdroăng tơplâ a kơpong Trung Đông, pakĭng mê, kơxô̆ liăn ‘no chơ tung tơnêi têa tâk 20.000 - 30.000 liăn/tâ̆n phái; xua tơdroăng tơbriât dêi mâu kong têa ki tê phái hên môi tiah kong têa Siam, Ấn Độ, Pakistan; phái vâ tê hên xua rơnó xeăng têa hơnăm 2025-2026 pơxiâm vâ pôe.