Ôh tá tơchĕng tơmiât xếo ƀă tơdroăng ki xâu pro pá ăm kuăn ‘nĕng cháo chái athế lăm chiân lăm xo rêm rôh troh a hâi ki xo liăn hiăng pơtê cheăng, lơ xo mâu liăn ngân tŏng gum ‘na baoh hiâm, pôa Nguyễn Văn Minh a cheăm Ea Ning, tơring Čư̆ Kuiñ, kong pơlê Dak Lak nôkố tơná hiăng chiâng vâ ngăn xêh mâu tơdroăng ing tài khoản hngêi rak liăn ƀă mâu liăn tŏng gum ăm mâu kăn ƀô̆ ki hiăng pơtê cheăng a tài khoản điê̆n tưh hiăng đăng kĭ ƀă hngêi rak liăn ƀă baoh hiâm xah hô̆i kong pơlê. Pôa Nguyễn Văn Minh ăm ‘nâi, ing rôh ki châ mâu ngế cheăng tung tôh kong ngê̆ kơxô̆ pơlê pơla dêi cheăm hnê ăm tơdroăng ki cài đặt ƀă hnê xúa mâu ứng dụng kố pôa hlo gá tơ’lêi hlâu khât.

“Ôh tá êa lăm prôk xo xếo lơ mâu hâi ki pin ôh tá doh chôu á hmâ pâ mơéa chêh ăm ngế ki ê tơkôm nếo châ xo. Ing hâi ki ai tơdroăng pơkâ mê, troh hâi ki vâi pơtroh liăn tung tài khoản. Ngin xúa môi tiah kố gá hiăng hmâ xuân ôh tá êa lăm xo liăn mâ xếo mê quet mah QR gá tơ’lêi hlâu khât”.

Ôh ti xê lăm troh rêm hơlâ troăng, tơgôu rêm hngêi mâu tôh kong ngê̆ kơxô̆ pơlê pơla a cheăm Ea Ning, tơring Čư̆ Kuiñ, kong pơlê Dak Lak ối xoăng mâu ngế cheăng gâk a tíu cheăng một cửa a Vi ƀan hnê ngăn cheăm vâ gum, hnê mơhno ăm kuăn pơlê. Ƀă tơdroăng ki kơhnâ, pôu râng dêi hnoăng tŏng gum dêi mâu tôh kong ngê̆ kơxô̆ pơlê pơla, rế hía rế ai hên kuăn pơlê Dak Lak hiăng xúa rơkê mâu ứng dụng dịch vụ kơxô̆ tung mâu rôh ki kal môi tiah: khăm pơlât, hnê hriâm, tŏng gum pơlê pơla ing mâu nền tảng kơxô̆, tơrŭm tung tơdroăng tê mơdró điê̆n tưh. Pôa Nguyễn Văn Mạnh, ngế ki tơrŭm tung tôh pơhlêh kơxô̆ pơlê pơla, cheăm Ea Ning, tơring Čư̆ Kuiñ ăm ‘nâi.

“Mâu ngế cheăng ki xiâm dêi mâu tôh pơhlêh kơxô̆ pơlê pơla, mơdêk hnoăng cheăng djâ troăng ahdrối, pleăng dêi ivá dêi khu hiăng tơdjuôm ivá hnê ăm kuăn pơlê a mâu tíu, a mâu cheăm pơlê. Ing mê mơdêk rế hía rế tơƀrê tơdroăng ki pơhlêh kơxô̆ a mâu cheăm pơlê”.

Tiô pôa Nguyễn Tuấn Hà, kăn phŏ hnê ngăn má môi Vi ƀan hnê ngăn kong pơlê Dak Lak, troh nôkố, tung lâp kong pơlê hiăng mơjiâng châ vâ chê 2 rơpâu tôh kong ngê̆ kơxô̆ pơlê pơla a mâu thôn, pơlê, tôh kơphô̆ ƀă 11.700 ngế veăng. Kố châ ngăn cho “mâu ngế ki xiâm pro tơdjâp” dêi khu hnê mơhno pơhlêh kơxô̆ rêm râ cho hnoăng cheăng ki xiâm ăm kong ngê̆ kơxô̆, kih năng kơxô̆ troh ƀă kuăn pơlê.

“Tôh pơlê pơla kố ai hên ngế cheăng tung mê ai khu ki xiâm cho khu kăn pơkuâ, mâu tíu pêi cheăng mơdró kâ veăng tung pơla pơhlêh kơxô̆. Dak Lak pêi tiô hneăng, pêi đi đo, mơeăm kơhnâ rêm hneăng troh ƀă kuăn pơlê”.

Vâ mơdêk tâ nếo ki tơƀrê dêi mâu tôh kong ngê̆ kơxô̆ pơlê pơla, tung la ngiâ ah, kong pơlê Dak Lak pơtối mơdêk rơdêi rôh hnê hriam, hnê mơhno, mơdêk ivá ‘na pơhlêh kơxô̆ ăm mâu ngế cheăng tung tôh. Rơtế amê, tơrŭm ƀă mâu tíu pêi cheăng ki tơdjâk, malối cho mâu tíu pêi cheăng viễn thông mơjiâng tơdroăng ứng dụng tung phôn râng kŏng vâ tơ’lêi hlâu ăm kuăn pơlê, khu mơdró kâ tăng, xúa. Ing mê, gum mơdêk kơxô̆ ngế kuăn pơlê xúa kong ngê̆ kơxô̆, rĕng klêi chiâng hlá mơéa ki kal kuăn pơlê kơxô̆.