Dak Lak nôkố ai dâng 44.000 ha sầu riêng, tung mê lối 33.000 ha dế hiăng krí, rơnó krí plâi 2026 kố tiô riân châ dâng 500.000 tâ̆n. Kố cho môi tung mâu kơvâ cheăng pêt mơjiâng kế tơmeăm pêi lo ing chiâk deăng ai yă tê ngi kong têa ê hên má môi dêi kong pơlê, veăng gum pro kal khât tung thăm mơnhông cheăng kâ ƀă pêi lo liăn ăm kuăn pơlê.

Laga, hlo mâu tơdroăng pơkâ thế rế hía rế xơpá sap ing mâu kong têa ki roê ‘mot ‘na tí tăng xiâm kối, séa ngăn pơkeăng ƀă ki tơniăn dêi plâi, tơdroăng cheăng pơkuâ ngăn mah kơpong pêt, mah kơxô̆ tíu ki tâ tung kơthung a mâu tíu ki ‘nâ xuân ối hlo ôh tá tơniăn, mơni kô ai tơdroăng tơdjâk troh loi tơngah ƀă tơdroăng ki vâ tê plâi ngi kong têa ê.

Khu pơkuâ ngăn Đảng Dak Lak pơkâ thế Đảng ủi Vi ƀan hnê ngăn kong pơlê kố hnê mơhno mâu khu râ, kơvâ cheăng ƀă kong pơlê rĕng séa ngăn tâi tâng mah kơxô̆ kơpong pêt, mah kơxô̆ mâu tíu tâ tung kơthung hiăng châ hbru ăm; mơdêk rĕng tơdroăng hbru ki nếo ƀă mâu kơpong ki ai tŭm tơdroăng; khŏm mơeăm pơxâu phâk mâu ngế ki roê tê, ăm mung, mah kơxô̆ kơpong pêt, mah kơxô̆ tíu ki tâ tung kơthung ƀă mâu tơdroăng ki lu lêa tung hồ sơ vâ tê ngi kong têa ê

Kong pơlê Dak Lak kô chêh pro troăng hơlâ tơrŭm cheăng ai tơdjâk troh pơla mâu kơ koan pêi chiâk deăng, kơmăi kơmok ƀă tê mơdró, kŏng an, khu pơkuâ ngăn tíu tơkăng kong, khu ngăn nâp hnoăng liăn mơhá ƀă kăn pơkuâ kong pơlê vâ môi tuăn mâu hlá mơéa ki kal, séa ngăn krá tơniăn tơdroăng mơjiâng pro roê xo, tê ngi kong têa ê; tơdrêng amê hlối mơdêk rĕng tơdroăng ki pơhlêh xúa kong ngê̆, chêh pro tíu ‘măn ‘noăng chư chêh xúa tơdjuôm vâ xúa tung tơdroăng cheăng pơkuâ ngăn, tối tơbleăng ƀă pơkuâ.

Tiô pôa Lương Nguyễn Minh Triết, Ngế cheăng tung tíu xiâm Đảng, Kăn pơkuâ ngăn Đảng Dak Lak, hên tơdroăng ki tơvâ tơvân dêi kơvâ plâi sầu riêng nôkố tơdjâk troh troăng hơlâ pơkâ ối tung hnoăng pơkuâ Tơnêi têa, malối cho tơdroăng ki hbru ăm mah kơxô̆ kơpong pêt, mah kơxô̆ tíu tâ tung kơthung, tí tăng xiâm kố ƀă tíu ki séa ngăn. Kong pơlê Dak Lak hiăng tơkŭm mâu rơkong tơpui tối pâ thế ăm Tơnêi têa rĕng lêi tah, ví tơdjâk troh tơdroăng tê ƀă tê ngi kong têa ê tung rơnó krí plâi hơnăm kố.

“Pâ thế pêi pro klêi túa pơkâ ki ai tơdjâk troh tí tăng ‘nâi xiâm kố, tơdroăng ki hbru ăm mah kơxô̆ kơpong pêt, mah kơxô̆ tíu tâ tung kơthung, ƀă mơhnhôk kuăn pơlê séa ngăn kơtăng. Nôkố Khu tơrŭm ngăn sầu riêng ƀă khu mơdró kâ ‘na kơvâ plâi sầu riêng cho kơvâ cheăng ki rơdêi dêi kong pơlê mê dế hêng hôu khât ‘na tơdroăng kố. Kố xuân cho tơdroăng tơkôm tung troăng hơlâ pơkâ tŏng gum dêi Tơnêi têa, mê kong pơlê xuân ‘nâi môi tiah lâi la kong pơlê xuân ôh tá chiâng vâ tơbleăng pêi tơdroăng kố”.

Ƀă mâu tơdroăng ki hnê mơhno kơtăng sap ing kăn pơkuâ Đảng rơtế ƀă tơdroăng veăng gum tơdâng tơ’mô dêi rêm râ kơvâ cheăng, Dak Lak tơngah kô teăm lêi tah ki xơpá tơvâ tơvân, pêi pro kơtăng tung pơkuâ ngăn tâi tâng mâu tơdroăng ki mơjiâng pro ƀă tê plâi sầu riêng ngi kong têa ê. Ing mê, ôh tá xê to rak vế inâi plâi sầu riêng Dak Lak tung kơchô tê mơdró kong têa ê mê ối veăng gum rak vế thăm mơnhông ăm kơvâ cheăng xiâm, rak vế pêi lo liăn ăm mâu ngế ki pêt.