GRDP 6 khế apoăng hơnăm dêi kong pơlê Dak Lak pêi châ 7,84%. Tung 12 tơdroăng pơcháu pêi ki hên, nếo ai 5 tơdroăng pơcháu pêi châ tiô pơkâ. Tíu ki pá ‘na pêi vâ châ tâk nôkố dế tơkŭm  ki hên a mâu tơdroăng mơjiâng ƀă tê mơdró. Troh nôkố 10/7, tung lâp kong pơlê nếo xo liăn ngân lối 2.900 rơtal liăn, châ dâng 30% tiô pơkâ kơxô̆ liăn pơcháu.

Vâ pê klêi tơdroăng pơkâ tâk lối 10%, 6 khế mơ’nui hơnăm GRDP dêi kong pơlê Dak Lak thế pêi rĕng, tung mê kơpong hngêi kơmăi - mơjiâng pro thế chiâng ki xiâm. Pôa Đỗ Hữu Huy, Kăn hnê ngăn Vi ƀan kuăn pơlê kong pơlê Dak Lak pơkâ thế tơrêm kơvâ cheăng, tơrêm kong pơlê thế séa ngăn nếo hlá mơéa chêh pơkâ pêi cheăng vâ châ tâk, tơmâng pê klêi mâu tơdroăng ki pá tơvâ tơvân, chêh kơxô̆ pơkâ pêi tiô tơrêm qúy vâ tối pái khế lơ tơdrốu khế pro xiâm hdró vâ tối tơdroăng cheăng pêi hôm tơbrê tiô pơkâ kơlo kơxô̆ KPI.