Rôh hôp hiăng tơdah lối 100 tơdroăng veăng hnê tối pâ thế dêi Khu mơdró, khu pêi cheăng tơrŭm ƀă rơpŏng mơdró kâ, tơkŭm hên a mâu troăng hơlâ ‘mâi mơnhông ‘no liăn pêi cheăng, tah ki xơpá ăm tơdroăng tê mơdró ƀă mơdêk cheăng kâ krê kuăn pơlê. Mâu tơdroăng hnê tối pâ thế pơtối pê klêi luât, pro hlâu tung pro hlá mơ-éa, tah tơvâ tơvân ‘na tơnêi tíu, pơkâ hdró, ‘no liăn cheăng, mơjiâng ƀă hyôh kong prâi; pakĭng mê, mơdêk châ mung liăn, luât pro hnoăng mơhá ƀă mâu tơdroăng ki xiâm mơnhông tơƀrê.

Tối mơgêi Hôp, pôa Lương Nguyễn Minh Triễt, Ngế cheăng tung tíu xiâm Đảng, Kăn hnê ngăn Đảng kong pơlê, Ngế pơkuâ khu Kăn Kuô̆k hô̆i kong pơlê Dak Lak pơcháu hnoăng hneăng ăm Vi ƀan Kuăn pơlê dêi kong pơlê mơdêk hnoăng cheăng hơ’lêh nếo tơdroăng tơpui tơno, tơmâng xo mâu tơdroăng veăng hnê tối, pâ thế dêi mâu khu mơdró. Xoăng nhên hnoăng cheăng pêi tơrêm ngế, tíu pêi cheăng tung tơdroăng tơleăng mơnhên klêi, rĕng mâu tơdroăng pâ thế.

Khu kăn Kuô̆k hô̆i, Hô̆i đong Kuăn pơlê kong pơlê Dak Lak xuân séa ngăn mâu tơdroăng tơhrâ dêi Vi ƀan kuăn pơlê kong pơlê xuân môi tiah mâu tíu xiâm, kơvâ cheăng, cheăm bêng kong pơlê ƀă mâu khu mơdró kâ.