Roh hôp hiăng tơdah xo 101 rơkong dêi khu mơdró kâ, khu pêi cheăng tơrŭm ƀă rơpŏng ki pêi cheăng kâ, tơkŭm pêi pro mâu troăng hơlâ ki ‘mâi rơnêu túa cheăng ki mơ’no liăn cheăng, lêi tah lôi mâu tơdroăng xahpá ăm tê mơdró kâ ƀă hnối thăm mơdêk tơdroăng pêi cheăng kâ krê. Mâu rơkong mê hiăng pâ thế pơtối ‘mâi pơhlêh túa cheăng, pro tơ’lêi hlâu tung chêh bro hlá mơ-eá, tah mâu tơdroăng ki ối tơvâ tơvân ‘na tơnêi tíu, vê hdró, mơ’no liăn cheăng, mơjiâng khu tơrŭm cheăng; tơdrêng amê, pro tơ’lêi hlâu tung châ mung liăn ngân, troăng hơlâ pro hnoăng mơhá, rah xo mơngế, kế tơmeăm, liăn ngân vâ mơnhông. Jâ Võ Thị Hà Giang, kăn teăng mâ Grup tê mơdró kơphế Trung Nguyên, ai tối tiah kố:

“Ngin pâ thế Tíu xiâm hnê ngăn ƀă kong pơlê pơtối hriăn plĕng ‘na túa cheăng krê ăm kong pơlê Dak Lak, xo ngăn ing 5 tơdroăng ki xiâm vâ pêi pro: ‘na troăng hơlâ mơjiâng pro troăng prôk, tíu pêi cheăng, hngêi trăng, ‘na liăn ngân ƀă ‘na khoa hok kŏng ngê̆”.

Khu ngăn ‘na tê mơdró kâ xuân hiăng pâ thế thăm mơdêk mơ’no liăn mơjiâng pro troăng prôk, logistics, mơjiâng pro hngêi trăng, troăng klông; tơveăng gum ‘na tê mơdró kâ, mơnhông ‘na tê mơdró điê̆n tưh, ôm hyô ƀă tơ’mot khu mơ’no liăn cheăng; tơveăng gum ‘na tê mơdró kâ, mơnhông tê mơdró kâ điê̆n tưh, ôm hyô ƀă tơ’mot kơxô̆ liăn ki tŏng gum. Ai hên tơdroăng ki pâ thế thăm mơdêk xúa khoa hok kong ngê̆, xúa ki rơkê plĕng cheăng tung măng internet, pơtroh mâu kế tơmeăm ki ai tơdjâk troh pêi cheăng kâ, tê mơdró; mơjiâng mơ’no teăm tơdrêng pơkâ tah ki xahpá, tơvâ tơvân, pá puât vâ mơnhông tơdroăng cheăng. Pôa Trần Khánh Minh, Kăn teăng mâ Khu tơrŭm cheăng ôm hyô kong pơlê Dak Lak ai tối tiah kố:

“Ki pá puât má môi dêi khu mơdró kâ dế nôkố, ngin pói rơhêng vâ pro ôm hyô ki krúa lĕm, pêi pro tro ƀai la tá hâi ‘nâi pro ti lâi ăm ga tro má môi. Xua ôh ta hâi ai loăng rek ki vâ mơnhên ó khât, mâu kơ koan pơkuâ ngăn a cheăm bêng xuân ta hâi rơkê khât tung tơdroăng pro hlá mơ-eá phep tung pơkuâ ngăn tơnêi tíu lơ mơjiâng mâu hngêi trăng, tíu pêi cheăng a tơnêi pêi chiâk pêi deăng hnối pêi tơrŭm ƀă tơdroăng pro kơvâ ôm hyô. Khu mơdró kâ pêi pro tơdrăng khât, tá hiâm tá mơno la xâu tơdjâk troh tơdroăng ki xôi. Pâ thế rĕng mơ’no mâu tơdroăng pơkâ pêi pro ƀă xúa tơdroăng pơkâ ‘na kơvâ ôm hyô krúa lĕm”.

Tiâ mâu rơkong hnê tối mê, tơdroăng pâ thế dêi khu mơdró kâ, pôa Đỗ Hữu Huy, Ngế ki hbrâ mot khât tung Tíu xiâm Đảng, Kăn hnê ngăn Vi ƀan kong pơlê Dak Lak tối ăm ngin ‘nâi, kong pơlê hiăng ƀă dế tơkŭm hnê tối kơhnâ khât mâu troăng hơlâ ki vâ thăm pêi lo liăn ngân; mơjiâng pro Khu hnê mơhno khŏm pêi lo liăn ngân péa to kơxô̆ ƀă mâu khu pêi cheăng ‘na kơvâ cheăng cho vâ thăm mơdêk, rơtế pêi cheăng, lêi tah lôi tơdroăng xahpá ăm khu mơdró, ăm khu ki mơ’no liăn ngân pêi cheăng. Tiô pôa Đỗ Hữu Huy tối ăm ngin ‘nâi, kong pơlê hiăng pêi pro kơhnâ khât ‘na tơdroăng ki pro tơ’lêi tung mơ’no liăn cheăng, thăm mơdêk túa cheăng chêh bro hlá mơ-eá tiô troăng hơlâ ki xo khu tơrŭm tê mơdró kâ vâ pro tíu xiâm ki tơveăng gum cheăng.

“Vi ƀan hnê ngăn kong pơlê Dak Lak vêh mơnhên kal athế rơtế pêi pro, tơmâng ngăn ƀă tơveăng gum khu mơdró kâ, khu pêi cheăng tơrŭm, rơpŏng tê mơdró kâ mê cho hnoăng cheăng ki pêi pro đi đo, tơdjêp. Ôh tá xê to pêi pro tiô to tơdroăng ki pơkâ tung roh hôp, hiâm mơno ki pêi pro sap ing hdrối troh nôkố pơrá tro tiô dêi pó, môi tuăn dêi pó ki Vi ƀan hnê ngăn kong pơlê hiăng mơ’no, pơhlêh rơdêi ing tuăn tơmiât pêi cheăng chêh tối tung hlá mơ-eá măng troh a tuăn tơmiât pêi cheăng hnối rơtế pêi ƀă khu mơdró kâ”.

Mơgêi a Roh hop trâm mâ kuăn pơlê ki pêi cheăng tê mơdró, khu ngăn ‘na pêi cheăng tơrŭm ƀă mâu rơpŏng tê mdró, pôa Lương Nguyễn Minh Triết, Ngế cheăng tung Tíu xiâm Đảng, Kăn pơkuâ hnê ngăn Đảng, Kăn hnê ngăn Kăn teăng mâ Kuô̆k hô̆i kong pơlê Dak Lak vêh mơnhên tơdroăng ki kơdo mơ-eăm cheăng kal kí cho kal má môi dêi kong pơlê tung tơdroăng lêi tah lôi mâu tơdroăng ki xahpá, tơvâ tơvân tung pêi chiâk pêi deăng, tung tê mơdró kâ tro tiô túa cheăng ki păng ‘nâng.

Kăn pơkuâ hnê ngăn Đảng kong pơlê Dak Lak pơcháu hnoăng cheăng ăm Vi ƀan kong pơlê thăm mơdêk tơdroăng ki pơhlêh nếo tung rak vế hnoăng cheăng tơpui tơno, tơmâng, pơtối tơmâng rơkong hnê tối, pâ thế, veăng khĕn dêi mâu khu ngăn ‘na mơdró kâ. Xing xoăng hnoăng pôu râng dêi tơdroăng cheăng dêi rêm ngế, mâu khu tung tơdroăng cheăng vâ pơkâ pêi pro, thâ rĕng tiâ mơnhên mâu tơdroăng ki ing khu mơdró kâ, khu kuăn pơlê pơtroh tối. Khu kăn hnê ngăn Kuô̆k hô̆i, Hô̆i đong hnê ngăn kong pơlê Dak Lak xuân séa mơnhên ngăn mâu tơdroăng tơkêa bro dêi Vi ƀan hnê ngăn kong pơlê xuân trối mâu khu râ, kơvâ cheăng, mâu tíu, cheăm, bêng ƀă khu mơdró kâ.

“Kong pơlê Dak Lak vêh mơnhên pá môi hdroh nếo, tŏng gum, ngăn khât hnoăng cheăng dêi kơpong ki tê mơdró kâ tối tơdjuôm, ki rơhêng vâ tối cho khu ki pêi cheăng kâ mơngế krê. Kố cho ivá cheăng xiâm ki kal vâ kong pơlê pơkâ khŏm pêi lo kế tơmeăm, liăn ngân tâk châ 2 to kơxô̆ tung la ngiâ. Ngin pói rơhêng vâ khu mơdró kâ pơtối hbrâ tí tăng hlê plĕng, tơmâng ngăn krá kâk tung tơdroăng pơkâ dêi luât, pơhlêh nếo ‘na tuăn tơmiât tung tê mơdró kâ, séa mơnhên ngăn mâu troăng hơlâ ki kơjo pêi pro, mâu troăng hơlâ ki hiăng châ tối tung Pơkâ kơxô̆ 68 dêi Khu xiâm ngăn cheăng Kal kí ‘na mơnhông pêi cheăng kâ krê vâ mơnhông cheăng dêi khu mơdró kâ”.

Ing mâu rơkong ki tơkêa tơhhrâ a roh hop, Dak Lak dế mơ’no troăng hơlâ ki ó rơdêi ing môi khu hnê ngăn ki mơjiâng troăng prôk ki mơnhông, xo khu mơdró kâ vâ pêi pro tiô tơdroăng cheăng xiâm vâ tơveăng gum ăm kuăn pơlê, ăm khu mơdró kâ. Tuá cheăng ki pơhlêh nếo tung tơrŭm cheăng, xing xoăng pôu râng hnoăng cheăng ƀă séa mơnhên ngăn ki tơƀrê tung rak vế, pêi pro mê ôh tá xê to tơveăng gum lêi tah lôi mâu tơdroăng ki pá puât to a ngiâ mê ối mơjiâng tuăn loi tơngah ăm khu mơdró kâ. Ngăn kố cho hvêa chêng prôk ki nhên vâ mơ’no tối hiâm mơno, Pơkâ kơxô̆ 68 dêi Khu xiâm Kal kí mot tung tơdroăng ki ai păng ‘nâng, tơmâng mâu tơdroăng ki cheăng khât, pơhlêh mâu tơdroăng tơkêa bro chiâng tơdroăng ki châ mơnhông păng ‘nâng.