Mâu hâi ki kố, tíu ki pro pơlê ối Kiên Long, cheăm Bình An, kong pơlê Gia Lai hlo to mâu kơmăi kơmok, rơxế. Kố cho kơpong pro pơlê ối kân má môi tung 9 kơpong pro tơdroăng tơkêa bro troăng kân ăm rơxế kơtâu têi Quy Nhơn - Pleiku, rơdâ dâng 10ha.

Vâ teăm pơcháu tung khế 7, sap ing khế 3 hơnăm kố, khu ki xo pro hiăng pơtroh lối chât toăng rơxế, kơmăi kơmok vâ pro troăng, tơkŭm pro hâi măng. Pôa Nguyễn Trung Cần, teăng mâ khu ki xo pro kơpong tíu ối kố ăm ‘nâi, troh nôkố, tơdroăng cheăng pro tíu ối hiăng pro châ 80%. Kố pro klêi mâu kế tơmeăm ki kal pêi hdrối ƀă pơcháu 119 tung tâi tâng 250 ƀăng tơnêi ăm kong pơlê.

“Drêng châ xo tŭm ƀăng tơnêi vâ tơbleăng pro tíu ối, tíu pêi cheăng hiăng pơtroh lối 30 toăng rơxế ô tô pơto chơ tơmeăm, 10 toăng kơmăi chiâ. 6 toăng rơxế gu tơnêi, 6 toăng rơxế lu pro ăm tơnêi tơbăng rơtế ƀă lối hrĭng ngế kŏng nhân pêi cheăng đi đo, tá hâi măng, vâ pro klêi rak tơniăn tơdroăng pơkâ pro”.

A 9 kơpong ki pro pơlê ối drô troăng kân xŏn tơdrăng, hngêi trăng troăng prôk pơrá châ pro tơ’mô ƀă troăng prôk, on tơhrik krâ ‘măn ăm trâ eăng, mơ’no têa, troăng kơxái cap tơbleăng tơdroăng kal ƀă mơ’no tah têa ‘mêi, pro ngiâ méa chiâng lĕm kâk, tiô chal nôkố.

Drêng tâng tơdroăng rup kơxô̆ tíu ối, pôa Trần Văn Thông, a thôn Kiên Long, cheăm Bình An, phiu ro tối xua tíu ối nếo ai tơdroăng rêh ối tơ’lêi hlâu tâ.

“Ƀăng tơnêi pro pơlê ối drêng lâi xuân iâ tâ la kơlo ki ai tŭm tơdroăng gá hên tâ. Akố Troăng kân 19B, troăng prôk lăm tơ’lêi hlâu tâ. Tơdroăng ki pỏ tíu mơ’no têa krúa xuân môi tiah mâu troăng prôk tâ tá kơpong pro pơlê nếo ai hên tíu ki tơ’lêi hlâu tâ”.

Tơdroăng ki tơbleăng túa pơkâ xoăng lô, xoăng tíu pro pơlê ối rơtế ƀă troăng prôk tơdâng tơ’mô hiăng pro tơ’lêi hlâu ăm kuăn pơlê. Malối, tung pơla tơkôm tơ’moê krâ mâu tíu ki mơ’no têa krúa tơkŭm, Vi ƀan hnê ngăn kong pơlê Gia Lai ối tŏng gum liăn pong chiâ têa klôh ăm dâng 150 rơpŏng kuăn pơlê a 5 kơpong pro pơlê ki kal, gum vâi krâ nhŏng o hmiân tuăn troh ối a tíu ối nếo. Pôa Thái Văn Điểm, Phŏ ngăn ƀơrô cheăng kâ cheăm Bình An, kong pơlê Gia Lai, ăm ‘nâi:

“Khu pơkuâ ngăn tơdroăng tơkêa dêi cheăm krếo thế rơpŏng kuăn pơlê troh a Vi ƀan hnê ngăn cheăm Bình An tơbleăng mơéa ki chêh xoăng lô. Ki hên vâi krâ kuăn pơlê phiu ro khât xua Tơnêi têa hiăng tŏng gum, tơmâng ngăn pro ăm hngêi trăng troăng klông”.

Troăng kân xŏn tơdrăng Quy Nhơn – Pleiku xŏn dâng 25 km, tâi tâng kơlo liăn ‘no lối 43.700 rơtal liăn. Vâ gum ăm cheăng xo tơnêi, kong pơlê Gia Lai pro 9 kơpong pro pơlê ói tơkŭm ƀă 2 kơpong tíu vêh pro pơlê ối tơvât ối, xoăng tíu ối ăm lối 500 rơpŏng ki châ tŏng gum.

Troh nôkố, tá 9 kơpong tíu ối kố pơrá hiăng mot tung hneăng ki hiăng vâ pro klêi. Pôa Phạm Sĩ Duy Nhân, Ngế ki pơkuâ ngăn tíu pro troăng kân ƀă Tíu kuăn pơlê ối kong pơlê Gia Lai ăm ‘nâi, hên kơpong môi tiah Trà Sơn, Thuận Đức, Trường Định 2 ƀă Kiên Long hiăng pro klêi mâu tơmeăm xúa ki kal pro hdrối, pơcháu tơnêi vâ kong pơlê tơkŭm rup kơxô̆, xoăng tíu ối.

“Peăng Khu pơkuâ ngăn, ngin pơtroh mâu ngế cheăng pơtối lăm troh a tíu ki vâ xoăng tơnêi ối, tơrŭm hlối tiâ mơnhên séa ngăn ƀă mâu khu ki xo pro thăm mơdêk tơdroăng pro, pêi pro “pái rôh pŭn khu” pơtối hlối, pro plâ hâi măng vâ mơdêk teăm tơdroăng pro. Troh nôkố ki châ kơjo gum vâ xoăng tíu ăm kuăn pơlê. Mâu kơpong ki u ối, Khu pơkuâ ngăn xuân dế khŏm mơ-eăm mơdêk rĕng tơdroăng ki vâ pro klêi tung khế 7 kố”.

Cheăng mơdêk rĕng pro klêi mâu kơpong pro pơlê ối drô troăng troăng kân xŏn tơdrăng Quy Nhơn - Pleiku a Gia Lai ôh tá xê gum kuăn pơlê rĕng tơniăn ai tíu ối, mê ối pro tơ’lêi hlâu vâ tơdroăng tơkêa bro kố châ pro tiô tơdroăng pơkâ. Kố cho ivá cheăng ki kal mơdêk tơdjêp kơpong, po rơdâ tíu ối ƀă pro ivá mơnhông cheăng kâ – rêh ối pơlê pơla ăm kong pơlê.