Peăng kong xêi, troăng ƀê tông a thôn Lầu Nàng, cheăm Ia Lốp, kong pơlê Dak Lak tâng to rơkong mơngế tơpui prôk chêng pơtâp ivá. Drêng mâ hâi hiăng lâ, on tơhrik kơtâu ing mâ hâi pơxiâm eăng. Jâ Vi Thị Phương, kuăn pơlê thôn Lầu Nàng phiu ro tối: ki pơ‘lêh mê nếo po lối tơdế khế kô, sap ai tơmeăm khoăng troăng prôk on tơhrik xua mâu rơxông nếo pleăng hnoăng tơná lăm pro krâ drô troăng prôk dêi thôn. Troăng prôk hiăng kêi on hiăng ai hiăng chiâng tíu kuăn pơlê châ tơtrâm dêi rơpó, pơtâp ivá.

“Phiu ro ‘nâng, lâp pơlê ngế ki lâi xuân phiu ro, xua ai on bâ eăng troăng prôk ăm mâu vâi meh vâi nâ vâ hlâu prôk lăm, hlo eăng bâ tâ ƀă hlối lĕm tâ. Lâp pơlê tơdjuôm dêi rơpó veăng rak vế ăm troăng prôk rế lĕm tâ”.

Troăng prôk mâu trăng on tơhrik mê cho môi tung hên tơmeăm khoăng châ tơbleăng mơjiâng pro tung rôh Droh rơtăm pleăng hnoăng tơná pêi cheăng a rơnó pơtê hriâm hơnăm 2026 xua khu sinh viên Hngêi trung Đại học Nam Cần Thơ tơrŭm ƀă mâu đoân viên droh rơtăm kong pơlê mơjiâng pro a péa to cheăm Ia Lôp ƀă Ia Rốk, kong pơlê Dak Lak. Mâu tơdroăng môi tiah ‘mâi rơnêu pro hngêi kum rơpŏng tro tơdjâk xua khía pê pro tơtêa kuâ, pro víu mơhriâm ăm hok tro kơtiê, pro plông xâh peăng ƀa long lơ tơkŭm pêi tơdroăng hơ’lêh xok chhá xo tơmeăm, xuân cho tơdroăng pêi pro ki tro kal vâ dêi kuăn pơlê kơpong tơkăng kong, hơ’lêh hlê plĕng ‘na kring vế hyôh kong prâi, rak ngăn ivá.

Ngoh Ngân Văn Thành, Phŏ kăn hnê ngăn Vi ƀan Măt trâ̆n tơnêi têa Việt Nam cheăm, Kăn hnê ngăn Đoân Droh rơtăm cheăm Ia Lốp, ăm ‘nâi, mâu tơmeăm mơjiâng pro xuân châ kuăn pơlê rơtế veăng rak vế, xúa tơniăn, kum ai pơxúa dêi tơdroăng cheăng pleăng hnoăng mê châ pơxúa ton.

“Mâu vâi pú đoân viên, droh rơtăm kơhnâ veăng kum kuăn pơlê pêi pro mâu tơdroăng, tơdroăng cheăng khât, pro pơxúa ăm kuăn pơlê ƀă pơlê cheăm. Mâu on trâ eăng troăng pơlê châ kuăn pơlê mơnê ƀă khĕn kơdeăn, ‘na plông xâh peăng ƀa long pro pơxúa ăm mâu hơnăm ối nếo vâ xah pơtâp ivá”.

Ƀă mâu vâi pú hơnăm ối nếo, tơdroăng pleăng hnoăng tơná ối pro pơxúa ăm ‘nâi ki kal pro pơxúa a kơpong tơkăng kong Dak Lak. Ƀă hên sinh viên, kố cho rôh apoăng troh a kơpong tơkăng kong châ trâm mâu kăn ƀô̆, mâu lêng pêi hnoăng cheăng hlối hlo ƀă mâ tơdroăng rêh ối hên pá puât dêi kuăn pơlê. Sinh viên Nguyễn Phú Quý, hngêi trung đăi hok Nam Cần Thơ tối.

“Drêng a pêi tơdroăng cheăng mê a hâk tơngăm khât ƀă phiu ro tung hiâm mơno. Ƀă á cho môi ngế hơnăm ối nếo mê á ai ivá, ai tuăn vâ ƀă hriăn plĕng ki nếo mê a kô rơtế ƀă vâi pú sinh viên vâ gum rêm ngế”.

Rêm tơmeăm khoăng bú cho môi iâ tơdroăng cheăng ki kŭn, la drêng pơxiâm pêi ing tơdroăng kal vâ dêi kuăn pơlê ƀă châ pêi tá tuăn  tá hiâm mơno vâ dêi hơnăm ối nếo, mâu hnoăng veăng pêi mê dế pro pơ‘lêh ăm pơlê a kơpong tơkăng kong dêi kong pơlê Dak Lak.