Tơbleăng a rôh pơ xiâm po hôp má 4 dêi Vi ƀan pơkuâ cheăng Kuô̆k hô̆i kơxo hâi lơ 8/7, a Hngêi Kuô̆k hô̆i, pôa Trần Thanh Mẫn Kăn xiâm hnê ngăn Kuô̆k hô̆i tối nhên, tâng ôh tá tơniăn lĕm, pêi pro tro tơdroăng mê Ngế xiâm, Ngế pơkuâ kơ koan pơkuâ rah chêh ƀă kơ koan pơkuâ mơnhên ngăn thế chiu pôu râng dêi a ngiâ Chin phuh, Ngế pro xiâm hnê ngăn Chin phuh ƀă a ngiâ Vi ƀan pơkuâ cheăng Kuô̆k hô̆i.

Kăn xiâm hnê ngăn Kuô̆k hô̆i pâ thế ƀă mâu  tơdroăng ki kân ai hnê tối phá tơ ê dêi rơpó, lơ luât pơkâ ki nếo tơ ê xêh ƀă tơdroăng pơkâ dêi luât nôkố, mâu kơ koan kal hbrâ tơrŭm ƀă mâu kơ koan dêi Kuô̆k hô̆I vâ teăm tối tơbleăng ăm rêm râ kơpêng séa ngăn, pơkâ; ôh tá lôi hên tơdroăng cheăng a rôh pêi ki mơ’nui dêi rêm rôh hôp, hneăng hôp.

Pôa Trần Thanh Mẫn Kăn xiâm hnê ngăn Kuô̆k hô̆i pá môi hdroh nếo tối nhên, luât thế rơtế prôk ƀă hlối tơdrêng tơtro ƀă Hlá mơ-éa pơkâ dêi chin phuh, luât pơtroh mê mâu tơdroăng pơkâ dêi Kuô̆k hô̆i  a rêm rôh hôp nếo ai pơxúa ƀă rĕng châ xúa tung rêh ối. Kố cho tơdroăng ki kuăn pơlê ƀă khu mơdró dế tơkôm.