Tiô tơbleăng, tung hơnăm hdrối kô hía nah, mâu kăn sát hiăng mơ-eăm rak ngăn krâu khât, mơdêk pêi tơƀrê tơdroăng kroăng phâk pêi pro mâu tơdroăng kroăng phâk; pro tơniăn a 54 tíu kroăng phâk ƀă 178 tíu. Pakĭng mê, mâu lêng ối pêi tro tơdroăng tăng ‘nâi plĕng, pêi tơdroăng mơ’no mâu kroăng phâk, mơ’no ăm lo hdrối hâi khế tâng rak tro luât tung pơla phâk.

Tung 2 hơnăm hdrối ƀă lối 32.000 ngế ki châ mơ’no phâk tơdrêng ƀă kơxô̆ mơngế ki hiăng lo ing phâk pơtối pro xôi mot phâk nếo  ối iâ tê (0,06%), mơhno ki rak tro luât, pêi ahdrối dêi tiô luât pơlê pơla pin ai pơkâ. Pakĭng mê, mơhno nhên tơdroăng hiăng rak tro luât tung pơla phâk, hnê ăm mâu kroăng phâk.

Rơkâu mâu hnoăng hiăng pêi châ tơƀrê ki Khu pơkuâ Kăn sát rak ngăn Tíu kroăng phâk hiăng pêi châ tơƀrê tung hơnăm hdrối kô hía nah; la pôa Tô Lâm xuân ối tối tiah kố, pin xuân thế hlo tơdrăng khât tung  mâu tơdroăng cheăng rak ngăn, kroăng phâk, pơtối vêh rêh ối môi tuăn ƀă kuăn pơlê xuân ối mâu tơdroăng ki hâi teăm tơdrêng ƀă tơdroăng pơkâ thế ki ai păng ‘nâng dế nôkố.

Pôa Tô Lâm pâ thế, tơmâng pêi 6 tơdroăng ki kân, tung mê, thế hơ’lêh nếo tuăn tơmiât ‘na tơdroăng tơleăng phâk ƀă tơdroăng rak ngăn hnê ăm mâu ngế ki phâk, pơ’lêh rơdêi ing tuăn tơmiât rak ngăn mơngế ki phâk chiâng rak ngăn hnê pơtâp rơnêu pât kuăn mơngế. Pôa xuân pơkâ thế, rơtế ƀă tơdroăng tơleăng phâk mơngế ai xôi ƀă tơdroăng hbrâ rơnáu, rĕng châ ’nâi, tơplâ ƀă mâu ngế ai xôi ƀă mơjiâng pơlê pơla rêh ối tơniăn ing xiâm rêi.