Veăng ai mâ a rôh po tơdroăng “Rơnó hơngui lêng” 2026 a Quảng Trực, Đăi tươ̆ng Nguyễn Trọng Nghĩa, Ngế cheăng tung Khu xiâm kal kí, Kăn hnê ngăn Khu xiâm Kal kí Khu lêng Kuăn pơlê Việt Nam, pơtroh rơkong kơ-êng, mơhnhôk mâu lêng – kuăn pơlê kơpong tơkăng kong pơlê Lâm Đồng; hlối tơmâng xo, mơnhên tối khât tơdroăng rak vế pơlê pơla cheăm bêng, gâk kring ƀă tơdroăng cheăng rêh kâ ối dêi Kuân khu 7, malối cho a kơpong hngế hngo, kơpong tíu tơkăng kong.

“Á phiu ro khât drêng Kuân khu 7 ƀă Vi ƀan hnê ngăn kong pơlê Lâm Đồng hiăng ai tơdroăng tơkŭm pêi pro ai pơxúa, tŏng gum vâi krâ kuăn pơlê a kơpong tơkăng kong dêi kong pơlê. Á rơhêng vâ tiah kố, Đảng ƀô̆, kăn pơkuâ, mố đô̆i ƀă kuăn pơlê, kong pơlê Lâm Đồng pơtối pơtó, mơnhông hiâm mơno dêi 3 to kong pơlê cho Dak Nông, Lâm Đồng ƀă Bình Thuận vâ mơnhông tâ nếo, rak vế tơniăn hnoăng cheăng gâk kring pơlê pơla cheăm bêng; vâi krâ kuăn pơlê kơhnâ pêi cheăng, mơ-eăm hluăn ing kơtiê ƀă pro kro mơdrŏng”.

Tung rôh po tơdroăng ‘Hơngui lêng”, Kuân khu 7 hiăng pơxiâm pro Tíu kuăn pơlê ối tơdjêp ƀă tíu gâk dêi khu lêng kuăn pơlê tíu tơkăng kong, ƀă túa pro 60 toăng hngêi pơtăng dêi pó. Rêm toăng rơdâ 90m2, ai hngêi kơbong hum, kơbong mơdrah, ai plông, hơpiâp pế hmê rơtế ƀă mâu veăng ki ê. Cho môi tung mâu rơpŏng ki hâk tơngăm châ rah xo tơdah hngêi ối, ngoh Điểu Cường, hdroâng M’Nông a ƀon Bu Prăng, cheăm Quảng Trực, tối.

“Drêng ‘nâi rơpŏng á ai inâi châ diâp ăm toăng hngêi rôh kố, ngin phiu ro khât. Toăng hngêi châ mơjiâng pro lĕm kâk, kô pro ăm rơpŏng ngin châ mot ối. Ôh ti ‘nâi tơpui klâi pakĭng mơnê Kuân khu 7 ƀă rêm râ, kơvâ cheăng. Rơpŏng á kô mơ-eăm pêi chiâk pêi deăng, tơrŭm ƀă khu lêng Kuân khu rak vế krá tơniăn hnoăng pơkuâ gâk kring tơkăng kong ƀă pơlê cheăm Quảng Trực”.

Cheăm Quảng Trực ai ƀăng tơnêi dâng 559km2, kân má péa lâp tơnêi têa, ƀă dâng 40km troăng tơkăng kong tơdjêp ƀă kong pơlê Mondulkiri, kong têa Kul. Cheăm châ vâ chê tơdế pơ’leăng mâ mơngế cho hdroâng kuăn ngo. Trung tươ̆ng Lê Xuân Thế, Tư lê̆nh Kuân khu 7, ăm ‘nâi, tơdroăng ki mơjiâng pro mâu tíu kuăn pơlê ối tơrŭm a tíu cheăng Lêng – Kuăn pơlê ai pơxúa khât tung la ngiâ veăng gum rak vế hnoăng pơkuâ gâk kring tíu tơkăng kong:

“Châ tơdroăng ki môi tuăn dêi râ ủi, kăn pơkuâ mâu cheăm bêng, Khu pơkuâ Kuân khu hiăng tơbleăng tơdroăng tơkêa xo mâu tíu kuăn pơlê ối pro tíu xiâm, rế hía rế mơjiâng pro tíu ối drô troăng tơkăng kong. Ing mê, khu lêng ngăn a kuăn pơlê vâ rak vế tíu tơkăng kong; kuăn pơlê kơnôm a khu lêng vâ pêi chiâk, mơnhông cheăng kâ, tơniăn tơdroăng rêh kâ ối, vâ rak vế krá tơniăn hnoăng pơkuâ tơnêi tơníu, gâk kring tíu tơkăng kong tơnêi têa sap ing hdrối, sap ing hngế, mơjiâng hiâm mơno kuăn pơlê a kơpong tơkăng kong”.