Tiô pơkâ dêi Vi ƀan hnê ngăn kong pơlê Quảng Ngãi, cheăng xo tơ’nôm hok tro mot hriâm vâ pêi pro châ tiô tơdroăng vâ hriâm tâp dêi hok tto klêi kơ’nâi séa ngăn ivá hriâm tơdah xo dêi mâu hngêi trung hnê hriâm, rak tơniăn tŭm tơtro ƀă tơdroăng ki hnê hriâm, mâu thái cô hnê ƀă pơkâ thế mơdêk ki rơkê plĕng tung hnê hriâm. Vi ƀan hnê ngăn kong pơlê Quảng Ngãi pơcháu ăm Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê séa ngăn klêi kơ’nâi séa ngăn ivá hriâm tơdah xo dêi rêm tíu hnê hriâm vâ pơkâ tơdroăng ki rah xo tơ’nôm hok tro mot hriâm tung mâu hngêi trung trung hok phôh thong ƀă trung tâm giáo dục thường xuyên. Tơdroăng ki rah xo athế châ pêi pro tơdrăng, tro pơkâ ƀă xúa tơƀrê kế tơmeăm xúa, mâu thái cô hnê hriâm dế ai nôkố.

Pôa Nguyễn Ngọc Thái, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Quảng Ngãi ăm ‘nâi, tơdroăng ki mơnhên kơxô̆ ngế hok tro châ séa ngăn tiô pơkâ dêi Chin phuh; tơdrêng amê hlối riân ngăn tiô tơdroăng ki ai khât ‘na tíu hnê hriâm, lâm hriâm, kế tơmeăm xúa tung hnê hriâm ƀă thái cô hnê dêi rêm to hngêi trung . Hơnăm hriâm hdrối nah, kơxô̆ ngế hok tro hiăng hriâm klêi trung hok cơ sở tâk hên tâng vâ pơchông ƀă mâu hơnăm hdrối mê tơdroăng ki vâ mot hriâm lâm 10 kông lâ̆p xuân hên há.

Klêi kơ’nâi tơbleăng rôh ki rah xo hok tro mot hriâm rôh má 1, kơxô̆ ngế hok tro ki tá hâi châ rah xo mot hriâm tung mâu hngêi trung kông lâ̆p ối chía hên. Khu ngăn hnê hriâm ƀă hnê mơjiâng tuăn ngoâ rơkê kong pơlê Quảng Ngãi hiăng vêh séa ngăn tơdroăng dêi rêm tíu hnê hriâm, malối cho mâu lâm hriâm ƀă kơxô̆ ngế thái cô tung môi lâm hriâm tiô pơkâ dêi Khu xiâm ngăn hnê hriâm ƀă hnê mơjiâng tuăn ngoâ rơkê, pơkâ mơ’no tơ’nôm kơxô̆ ngế hok tro mot hriâm. Pôa Nguyễn Ngọc Thái, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Quảng Ngãi ăm ‘nâi tơ’nôm:

“Nôkố ối 4 to hngêi trung tá gâi rah xo tŭm hok tro tiô pơkâ pơkâ pêi ki châ pơcháu mê cho Hngêi trung Phôh thông hdrông kuăn ngo ai tíu kâ koi ối pơtê Măng Đen; Hngêi trung trung hok phôh thong Đinh Tiên Hoàng (tơring Sơn Tây ton), Hngêi trung Trung hok phôh thong Tây Trà (tơring Trà Bồng ton) ƀă Hngêi trung Trung hok cơ sở ƀă Hngêi trung Trung hok phôh thong Phạm Kiệt (tơring Sơn Hà ton). Ƀă mâu hngêi trung ki kố, Khu ngăn hnê hriâm ƀă hnê mơjiâng tuăn ngoâ rơkê kô tơdah xo tơdroăng púi vâ hriâm ‘mot tơ’nôm ƀă pơtối rah xo tiô tơdroăng pơkâ xo điâm sap ing hên troh iâ vâ rak vế tơniăn tŭm kơxô̆ ngế hok tro hriâm hiăng châ Vi ƀan hnê ngăn kong pơlê pơcháu. Tơdrêng amê, Khu ngăn hnê hriâm ƀă hnê mơjiâng tuăn ngoâ rơkê kô môi tuăn ƀă mâu hngêi trung vâ pêi pro tơdroăng ki rah xo tơ’nôm hok tro mot hriâm”.

Tơdroăng ki ‘mot tơ’nôm 2.000 ngế hok tro mot hriâm lâm 10 kông lâ̆p ôh tá xê to pêi pro tiô tơdroăng púi vâ hriâm dêi hok tro mê ối veăng gum mơdêk ki rơkê plĕng tung mâu ngế hriâm, rak tơniăn tơ’lêi hlâu châ hriâm ăm mâu ngế ki hriâm tiô tơdroăng Pơkâ kơxô̆ 71 dêi Khu xiâm pơkuâ cheăng kal kí ‘na pơhlêh nếo, tŭm têk ‘na hnê hriâm ƀă hnê mơjiâng tuăn ngoâ rơkê, pêi châ tơdroăng púi vâ mơnhông tơnêi tung hneăng ki nếo.