VOV4.Sêdang - Hneăng tơplâ ƀă pơreăng COVID-19 xuân tá hâi teăm kâi châ mơdât, drêng pơreăng ôí pơtối tâ tú, thăm nếo tâ tú rĕng, xâu rơ-iô ó tâ. Xua mê, tơdroăng ki kum pro ăm ivá, châ chăn kâi trâng ƀă pơreăng, cho kơnôm ing mâu kế kâ, ngăn mê cho “pháu hơnêa’’ ki dâi xêt khât vâ kring vế, rak ngăn ivá, châ chăn kuăn mơngế ƀă mâu ngế tung on veăng, rơpŏng hngêi, nhŏng o hdroâng hdrê tung rơnó ki ai pơreăng kố.

Tiô mâu ngế rơkê, ƀă mâu pơreăng xông tâ tú, ki rơhêng vâ tối cho pơreăng CoOVID 19, trếo ki ối tung châ kâi hbrâ mơdât pơreăng cho kal khât. Xua mê, vâ rak trếo ki ối tung châ kâi hbrâ mơdât pơreăng đi đo rơdêi, rêm ngế krê kal ôu kâ ai hên vitamin ƀă trếo khoăng ăm châ. Khu xiâm ngăn pơkeăng ƀă khăm pơlât mơhnhôk kuăn pơlê ôu kâ tơtro tung môi hâi kal kâ tŭm mâu tơmeăm, rêm roh kâ thế kâ tơmeăm kố tơmeăm tá, ôh tá pơrah lơ ôu kâ to môi tơmeăm. Ai mâu tơmeăm kâ mơdêk trếo ki kâi hbrâ mơdât pơreăng vâ hbrâ mơdât COVID 19 kal tơtrŏng:

Tơmeăm kâ rêm hâi thế kâ tơdâng pơla trếo đăm kuăn kiâ kong ƀă kơchâi drêh, plâi, pôm (hơ’nêh, ká, kơtâ í, têa tôu ro, xi xŏng, kơchâi, plâi, pôm, ƀă hía hé). Pakĭng mê, thế tơdâng tá têa rơmâ ki pro ing mâu prá ƀă rơmâ kuăn kiâ kong tung roh kâ hmê. Thăm kâ rơngá, pôm prế, prá, kơchâi drêh ƀă plâi ki tum. Kâ tŭm tơdroăng kal vâ, kal xing xoăng tơtro mâu roh kâ tung hâi (tiô hơnăm, ivá, tơdroăng pêi cheăng).

Ƀă mâu tơmeăm ki ai hên trếo protein ăm châ, thế kơjo rah xo hơ’nêh í, peâp, môi tiah í kong têa ê, í pin, ƀă hía hé, ai hên trếo vitamin B6, kố cho môi trếo ki lĕm tŏng kum vâ hbrâ mơdât pơreăng dêi châ, kal khât vâ mơjiâng trếo hồng cầu nếo ƀă rơdêi, thăm ai ivá hbrâ mơdât pơreăng.

Pơtối mê cho ká xi xŏng ôh tá xê to hên trếo piê kơhiâm, mê ối hên kẽm kum mơdêk ki kâi hbrâ mơdât pơreăng ƀă cho môi tơmeăm mơdêk ivá kâi hbrâ mơdât pơreăng ăm vâi hdrêng ƀă mơngế kân. Hên tơmeăm tung têa ai hên kẽm kô chiâng vâ tối troh mê cho: kơteăm, akrot, xing xŏng, uâng lâ ƀă hía hé.

Mâu pơ’leăng plâi kâ kô chiâng tối troh mê cho plâi hạnh nhân ƀă pơ’leăng reăng mâ hâi. Hạnh nhân cho tơmeăm kâ ai hên vitamin E lĕm păng ‘nâng, xua gá ai hên trếo piê ƀă vitamin lĕm ăm ivá. Mâu ngế rơkê ‘na trếo piê kơhiâm tối ăm ‘nâi, môi tơmeăm kâ ăm mơngế kân mê tơdế kơ’lo 46 pơ’leăng hạnh nhân tá kơtôu kô ăm 100% vitamin E tơniăn tŭm trếo rêm hâi.

Tung pơ’leăng reăng mâ hâi ai tŭm trếo piê kơhiâm, tá phosphor, magie, vitamin B6 ƀă Vitamin E, ƀă hía hé. Pakĭng mê, pơ’leăng mâ hâi xuân hên trếo selen. Mâu trếo khoăng kố pơxúa hên ăm châ, kum kơdroh Cholesterol ki ‘mêi tung châ, kơdroh hơkăng, hbrâ mơdât tơbrêi tơbrêh tung châ ôh tá vâ tơpui ƀă kơbố ƀă hnối rak trếo kâi hbrâ mơdât pơreăng.

Ƀă kơchâi drêh, mê kô chiâng kâ hên, tŭm mâu kơchâi drêh tiô rơnó. Mâu kơchâi drêh kơ’nâi kố, ki rơhêng vâ tối lĕm ăm trếo mơdât pơreăng môi tiah hăng ki pế pơchâi, ƀông cải, hơpê xua tung mê ai hên trếo vitamin C, Vitamin A,B, E6, Phytochemical ƀă Carotenoid, ki má lối cho beta carotene (trếo ki xiâm dêi vitamin A) hên hĭn.

Vitamin C châ ngăn cho ‘’xiâm kối’’ mơdêk ivá kâi hbrâ mơdât pơreăng păng ‘nâng. Tơ’nôm Vitamin mê gá ai hên tung mâu plâi kâ. Ki rơhêng vâ tối, mâu plâi quýt. Mê tâi tâng tung mâu plâi kâ ai pơluăn môi tiah: krui ƀŏng, krui ngeăm, quýt, chanh, ƀă hía hé, pơrá hên vitamin C. Plâi hung, kiwi xuân cho mâu plâi kâ ai hên vitamin C. Vitamin C kô kôm châ rĕng prêi lĕm klêi kơ’nâi tro hngíu, kơ-o, tơngê, ƀă hía hé, xua mê mâu plâi kâ kố ai hên ngế rah xo kâ vâ mơdêk ivá ki hbrâ mơdât pơreăng tung rơnó pơreăng xông tâ tú.

Mâu toih, kía, klo#ng trĭng ôh tá xê tơmeăm ki rơvât tung kơchâi kâ, mê châ tối môi tiah ‘’pơkeăng’’ kum hbrâ mơdât mâu pơreăng kơ-o, kơ-ôk ƀă êi troăng hiâm, mơheăm kơtâu têi, rơmâ tung mơheăm ƀă mơdêk ki kâi hbrâ mơdât pơreăng ăm châ.

Hlá tơbeăng Sức khỏe Đời sống

A Sa Ly tơplôu ƀă tơbleăng