VOV4.Sêdang - Kơxo lơ 29/7, AstraZeneca hiăng pơtroh troh Pơlê kong kân Hồ Chí Minh tơ’nôm 659.900 klŏng vaccine COVID 19. Kố cho roh pơcháu vaccine roh má 6 ối tung tơkêa kok rôe hdrối pơla AstraZeneca Việt Nam ƀă Kŏng ti tơlo liăn vaccine Việt Nam (VNVC), ing tŏng kum dêi Khu xiâm ngăn pơkeăng ƀă khăm pơlât. Nôkố, môi tuăn kố hiăng djâ troh ăm Việt Nam vâ chê 3,8 rơtuh klŏng pơkeăng vaccine, tơdâng ƀă 41% tâi tâng kơxô̆ vaccine COVID 19 dêi AstraZeneca tung tơnêi têa.

Tâi tâng hiăng ai vâ chê 9,3 rơtuh klŏng vaccine COVID 19 dêi AstraZeneca châ pơtroh Việt Nam. Pôa Nitin Kapoor, Kăn hnê ngăn, xuân cho Kăn xiâm pơkuâ AstraZeneca Việt Nam ƀă mâu kong têa ki tê hên pơkeăng châu Á tối ăm ‘nâi: kô pơtối tơrŭm ƀă Khu xiâm ngăn pơkeăng ƀă khăm pơlât, WHO, UNICEF ƀă VNVC vâ djâ vaccine troh a Việt Nam rĕng má môi ƀă tơniăn, vâ kuăn pơlê rĕng châ vêh tơniăn tơdroăng rêh ối ƀă châ tơkŭm rêh ối ƀă rơpŏng hngêi.

A Sa Ly tơplôu ƀă tơbleăng