Vi ƀan hnê ngăn Kuô̆k hô̆i nếo tối pơtâng păng ‘nâng ‘na tơdroăng êng tiâ a Roh hôp má 5, Kuô̆k hô̆i hneăng 15. Tiô tối hdrối, Kuô̆k hô̆i kô pơxiâm êng ƀă tiâ mơnhên ing hâi lơ 6 troh lơ 8/6, mâu khu tơdroăng ki châ Kuô̆k hô̆i rah xo vâ êng, mê cho: Tơdroăng pêi cheăng, mô đô̆i rong châ ƀă pơlê pơla; ‘na troăng prôk, rơxế kơtâu; khoa hok ƀă kŏng ngê̆, kuăn ngo.

Khu tơdroăng ki má môi cho ối tung kơvâ pêi cheăng, mô đô̆i rong châ ƀă pơlê pơla, ing mê ah, pôa Đào Ngọc Dung, Ngế xiâm ngăn ‘na tơdroăng cheăng pêi, mô đô̆i rong ƀă pơlê pơla kô tiâ mơnhên ‘na tơdroăng kố. Pôa Hầu A Lềnh, Ngế xiâm ngăn ‘na Vi ƀan hdroâng kuăn ngo cho ngế ki pơtối tiâ mơnhên mâu tơdroăng ki pơtối, ai hên kơvâ cheăng ối tung kơvâ ‘na kuăn ngo. Khu tơdroăng má pái cho ‘na kơvâ khoa hok ƀă Kŏng ngê̆ ƀă ngế ki tiâ mê cho pôa Huỳnh Thành Đạt, Ngế xiâm ngăn ‘na khoa hok ƀă Kŏng ngê̆. Pôa Nguyễn Văn Thắng, Ngế xiâm ngăn ‘na troăng prôk ƀă rơxế kơtâu kô tiâ tối mơnhên ‘na troăng prôk ƀă rơxế kơtâu.

Xuân tung roh êng tiâ mê, pôa Lê Minh Khái, Ngế pro xiâm phŏ hnê ngăn tơnêi têa kô pro mơnhên mâu tơdroăng ki ai tơdjâk troh ƀă tiâ mơnhên dêi mâu kăn Kuô̆k hô̆i. A mâu roh êng tiâ mâu Ngế xiâm phŏ ngăn ‘na tơdroăng cheăng dêi Chin phuh ƀă mâu pơkuâ tơdroăng cheăng, kơvâ cheăng kô veăng tiâ mơnhên ‘na tơdroăng êng, tối tơbleăng, tối mơnhên mâu tơdroăng ki ai tơdjâk troh.