Kố cho tơdroăng ki hiăng châ mơ’no a roh Hôp séa mơnhên ngăn tơdroăng cheăng pêi pro 6 khế apoăng hơnăm, hnoăng cheăng ki kal xiâm tung 6 khế mơ’nui hơnăm 2023 ‘na kơvâ mơnhên pêi cheăng, mơngế ai hnoăng ƀă pơlê pơla, xua Khu xiâm ngăn ‘na Cheăng pêi - Mô đô̆i rong ƀă Pơlê pơla tơkŭm po a peăng xêi lơ 21/7 a Pơlê kong kơdrâm Huế, kong pơlê Thuà Thiên Huế.

6 khế apoăng hơnăm kố, tơdroăng tăng xo mơngế pêi cheăng vâ ngăn tơdjuôm chía tơniăn, kơlo ki pêi cheăng tâk iâ. Kuăn pơlê ai cheăng pêi cho 51,2 rơtuh ngế, tâk luâ 900 rơpâu ngế tâng pơchông ngăn rơnó kố hơnăm nah. Tâi tâng kơvâ cheăng tơkŭm pro klêi troăng pơkâ, luât ‘na tơdroăng cheăng tŏng kum pơlê pơla; rak vế, pêi pro pơlê pơla ƀă lối 300 rơpâu rơpŏng hngêi, mơngế krê ăm lối 3 rơtuh 300 rơpâu ngế ki châ pơlê pơla tŏng kum rêm khế.

A roh hôp mê, teăng mâ mâu khu râ, kơvâ cheăng, mâu kong pơlê tơkŭm tơpui tơno, mơ’no tối mâu troăng hơlâ vâ seá mơnhên ngăn ‘na tơdroăng pêi cheăng, mâu tơdroăng tŏng kum rêh kâ ối pơlê pơla; Pớtối rak vế, pêi pro tiô troăng hơlâ po rơdâ ƀă mơnhông xo tơdah mơngế ki veăng kring vế pơlê pơla, ƀaoh hiêm tŏng kum ăm mâu ngế ki ôh tá ai cheăng pêi.