Mâu rơpŏng Việt Nam hiăng chiâng hngêi trăng ki má péa mơhno tối tơdroăng ki mơjo, hơ-ui pâ rơpŏng hngêi” - mê cho ki châ hlo nhên tơdroăng cheăng tơdjuôm dêi hên khu rơxông vâi droh rơtăm cho mơngế Lếo, Kul veăng pêi pro tơdroăng “Rơpŏng hngêi Việt Nam ƀă sinh viên Lếo, Kul dế hriâm tâp pêi cheăng a Pơlê kong kân Hồ Chí Minh” hơnăm 2023 a Leh mơgêi po a kơxê măng hâi lơ 23/2 xua Vi ƀan Măt trâ̆n tơnêi têa Việt Nam Pơlê kong kân Hồ Chí Minh tơkŭm po.

Ai 91 ngế sinh viên Lếo ƀă 14 ngế sinh viên Kul ki veăng a tơdroăng cheăng hơnăm 2023, mâu rơpŏng ki roăng rak a Pơlê kong kân Hồ Chí Minh hiăng kum mâu vâi o ai tơ’nôm ivá mơno kơdo mơ-eăm hriâm tâp kơnôm ‘na kế tơmeăm ƀă tuăn mơno tung tơdroăng ki mơjo pâ. Kơnôm tiah mê, mâu vâi pú ai hên roh ki tơ’lêi hlâu vâ tí tăng ‘nâi plĕng ‘na khôi túa, vêa vong dêi hdroâng mơngế, tơnêi têa ƀă kuăn mơngế Việt Nam veăng kum rak krá tơniăn hiâm tuăn ki nhŏng o krá tơniăn pơla pái to kong têa Việt Nam - Lếo - Kul.

Drêng kố, mơgêi hnoăng cheăng tơrŭm tơpui kâ kuăn pơlê ƀă hnoăng cheăng dêi mơngế Việt Nam a kong têa ê hơnăm 2023, Vi ƀan Măt trâ̆n Tơnêi têa Việt Nam Pơlê kong kân tối ăm ‘nâi, Măt trâ̆n ƀă mâu khu râ hiăng hbrâ rơnáu tơkŭm po hên tơdroăng cheăng tơrŭm tơpui kâ ƀă kuăn pơlê dêi mâu kong têa Sinuâ, Lếo, Kul; thăm mơdêk ivá cheăng mơhnhôk ing mâu khu cheăng pá kong chin phuh dêi kong têa ê ƀă xua vâ châ pêi pro châ tơƀrê mâu túa cheăng ki tŏng kum.