Tiô Y Thanh Hà Niê Kdăm – Kăn hnê ngăn Hô̆i đong hdroâng kuăn ngo dêi Kuô̆k hô̆i, Phŏ pơkuâ Khu kăn séa ngăn dêi Kuŏk hô̆i ăm ‘nâi, tơƀrê dêi tơdroăng tơbleăng mâu tơdroăng pơkâ tơnêi têa (mơjiâng thôn pơlê nếo, kơdroh kơtiê krá ton ƀă mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo) apoăng pêi klêi mâu tơdroăng ki tơƀrê; hngêi trăng troăng klông cheăng kâ rêh ối pơlê pơla kơpong thôn pơlê, peăng kong ngo hlo hơ’lêh. Pakĭng mê xuân ối ai mâu tơdroăng tơvâ, pro ăm tơdroăng ki pêi klêi ‘no liăn tơnêi têa troh hơnăm 2025 ăm 3 tơdroăng pơkâ tơnêi têa gá chiâng xơpá.

Tơdjâk troh mâu troăng hơlâ vâ mơdêk rĕng tơdroăng ki xoăng liăn pei cheăng tơdjuôm, mâu tơdroăng pơkâ tơnêi têa vâ mơdêk tơƀrê xúa kơxô̆ liăn, veăng kum ăm mâu tơdroăng pơkâ mơdêk ƀă pêi klêi hngêi trăng troăng klông kum mơnhông mơdêk ƀă tơdroăng reh ối kuăn pơlê, a Hneăng hôp mơ’nui hơnăm kố nah, Hô̆i đong Hnê ngăn kong pơlê Dak Lak, pôa Võ Ngọc Tuyên, Kăn pơkuâ Khu pơkâ ƀă ‘no liăn cheăng kong pơlê Dak Lak ăm ‘nâi:

“Tung la ngiâ, ngin kô tơtrŏng tơmâng ngăn troh mâu tơdroăng pơkâ dêi tơnêi têa. Ai tơdroăng ki tơrŭm pơla Khu pơkâ – ‘No liăn cheăng ƀă mâu kơvâ cheăng. Tơdroăng pơkâ tơnêi têa ‘na mơjiâng thôn pơlê nếo mê cho Khu ngăn chiâk deăng, tơdroăng kơdroh kơtiê krá ton cho Khu ngăn pei cheăng, tơdroăng mơnhông cheăng kâ kơpong hdroâng kuăn ngo – peăng kong ngo cho Khu ngăn hdroâng kuăn ngo mê ngin kô tơpui tơno tung Khu hnê mơhno tơdroăng pơkâ tơnêi têa vâ ai tơdroăng ki môi tuăn ƀă séa ngăn hdrối drêng pơcháu túa pơkâ ing apoăng hơnăm vâ tơbleăng teăm ‘no liăn”.

A hneăng hôp kố, Hô̆i đong Hnê ngăn kong pơlê Dak Lak hiăng pơkâ ‘na tơdroăng pơcháu chih tiêu, túa pơkâ kơxô̆ liăn ‘no pêi cheăng ing kơxô̆ liăn Tơnêi têa ƀă liăn ngân kong pơlê pêi pro Tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo a hơnăm 2024 cho vâ chê 660 rơtal liăn.

Xuân a hneăng hôp mơ’nui hơnăm 2023 dêi Hô̆i đong hnê ngăn kong pơlê Gia Lai, pôa Phạm Minh Trung – Kăn pơkuâ Khu ngăn tơmeăm khoăng tung têa, a tơnêi ƀă hyôh kong prâi kong pơlê kố pơkâ thế mâu tơring cheăm tơrŭm rĕng tơbleăng mâu hlá mơéa vâ hbru tơnêi ăm kuăn pơlê tung tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo:

‘’Na hbru tơnêi, ăm kuăn pơlê hdroâng kuăn ngo tung tơdroăng pơkâ tơnêi têa ‘na mơnhông cheăng kâ rêh ối pơlê pơla kơpong hdroâng kuăn ngo, Vi ƀan hnê ngăn kong pơlê pơcháu ăm Khu ngăn tơmeăm khoăng tung têa, a  tơnêi ƀă hyôh kong prâi tí tăng ‘nâi plĕng, hnê mơhno krê ‘na tơnêi ối. Khu hiăng ai hlá mơéa hnê mơhno krê ăm mâu tơring. Pơkâ thế mâu tơring ai túa pơkâ,chêh inâi vâ kĭ, tơbleăng”.

Ƀă hiâm mơno hbrâ rơnáu, tơdrăng, ôh tá ví, teăm châ hlo mâu tơdroăng ki xơpá, tơvâ, Kuô̆k hô̆i pơtối rơtế ƀă Chin phuh vâ tăng hlo mâu troăng hơlâ pơkâ tơtro tâ, malối cho tung pơla pêi pro 3 tơdroăng pơkâ tơnêi têa pơla hơnăm 2021 – 2025 bu ối péa hơnăm nếo cho athế pêi klêi. Hneăng hôp má 6, Kuô̆k hô̆i hneăng 15 hiăng tơbleăng Pơkâ ‘na séa ngăn pêi pro 3 tơdroăng pơkâ dêi tơnêi têa. Pôa Rơ Châm Hphik, ngế ki lo ing Gia Lai tối tiah kố:

“Pơkâ kố cho kal pêi pro tơdrêng ƀă teăm tơdrêng, gá tơtro ƀă hiâm mơno kuăn pơlê, ngăn tơdjuôm kô tŏng kum mâu tơdroăng ki kal dế xơpá tung pơla tơbleăng 3 Tơdroăng pơkâ dêi tơnêi têa”.

Kố cho rôh apoăng, môi tơdroăng séa ngăn khât tơkŭm tá 3 tơdroăng pơkâ dêi tơnêi têa ki kal dêi tơnêi têa. Tơpui a hneăng hôp, Kăn xiâm hnê ngăn Kuô̆k hô̆i Vương Đình Huệ tối nhên: séa ngăn ƀă hiâm mơno tơdrăng cho pơkâ bro ƀă tơtrâ, tung mê pơkâ pêi xuân cho tơdroăng ki vâ rêm tơdroăng cheăng rế hía rế tro tâ.

       “Kuô̆k hô̆i môi tuăn vâ Chin phuh rĕng mơjiâng, pơtroh ăm Kuô̆k hô̆i a hneăng hôp ki a chê má môi Kơxop hlá mơẻsa Pơkâ ‘na tíu pơkâ pêi mâu troăng hơlâ tŏng kum ki kal ƀă tơdroăng ki xing xoăng ăm râ tơring pơkâ inâi, pơkâ xing xoăng xúa kơxô̆ liăn tơnêi têa tơbleăng pêi pro mâu Tơdroăng pơkâ dêi tơnêi têa”.

Rơtế ƀă tơdroăng tơbleăng Pơkâ séa ngăn khât ‘na tơdroăng tơbleăng pêi pro mâu pơkâ dêi Kuô̆k hô̆i ‘na mâu Tơdroăng pơkâ dêi tơnêi têa, Kuô̆k hô̆i xuân hiăng pơcháu ăm Chin phuh pơtroh ăm Kuô̆k hô̆i tung hneăng hôp ki a chê má môi môi tơdroăng pơkâ ki kal ‘na klâ xoăng râ, xoăng hnoăng pơkuâ, pơkâ thế, kơdroh chêh bro hlá mơéa vâ teăm tŏng kum mâu tơdroăng xơpá, tơvâ, kum tơdroăng tơbleăng mâu Tơdroăng pơkâ dêi tơnêi têa châ tơƀrê, pêi klêi tro hâi khế, pro tơdroăng ki loi tơngah ƀă tơdroăng rêh ối hơniâp ro dêi kuăn pơlê.