Klêi kơ’nâi 5 hơnăm tơrŭm hbrâ, mơdât ƀă kơdroh iâ kong prâi pro ôh tá tơniăn tung kơvâ hnê hriâm ƀă hnê mơjiâng tuăn ngôa rơkê, mâu tơring tơkŭm po hên roh tơ’noăng, hneăng pơtâp, tơdroăng pêi cheăng chôu pa kong, tơmiât troh mơdêk hlê plĕng ƀă tơdroăng hbrâ ví kong prâi hơ’lêh.

Hên tơdroăng ki kal ‘na pơtâng tối hbrâ ví, kơdroh iâ kong prâi pro ôh tá tơniăn ai kơnâ hiăng châ tơkŭm po, môi tiah: roh tơ’noăng ‘’Tŏng kum plâi tơnêi – Vâi hdrêng chêh bro ngế ki khên tơnôu troh tah kong prâi pro ôh tá tơniăn”, “Chêh pro tơdroăng ki nếo ăm tơdrá hơdruê ƀă tơdroăng hơdruê tiô khôi vâi krâ nah ‘na hbrâ ví kong prâi pro ôh tá tơniăn’’, kơchuâ um pa kong ƀă dó inâi ‘’Rơtế o hbrâ, ví kong prâi pro ôh tá tơniăn – Mơjiâng tơdroăng la ngiâ krá tơniăn’’, Pơtâp hbrâ ví tơnêi tơdro a hngêi trung râ má môi Măng Deang, tơring Kon Plông, kong pơlê Kon Tum...

Pakĭng tơdroăng châ tơbrê, tơdroăng tơrŭm hbrâ ví kong prâi pro ôh tá tơniăn pơla Khu xiâm pơkuâ hnê hriâm – Hnê mơjiâng tuăn ngôa rơkê ƀă Khu xiâm pơkuâ ‘na pêi chiâk deăng mơnhông thôn pơlê xuân u ối ai mâu tơdroăng ki tá hâi tro môi tiah: ai drêng tơrŭm tá hâi teăm tơdrêng; mâu tơdroăng pêi cheăng chôu pakong ‘na hbrâ ví kong prâi pro ôh tá tơniăn tá hâi tơdâng tơ’mô pơla mâu tơring; tơdroăng hnê mơjiâng, pơtâp ăm mâu thái cô mâu hngêi trung ‘na tơkŭm po pêi cheăng chôu pa kong ‘na hbrâ ví kong prâi pro ôh tá tơniăn tá châ tơmâng, mơdêk pêi pro.