Tŏng kum tơdroăng rêh ối liăn ngân ƀă hiâm mơno ăm mâu ngế ki ai hnoăng tơnêi têa châ Jâ Việt Nam khên tơnôu inâi Nguyễn Thị Khả a thôn La Bông, cheăm Hòa Tiến, tơring Hoà Vang, Pơlê kong Đà Nẵng ai kơnốu ƀă kuăn kơnốu pơrá cho mố đô̆i ki hiăng hlâ. Hơnăm 1968, pôa ki xo jâ inâi cho Võ Văn Cảnh, hlâ tung pơla pêi dêi hnoăng cheăng a tơring Nông Sơn, kong pơlê Quảng Nam.

Troh hơnăm 1978, kuăn kơnốu inâi Võ Văn Bình drêng pêi dêi hnoăng cheăng a kong têa ê hlâ a kong têa Kul. Hơnăm kố, hiăng 84 hơnăm, nôu Nguyễn Thị Khả drêng pâ drêng ôh.

Hbrâ vâ tơbâ hâi Mố đô̆i rong râ, hlâ hía (27/7 kố), châ khu kăn pơkuâ ngăn Đảng, khu kăn pơkuâ troh pôu, jâ Khả hlo hơtô tung hiâm mơno:

“Kơnốu ƀă kuăn hlâ tâi xuân sĭng khéa, la xuân kơnôm Tơnêi têa tơmâng ngăn troh rơpŏng á mê á hiăng chía piu iâ tơdroăng khéa mê. Hâi lơ 27/7 rêm hơnăm châ Khu ngăn vâi kơdrâi ƀă khu kăn pơkuâ troh pôu kơ-êng nôu. Hlo Tơnêi têa tơmâng ngăn troh rơpŏng mê á hlo phiu ro khât”.

To hâi kố, rơpŏng pôa Ngô Văn Hồng, a cheăm Hòa Bắc, tơring Hòa Vang, pơlê kong kân Đà Nẵng phiu ro drêng mot ối tung hngêi ki nếo. Hơnăm 1966, pôa Hồng bro yu kit tro xâ pĕng tro rong. Nôkố, pôa cho mố đô̆i tro rong râ 4/4. Tơdroăng rêh ối xơpá, rơpŏng tá hâi tơmiât troh tơdroăng ki bro hngêi ối. Apoăng hơnăm kố, pôa Ngô Văn Hồng châ khu kăn pơkuâ pơlê kong kân Đà Nẵng kum 60 rơtuh liăn, pôa mung tơ’nôm nếo bro môi toăng hngêi ki kâk:

“Á cho mố đô̆i tro rong, Tơnêi têa xuân tŏng kum liăn rêm khế. Pơla hdrối kố nah, Tơnêi têa tơmâng ngăn tŏng kum liăn bro hngêi, rơxông á hơniâp ro khât, sap ing nôkố troh xo ah hmôi ôh tá xâu kong mê khía mơhot xếo xua hiăng ai hngêi ối”.

Pơlê kong kân Đà Nẵng nôkố ai lối 100 rơpâu ngế ki ai hnoăng ƀă kăch măng. Ing kơxô̆ liăn ‘no kum dêi Tơnêi têa, liăn ngân pơlê kong kân, mâu khu ki ai hiâm mơno hơ-ui, khu mơdró kâ veăng tơlo, troh nôkố, pơlê kong kân kố hiăng bro nếo ƀă rơnêu lối 10 rơpâu toăng hngêi diâp ăm ngế ki ai hnoăng, tâi tâng kơxô̆ liăn ‘no vâ chê 330 rơtal liăn.

Pôa Lê Văn Minh, kăn phŏ pơkuâ Khu ngăn cheăng pêi mố đô̆i tro rong ƀă rêh ối pơlê pơla pơlê kong kân Đà Nẵng ăm ‘nâi” hdrối nah, kơlo liăn kum bro hngêi cho sap ing 30 troh 40 rơtuh liăn mê nôkố hiăng tâk troh 60 rơtuh liăn tung môi toăng, a hngêi ki ‘nâ châ kum tâi 100 rơtuh, bro hngêi ối krá kâk, vâ kong mê hngê ôh tá kơchoh xếo.

“Troăng tŏng kum rơpŏng ai hnoăng xơpá, malối cho rơpŏng kơtiê, pơlê kong kân đi đo tơmâng ngăn ƀă hnê mơhno ăm mâu tơring, cheăm kơjo kum khât. Bro tiah lâi kơlo rêh ối dêi mâu rơpŏng ai hnoăng iâ hlái athế tơ’mô lơ hên tâ kơlo rêh tiah hmâ a kơpong tíu rêh ối.

Pơlê kong kân séa ngăn tiô troăng hnê mơhno dêi Tơnêi têa mơdêk kơlo tŏng kum bro nếo. Tơdroăng ki tŏng kum bro hngêi nếo xuân môi tiah rơnêu hngêi ton ăm rơpŏng ngế ki ai hnoăng cho pơxúa khât, bro tơ’lêi hlâu ăm ngế ki ai hnoăng ai tíu ối lĕm ƀă krúa”.