2 hơnăm hdrối nah, kơdrum pêt loăng yâu ƀok rơdâ hâi teăm châ 1.000m2 dêi rơpŏng hngêi đảng viên Cil Pam Ka Duyên, ối a thôn Dà Tro, cheăm Dà Nhim, tơring Lạc Dương (kong pơlê Lâm Đồng) hiăng chiâng tíu ki mơhno túa pêi cheăng tơƀrê dêi kuăn pơlê tung cheăm, troh tăng ‘nâi plĕng, vâ hriâm pêi ƀối. Đảng viên Chil Pam Ka Duyên ăm ‘nâi, ai ngế ki tơdrăng khât, tơdroăng cheăng pêi khât mê tơdroăng cheăng hnê tối, mơhnhôk mâu troăng cheăng pêi, troăng pêi dêi Đảng, luât pơkâ dêi tơnêi têa nếo pro pơxúa tơƀrê, kuăn pơlê nếo hriâm pêi ƀối:

“Drêng chiâng đảng viên, á ai rôh châ hriâm vâ hlê nhên tâ ‘na mâu troăng rơhlâ dêi Đảng, luât tơnêi têa. Kơnôm ing mê, á nếo châ pêi tro tơdroăng cheăng ki Đảng ủy, mâu kăn pơcháu. Ƀă xuân ing mê, á châ kum kuăn pơlê pin hên tâ. Mê cho, mơhnhôk, hnê kuăn pơlê pơ’lêh hdrê loăng pêt, mơ-eăm pêt tơ’nôm hdrê loăng iâ khế vâ mơnhông cheăng kâ tung rơpŏng hngêi. Nôkố tơdroăng rêh ối pá puât dêi kuăn pơlê hdroâng kuăn ngo a kố hiăng kơdroh hên tâng vâ pơchông ƀă hdrối nah’’.

Ôh tá xê to đảng viên Cil Pam Ka Duyên, hên đảng viên ki ê cho kuăn ngo dêi cheăm Dà Nhim xuân hlê hnoăng cheăng pêi tơná tung tŭm tơdroăng cheăng. Tung mê, vâ tối cho mâu tơdroăng pơ’lêh hdrê loăng pêt, kum hnê dêi rơpó mơnhông pêi chiâk, kum dêi rơpó hâi pêi cheăng, veăng kum hdrê pêt, hnê kih thuât pêt rak ngăn ƀă hên ki ê. Kơnôm ing mê, pêi chiâk deăng dêi cheăm Dà Nhim hiăng hlo hên túa cheăng pơ’lêh hdrê pêt, chôa lâng mơnhông tiô inâi tơhrâ vâ rôe tơmeăm ƀă mơdêk pêt hdrê loăng plâi ki pơxúa pê lo liăn.

Ing apoăng pêt kơphế, troh nôkố, Dà Nhim hiăng po rơdâ 16ha pêt loăng pơkeăng Atiso, 6ha yâu ƀok, 40 ha reăng vâ tê tơkâng, 300 ha kơchâi prá tŭm túa ƀă lối 330 ha loăng plâi kâ. Kơxô̆ rơpŏng kơtiê xuân kơdroh hên, nôkố bú ối 7% tiô pơkâ ki nếo. Đảng viên Chil Pam Ka Phương, kăn thôn Dàrahoa, cheăm Dà Nhim, ăm ‘nâi:

“Ngin hnê mơhnhôk ăm mâu rơpŏng kuăn ngo tung thôn thế mơ-eăm kơhnâ mơnhông cheăng kâ-rêh ối. Sap ing nah hdrê loăng pêt ki xiâm dêi kuăn pơlê cho kơphế, nôkố hnê kuăn pơlê pơ’lêh hdrê pêt tiô troăng rơhlâ môi tiah pêt kơchâi hơpê, plâi tơmât, mâu prá tŭm túa vâ mơnhông rế tơƀrê’’.

 Đảng bộ cheăm Dà Nhim ai tâi tâng 122 ngế đảng viên, rêh ối a 10 to chi ƀô̆, tung mê ai đảng viên cho mâu kuăn ngo châ 52%. Tiô pôa Kon Sơ Ha Vương, Kăn hnê ngăn Vi ƀan Măt trâ̆n cheăm Dà Nhim rơtế ƀă tơdroăng pêi cheăng kâ, hnoăng cheăng pêi ahdrối, djâ troăng lĕm a hdrối rêm ngế đảng viên hiăng châ pơtối rak vế pêi pro tung hên tơdroăng cheăng, malối cho tung tơdroăng rơtế mơjiâng thôn pơlê nếo, xăm kơtiê krá tơniăn ton, môi tuăn dêi rơpó hdroâng kuăn ngo, mơjiâng tơdroăng kal kí rơdêi:

“’Pêi pro tiô troăng rơhlâ dêi Đảng ƀă luât Tơnêi têa, tung mâu hơnăm hdrối, Đảng ủy, mâu kăn hiăng hnê tối ăm kuăn pơlê pêi tro tơdroăng mơjiâng thôn pơlê nếo. Ƀă troăng rơhlâ pơkâ tơnêi têa ƀă kuăn pơlê rơtế pêi, hên troăng prôk, kông, troăng cho mơ’no têa hiăng châ mơjiâng pro lĕm. Tơdrêng ƀă cheăng kâ tơniăn, tơdroăng rêh ối, tơmeăm khoăng ƀă tuăn ngôa dêi kuăn pơlê hiăng hlê plĕng tâ’’.

Pơtối rak vế pêi pro hnoăng cheăng dêi đảng viên tung kơpong hdroâng kuăn ngo, pêi ai pơxúa mâu tơdroăng cheăng xua pơlê cheăm, tơring mơhnhôk pêi, tơdroăng cheăng kâ rêh ối a cheăm Dà Nhim hiăng pơ’lêh tơ-ê ƀă dế pơtối mơnhông mơdêk tơrêm hâi.