Tơdrốu khế apoăng hơnăm 2023, Tíu xiâm ngăn ‘na mơdró kâ cheăng pêi Dak Lak pơtối xo 6.000 hồ sơ pâ thế châ xúa liăn ƀaoh hiêm ôh tá ai cheăng pêi, tâk 165 hồ sơ tâng vâ pơchông ƀă rôh kố dêi hơnăm 2022. Tung tâi tâng kơxô̆ 6.000 ngế nâp hồ sơ pâ châ kâ liăn ƀaoh hiêm ôh tá ai cheăng pêi, ai 4.200 ngế pêi cheăng a mâu kong pơlê ki ê, 1.800 ngế pêi cheăng tung kong pơlê.

Tíu xiâm mơhno tăng cheăng pêi Dak Lak hiăng mơnhên hồ sơ ƀă tối ăm mâu kơ koan râ kơpoêng pơkâ 5.700 tơdroăng pơkâ ăm châ kâ liăn kơjo kum ôh tá ai cheăng pêi, ƀă kơxô̆ liăn vâ ăm 90 rơtal liăn.

Pôa Nguyễn Văn Cường, Kăn phŏ pơkuâ Tíu xiâm mơhno tăng cheăng pêi Dak Lak ăm ‘nâi, tíu pêi cheăng hiăng tơrŭm ƀă mâu kơ koan Ƀaoh hiêm pơlê pơla vâ tơleăng mơnhên teăm mâu tơdroăng xơpá, tơvâ tơvân tung pêi pro tiô luât  pơkâ tŏng kum ƀaoh hiêm ôh tá ai cheăng pêi, tơniăn hnoăng ki pơxúa dêi mơngế pêi cheăng. Tơdrêng amê, Tíu xiâm mơhno tăng cheăng pêi, mơhno ‘na tơdroăng hriâm cheăng ăm mơngế vâ pêi cheăng vâ vâi rĕng châ tăng xêh tơdroăng cheăng pêi ki tơtro ƀă tơná.