Pơxiâm tơbleăng tơdroăng ‘’Tâp trăng trâ eăng troăng pơlê’’ sap mơ’nui hơnăm 2016 troh nôkố, khu hơnăm ối nếo chĕn ‘na on tơhrik Dak Lak hiăng trâp trăng krâ ‘măn tê kơtê pul on tâi tâng a 62 km troăng ai on trâ eăng, 56 to pul on hrik ing on tơhrik mâ hâi ăm mâu kơpong tung thôn, tíu tơkăng kong dêi kong pơlê. Tâi tâng ki kơnâ nôkố ai lối 1,4 rơtal liăn. Pơtối pêi pro tơdroăng ki pơxúa hiăng ai, hơnăm 2023, Đoân Droh rơtăm cheăng a khu ngăn on tơhrik Dak Lak pơtối tâp trăng krâ pul on ăm trâ eăng troăng pơlê a tơdroăng tơ’noăng ƀă pơcháu tơdroăng cheăng nhên ăm mâu tíu pêi cheăng.

Mâu khế apoăng hơnăm kố, mâu tíu pêi cheăng hiăng tơrŭm ƀă pêi pro hên tơmeăm khoăng tâp trăng krâ pul on trâ eăng troăng pơlê a Pơlê Droh rơtăm pêi cheăng (cheăm Ia Lôp, tơring Ea Súp), thôn Đồi Đá (cheăm Krông Ƀuk, tơring Krông Pač); ƀuôn Ga, cheăm Ea Kmút), ƀuôn Ea Knốp (cheăm Čư Ni) ƀă mâu thôn 1, 2 , 3 (cheăm Xuân Phú) xuân cho tơring Ea Kar.

Krê tung khế 3, cho khế droh rơtăm hơnăm 2023, kơvâ ngăn on tơhrik hiăng pêi 2 tơmeăm khoăng on trâ eăng troăng thôn pơlê a thôn 1, thôn 2, (cheăm Bình Hòa, tơring Krông Ana) ƀă cheăm Khuê Ngọc Điền, tơring Krông Bông. Mâu tơmeăm khoăng “Tâp tăng krâ pul on tơhrik trâ eăng troăng pơlê” ai pơxúa khât ôh tá xê to pơxúa ăm prôk lăm dêi kuăn pơlê, mê ối pro tơniăn  drêng prôk drô troăng.