Tung pơla 5 hâi, sap ing hâi lơ 26 troh lơ 30 khế 6, ai lối 200 ngế kăn ƀô̆, mơngế pêi cheăng pơkuâ dêi kong pơlê Dak Lak hiăng veăng hriâm cheăng hnê mơhnhôk, xua Khu kăn ngăn ‘na cheăng kăn ƀô̆ kong pơlê Dak Lak tơrŭm ƀă Tíu xiâm hnê hriâm kuăn mơngế dêi Pơlê kong kân Đà Nẵng tơkŭm po. Tung 5 hâi hriâm, mâu ngế ki châ hriâm mê hiăng châ hlê plĕng hên tơdroăng, mê cho tơdroăng Pơkâ dêi Đảng ƀă Tơnêi têa ‘na hnê mơhnhôk tung chal nếo, Tối tơbleăng tŭm têk mâu tơdroăng ki xiâm dêi Luât pêi pro tiô tuăn hiâm mơno kuăn pơlê pói  vâ a pơlê cheăm (ki xêt khât sap ing hâi lơ 1/7/2023).

Hnoăng cheăng hnê mơhnhôk mơjiâng thôn pơlê nếo, tơdroăng mơjiâng kơphô̆ ki hloh hlê rơkê plĕng, Pơtối mơdêk hnoăng cheăng, tơdroăng pôu râng tơdroăng cheăng dêi Khu lăm séa ngăn ‘no liăn mơjiâng pro tơmeăm khoăng a pơlê pơla. A lâm hnê hriâm mê, kăn ƀô̆ rêm râ a kong pơlê Dak Lak ối mơdoh chôu phut vâ tơpui tơno ‘na tơdroăng ki ai păng ‘nâng, vêh ‘mâi hnê tơ’nôm tơdroăng ki nếo, ki hlê plĕng, mơnhên mâu tơdroăng ki xiâm, ki kal dêi hnoăng hnê mơhnhôk tơtro ƀă tơrêm pơlê cheăm.