Drêng tơbâ 76 hơnăm Hâi Mố đô̆i rong râ - hlâ hía lơ 27/7, Vi ƀan hnê ngăn kong pơlê Dak Lak hiăng ‘măn kơxô̆ liăn lối 6 rơtal vâ hbru tơmeăm ăm mâu rơpŏng ki ai hnoăng tơnêi têa. Tiah mê, kong pơlê Dak Lak kô ‘no a kơlo 400 rơpâu liăn vâ kum ăm môi ngế, tung mê, kum lối 13.600 ngế ki ai hnoăng; kơlo 500 rơpâu liăn tung môi rơpŏng ăm 591 rơpŏng Jâ Nôu Việt Nam khên tơnôu hiăng hlâ; ‘no 1 rơtuh 200 rơpâu liăn môi ngế ăm 118 ngế krê ki ai hnoăng rơkê.

Pakĭng mê, kong pơlê ối ‘măn 15 rơtuh liăn vâ pôu, hbru tơmeăm ăm 3 Tíu xiâm pơlât mố đô̆i tro rong, tamo châi ki râ ƀă Tíu xiâm pơlât mâu ngế ai hnoăng a Bà Rịa – Vũng Tàu, Pơlê kong kân Đà Nẵng ƀă kong pơlê Dak Lak. Drêng kố, kăn pơkuâ kong pơlê Dak Lak kô pơkâ thế mâu khu ki lăm pôu ƀă hbru tơmeăm ăm Jâ Nôu Việt Nam khên tơnôu, mâu rơpŏng ki ai hnoăng kơhnâ rơkê, kơlo liăn roê tơmeăm ăm mâu ngế ki kố cho 2 rơtuh 500 rơpâu liăn. Mâu tơdroăng ki lăm troh a ilâng kiâ mố đô̆i, tâp nhang pâ mơnê xuân châ tơbleăng po a lâp kong pơlê.