A tơring Ea Kar, Khu pơkuâ ngăn Đoân Droh rơtăm Dak Lak tơkŭm po leh lăm pêi hnoăng cheăng dêi khu droh rơtăm pleăng hnoăng cheăng a rơnó pơtê hriâm hơnăm 2023 ƀă hên tơdroăng pêi tơƀrê. Pơxá Hơnăm ối nếo Dak Lak tơdjuôm ivá xúa kŏng ngê̆ kơxô̆ tung mơjiâng thôn pơlê nếo ƀă kơphô̆ rơkê plĕng, Tơdroăng Droh rơtăm lăm pleăng hnoăng cheăng a rơnó pơtê hriâm hơnăm kố châ Khu pơkuâ ngăn Đoân Droh rơtăm Dak Lak tơbleăng sap ing khế 4 troh tâi khế 10 ƀă 5 tơdroăng ki kân: Veăng kum rơnó tơ’noăng, Rơnó pơtê hriâm ngiât lĕm, Reăng phươ̆ng khêi, Rơnó pơtê  pleăng mơheăm ƀă lăm pêi cheăng pro lĕm krúa pơlê pơla.

A rôh leh pơxiâm lăm pêi cheăng, Khu pơkuâ ngăn Đoân Droh rơtăm kong pơlê ƀă mâu tíu pêi cheăng veăng kum diâp kơxô̆ liăn vâ mơjiâng Hngêi tuăn pâ, ăm liăn vâ pơxiâm pêi cheăng, hbru tơmeăm ƀă liăn hriâm ăm mâu vâi o ƀă mâu rơpŏng ki ai hnoăng tơnêi têa kơtiê ƀă rơpŏng kơtiê xơpá ƀă tâi tâng kơxô̆ liăn lối 700 rơtuh liăn.

Tơdrêng amê, a 15 tơring, pơlê krâm tung kong pơlê, rêm râ pơkuâ ngăn Đoân Droh rơtăm xuân rơtế tơkŭm po tơbleăng lo lăm pêi cheăng ƀă 75 tơmeăm khoăng, tơdroăng cheăng pêi dêi khu droh rơtăm. Tâi tâng ki pơxúa mâu tơdroăng cheăng mê lối 2,1 rơtal liăn.