Tung 6 khế apoăng hơnăm, Khu lo tŏng veăng kong pơlê Dak Lak hiăng mơhnhôk tơlo châ lối 51,5 rơtal liăn vâ tơbleăng ăm hnoăng cheăng tŏng kum pơlê pơla ƀă hên tơdroăng cheăng pêi ki pơxúa tơƀrê. Ki nhên, tơbleăng tơdroăng Têt Hơ-ui kum hơnăm 2023, Khu lo tŏng veăng hiăng mơhnhôk tơlo châ lối 71 rơpâu kơxuô tơmeăm ăm rơpŏng kơtiê, rơpŏng ki malối xơpá, mâu ngế ki tro trếo ‘mêi dioxin, mâu ngế ki chó chêng, tơvê kŏng.

Mơjiâng pro 9 to kế tơmeăm, kum 553 tíu ki tŏng kum ai hiâm mơno lĕm ƀă lối chât rơpâu ngế kơtiê tung Khế tŏng kum tơmeăm. Rak vế mâu túa pơkâ hơpiâp on, rôh kâ hmê tê kơtê kum mâu kơtiê a mâu hngêi pơkeăng. Jâ A Yun H’Hương, Kăn hnê ngăn Khu lo tŏng veăng kong pơlê Dak Lak ăm ‘nâi, tung la ngiâ ah, Khu kô pơtối tơtrŏng tơbleăng mâu tơdroăng tơtro ƀă tơdroăng mơhnhôk “Rêm khu tơrŭm, rêm ngế krê kum môi to tíu ki tŏng kum”, thăm mơdêk tơdroăng ki mơhnhôk tơlo liăn vâ rak vế mâu tơdroăng pêi pro a mâu cheăm tơring.