Klêi mê, pơkâ pêi troh hơnăm 2030 (tối cho tơdroăng tơkêa bro 06) dêi Chin phuh kơnâ kal khât tung tơdroăng tơdjêp tơdroăng ki kal, pêi cheăng châ tơƀrê mâu hnoăng cheăng kâ – rêh ối pơlê pơla, tơmiât troh pơkâ xiâm kuăn pơlê bu tơbleăng tơdroăng môi xôh ƀă kơ koan tơnêi têa tung pro mâu hlá mơ-éa.

Xua mê, tung pơla kố nah, kong pơlê Dak Lak kơnôm tơdroăng pơkuâ ngăn, tŏng kum dêi Đảng tung thâ rĕng pêi kêi Tơdroăng Tơkêa bro 06 dêi Chin phuh, ing mê mơjiâng tơdroăng ki tơdâng tơ’mô, châ tơƀrê tung pêi pro mâu hlá mơ-éa.

Pôa Huỳnh Văn Ánh, cheăm Phú Lộc, tơring Krông Năng, kong pơlê Dak Lak  tro kơ tuăn drêng pêi pro mâu hlá mơ-éa tiô troăng hyôh internet a môi tíu môi tíu pêi cheăng, rĕng tơ ‘lêi dêi cheăm. Ôh tá xê nâp to chêh pro hlá mơ-éa pơtroh tiô troăng hyôh internet mê mối rah xo tơdroăng nâp liăn ing troăng hyôh ăm hngêi rak liăn ƀă điê̆n tưh.

Pôa Huỳnh Văn Ánh ăm ‘nâi:

“Á ôh tá êa lăm pro hlá mơ-éa nâp theh ƀaoh hiêm lơ ôh tá eâ pro hlá mơ-éa pâ mah kơxô̆ định danh a kŏng an. Vâi pơchân hâi ki lâi mê a lăm troh xo mâu tơdroăng ki hiăng pro 2 tung pái túa hlá mơ-éa ki pro. ‘Na liăn nâp xuân tiah mê, a ai mah kơxô̆ mê a quét ‘nâ á pơtroh liăn ăm peăng ki mê gá tơ’lêi hlâu tê ƀă hlối rĕng há’’.

‘Na pôa Nguyễn Ngọc Anh, cheăm Hoà An, tơring Krông Păč, kong pơlê Dak Lak klêi châ mâu pú tung tôh pêi Tơdroăng tơkêa pro 06 dêi cheăm hnê tối, pôa ăm hlo ki pơxúa drêng xúa tài khoản định danh điê̆n tưh, môi tiah: Kơdĭng chôu, kơxô̆ liăn ‘no prôk lăm xua ôh tă êa chêh hên túa hlá mơ-éa, kơdroh hên tơdroăng pro hlá mơ-éa drêng nâp liăn, kố cho teăng căn cước công dân ƀă mâu túa hlá mơ-éa drêng tơdroăng chêh hiăng mơhno a định danh điê̆n tưh tơnêi têa môi tiah: ƀâng vế rơxế, ƀaoh hiêm khăm pơlât…

Pôa Nguyễn Ngọc Anh hiăng ôh tá xâu chêh inâi pro:

“Pơ’lêh kơxô̆, cài đặt định danh điê̆n tưh kố cho hnoăng ki pơxúa kân ăm kuăn pơlê mê mâu kơvâ cheăng khu dêi cheăm, tơring tơmâng khât troh tơrêm rơpŏng hngêi kum kuăn pơlê ngin hlê ti lâi cho cài đặt mah định danh điê̆n tưh gá tơ’lêi hlâu vâ pơxúa ăm kuăn pơlê tung tơdroăng pro hlá mơ-éa xuân môi tiah nâp liăn mê kuăn pơlê ngin tâ ro’’. 

Tơdroăng tơkêa bro 06 dêi Chin phuh tơdjâk kân rơdâ, veăng mơdêk ki tơƀrê dêi tơdroăng rak ngăn tơnêi têa tung hên kơvâ cheăng. Ƀă hnoăng cheăng xuân tung pêi tơdroăng tơkêa bro 06, tung pơla hdrối kô hía nah, mâu kŏng an kong pơlê Dak Lak hiăng mơ-eăm tung tơdroăng tơbleăng pêi, tơkŭm tơdah xo tơdroăng pro hlá mơ-éa, mơhnhôk kuăn pơlê pro căn cước, mơdêk tơdroăng rak tơniăn, pêi klêi mâu tơdroăng pơkâ pro krúa mâu tơdroăng chêh ‘mot tung kơmăi.

Trung tă Trần Văn Dũng, kŏng an cheăm Hoà An, tơring Krông Pač, kong pơlê Dak Lak ăm ‘nâi.

“Kŏng an cheăm tơrŭm ƀă mâu kơvâ cheăng lăm troh a mâu pơlê lăm cài đặt định danh điê̆n tưh kơlo 1 ăm kuăn pơlê ƀă xuân tơrŭm ƀă khu rak ngăn hlá mơ-éa cài đặt pro định danh điê̆n tưh kơlo 2. Ing tơdroăng pro mê kuăn pơlê tơmâng khât vâ môi tuăn ‘na cài đặt định danh điê̆n tưh ƀă kuăn pơlê’’.

Vâ mơdêk hnoăng cheăng pêi dêi mâu Đảng rêm râ tung tơbleăng tơdroăng tơkêa bro 06, hâi lơ 20/3/2023, Khu pơkuâ hnê ngăn Đảng kong pơlê Dak Lak pơkâ kơxô̆ 33 ‘na mơdêk hnoăng cheăng pơkuâ hnê mơhno dêi mâu râ Đảng tung mơdêk tơbleăng Tơdroăng tơkêa bro xúa tơdroăng chêh tung kơmăi ‘na kuăn pơlê, định danh ƀă mơnhên điê̆n tưh tung xúa hơ’lêh kơô̆ dêi tơnêi têa pơla hơnăm 2022 - 2025, tơmiât mâu tơdroăng vâ pêi troh hơnăm 2030 tung kong pơlê.

Sap ing tơdroăng pơkâ mê, Vi ƀan hnê ngăn kong pơlê Dak Lak pơkâ hên tơdroăng pơkâ vâ tơbleăng tơdroăng tơkêa bro. Hlối hnê mơhno mâu tíu pêi cheăng kơvâ cheăng mơjiâng pro vâ chê 2.400 tôh pêi cheăng tơbleăng tơdroăng Tơkêa bro 06 sap kong pơlê troh mâu thôn pơlê, tôh kơphô̆. Troh nôkố, kong pơlê Dak Lak hiăng klêi pro 2,1 rơtuh tơdroăng tối ‘na kuăn pơlê chêh ‘mot tung kơmăi ‘măn rak dêi tơnêi têa ‘na kuăn pơlê, pơtối rak vế ƀă tí tăng pêi ai pơxúa ăm tơnêi têa ‘na tơdroăng rak ngăn kring tơniăn a pơlê cheăm bêng.

Tung mê, hiăng ăm lối 1,6 rơtuh theh căn cước kuăn pơlê ai krâ chíp điê̆n tưh ăm kuăn pơlê, tơdah xo lối 500 rơpâu tài khoăn đinh danh điê̆n tưh a kơlo 1 ƀă 2. Kơmăi tơdah tơdroăng pro hlá mơ-éa dêi kong pơlê xuân hiăng châ tơdjêp ƀă tíu chêh ‘măn mâu tơdroăng tung kơmăi dêi tơnêi têa ‘na kuăn pơlê, tơbleăng tơdroăng pro hlá mơ-éa tiô troăng hyôh a kơlo 3, kơlo 4 châ tơmâng mơdêk, malối cho 25 tơdroăng chêh nâp tơdroăng ki kal dêi tơdroăng Tơkêa bro 06 veăng mơdêk tơƀrê pơxúa tung rak ngăn tơdroăng pro hlá mơ-éa tung kơmăi ăm kuăn pơlê.

Thiê̆u tươ̆ng Lê Vinh Quy, Ngế pơkuâ xiâm kŏng an kong pơlê Dak Lak, tôh phŏ pơkuâ Tôh pêi cheăng dêi tơdroăng tơkêa bro 06 râ kong pơlê ăm ‘nâi.

“Kố cho tơdroăng tơkêa bro dêi Chin phuh tơdroăng tơbleăng pêi thế veăng ai rêm râ kăn mâu kơvâ cheăng veăng môi tuăn dêi tâi tâng kuăn pơlê. Tung mê, mâu kŏng an cho xiâm, cho mâu ki pêi cheăng, tơkâ luâ tơdroăng tuăn tơmiât ôh tá tro, xiâm mâu tơdroăng. Tâi tâng thế hnê tơpui ‘na tơdroăng pơxúa tung la ngiâ ki pơxúa tơjuôm cho pro tơ’lêi hlâu má môi ăm kuăn pơlê ƀă khu mơdró hlo ki pơxúa má môi ăm kuăn pơlê ƀă khu mơdró.

Má péa kơhnâ hnê tối vâ kuăn pơlê ƀă khu mơdró hlo ki pơxúa dêi tơdroăng Tơkêa bro 06 chôa lâng pêi klêi túa lĕm tro kuăn pơlê kơxô̆,  rêh ối kơxô̆’’.

Ƀă tơdroăng hnê mơhno sap râ ủy Đảng, ƀă hnối kơtăng tung pêi pro mâu tơdroăng cheăng dêi mâu kăn, mâu tơdroăng hiăng klêi pêi apoăng tung tơbleăng pêi tơdroăng tơkêa bro 06 a kong pơlê Dak Lak  hiăng pro ki xiâm tro luât ăm tơdroăng mơdêk pêi tơƀrê tơdroăng pro hlá mơ-éa dêi tơnêi têa tiô troăng hyôh.

Ing mê veăng  mơdêk ki tơƀrê rak ngăn tơnêi têa pro tơ’lêi hlâu ăm kuăn pơlê ƀă khu mơdró tung mơnhông cheăng kâ rêh ối ƀă pro pơxúa tơdroăng pơ’lêh kơxô̆ dêi tơnêi têa.