Tiô pơkâ hơnăm 2023, kong pơlê Dak Lak kô xo liăn ngân lối 5.660 rơtal liăn cho kơxô̆ liăn ‘no vâ mơjiâng tơmeăm khoăng tơnêi têa. Riên troh mơ’nui khế 10, kong pơlê Dak lak hiăng xo lối 2 rơpâu 600 rơtal liăn, châ lối 48% tiô pơkâ tung hơnăm, tâk 17%  tâng vâ pơchông ƀă hơnăm hdrối. Tung mê, kơxô̆ liăn ngân xiâm tơnêi têa châ 42,5% ƀă kong pơlê ai 56,8% tiô pơkâ.

A rôh hôp, Kăn hnê ngăn Vi ƀan kong pơlê Dak Lak pơkâ thế mâu tíu pêi cheăng, kơvâ cheăng, Vi ƀan mâu tơring, pơlê kong krâm, pơlê kong kơdrâm mơdêk hnoăng cheăng séa ngăn vâ châ ‘nâi  teăm  tŏng kum amâu tơdroăng ki xơ pá tah tơvâ tơvân ăm tơdroăng tơkêa bro, mơjiâng tơmeăm khoăng.

Vâ pê klêi pơkâ liăn ngân lối 5 rơpâu 660 rơtal liăn kơxô̆ liăn ăm mơjiâng tơmeăm khoăng tung hơnăm kố, pôa Đinh Xuân Hà, Ngế pơkuâ Khu xiâm ngăn tơdroăng pơkâ - ‘no liăn cheăng kong pơlê Dak Lak ăm ‘nâi, nôkố, kơvâ cheăng, khu pơkuâ ‘no liăn cheăng kong pơlê dế pơtối pêi mâu troăng rơhlâ mơdêk rĕng tơdroăng xo liăn ngân kơxô̆ liăn ‘no mơjiâng tơmeăm khoăng.