Prếo a hngêi kơ’nâi 5 hâi lăm pơtê rak ivá a Tíu xiâm pơlât ngăn mâu ngế ai hnoăng dêi kong pơlê Dak Lak, Y Siêng Niê, ngế lêng tro rong nah, ƀuôn Chiêng Kao, cheăm Dak Phơi, tơring Lăk xuân ối hên hĭn tơdroăng tơmiât chiâng rơrêk tung hiâm mơno:

“Lăm tâ ro ‘nâng, kâ ôu kế kơhiâm, vâi pơlât ngăn krâu. Kong pơlê Nghệ An xuân ai há, kong pơlê Sóc Trăng xuân ai, tơring Ea Kar kố, tơring Ƀuôn Đôn mê, tơring Ea Súp kố, tơring Čư̆ Kuin ai há rơtế ƀă dêi rơpó hơdruê tơdroăng “Năm anh em cùng một chiếng xe tăng’’. Klêi mê hơdruê tơdroăng ‘’Nổi lửa lên em”, ro llêi, kơmăng ki lâi xuân hơdruê, hơ’muăn tối tơdroăng roh ton nah, a kố a lăm plâ, a tá a pĕng. Kơhâi lăm hêi lâp pơlê kong kơdrâm Ƀuôn Ma Thuột”. 

Tung hngêi nếo mơjiâng pro, ngoh Mực Liêng, kuăn kơnốu dêi Y Hiên Ông, ối a ƀuôn Sruông, cheăm Ƀông Krang, tơring Lăk ăm ‘nâi, ôh tá tô tuăn xâu kong tô kong mêi mê tung tuăn tơniăn ƀă ivá ngoh ối mo lĕm hên tâ, rơpŏng hngêi xuân hmiân tuăn pêi cheăng kâ, mơnhông cheăng kâ châ tơƀrê:

“Pâ á ai hnoăng ƀă kăch măng ƀă pâ á châ tơnêi têa kơjo kum ăm kâ môi khế 3 rơtuh liăn ƀă tơnêi têa ối kơjo kum tơ’nôm 50 rơtuh liăn, rơpŏng hngêi mung tơ’nôm nếo vâ pro hngêi ăm pâ. Kơnôm ai tơnêi têa veăng kum liăn ngân vâ ăm pôa kâ rêm hâi xuân châ kum pơlât ivá mo lĕm tâ. A mơnê kơ mâu kăn  cheăm, tơring hiăng lăm pôu hơlêm hlối hbru tơmeăm ăm pâ á’’.

Tiô jâ Phạm Thị Lệ Vân, Ƀơrô ngăn mô đô̆i tro rong ƀă rêh ối pơlê pơla tơring Lăk, tâi tâng 1.489 ngế tung rơpŏng hngêi ki ai hnoăng, mơngế ai hnoăng tơnêi têa ối a tơring xuân hiăng châ tơmâng tŏng kum ƀă ai kơlo liăn kâ tơ ‘mô lơ hên tâ kơlo ki dâ dâk. Nôkố tơring dế tơkŭm veăng kum vâ pôi tá ai xếo rơpŏng ki lâi rêh ối pá puât’’.

“Ƀă tơring Lăk tơdroăng cheăng hnê tối ƀă  ăm kơxô̆ liăn kơjo kum ăm mơngế krâu khât teăm tơdrêng, la xuân ối 12 rơpŏng ai 6 ngế tung rơpŏng kơtiê. Vâ mơ-eăm ăm 12 rơpŏng ki mê hluăn ing kơtiê mê bro hlá mơ-éa tối tơbleăng ‘na Khu xiâm ngăn cheăng pêi mê xuân ai pơkâ ngăn tiô kơ tơdroăng rêh ối dêi rơpŏng hngêi mê veăng kum pro hngêi, tâng ai hngêi kô kơjo kum ăm ro lơ hdrê pêt lơ kơjo kum pro ăm hlá mơ-éa kơdĭng liăn’’.

Tiô Khu xiâm ngăn cheăng pêi mối đô̆i rong ƀă pơlê pơla kong pơlê Dak Lak, nôkố lâp tung kong pơlê ai lối 45.500 ngế ai hnoăng ƀă kăch măng, tung mê ki hên 10.000 ngế dế châ kâ kơxô̆ liăn tŏng kum rêm khế. Tung mâu hơnăm hdrối, mâu tơdroăng tŏng kum ăm mơngế ki ai hnoăng ƀă rơpŏng hngêi ai hnoăng tơnêi têa đi đo châ kong pơlê Dak Lak tơmâng tro tơdroăng. Krê tung hơnăm kố, kong pơlê hiăng tơkŭm po hên rôh vâ chê 400 ngế ai hnoăng lăm pơtê ối a tíu tơdjuôm pú hên, lăm ôm hyô; pêi pro tơdroăng lăm pôu, hbru tơmeăm ăm mâu ngế ai hnoăng ƀă tơnêi têa  tâi tâng kơxô̆ liăn lối 15 rơtal liăn. Drêng troh tơbâ hâi lơ 27/7 hơnăm kố, kong pơlê xuân ‘măn kơdĭng lối 6 rơtal liăn vâ tơmâng tŏng kum ăm mâu ngế ai hnoăng tơnêi têa ƀă rơpŏng ai hnoăng tơnêi têa ki kơtiê.

Mơhé ti mê, pôa Nguyễn Quang Thuân, kăn phŏ pơkuâ Khu xiâm ngăn cheăng pêi - Mô đô̆i rong ƀă pơlê pơla kong pơlê Dak Lak ăm ‘nâi, riân troh mơ’nui hơnăm 2022, kong pơlê xuân ối lối 900 rơpŏng ai hnoăng ki kơtiê tiô pơkâ hên troăng, lối 600 rơpŏng ối kơtiê xơpá ‘na hngêi ối. Tung la ngiâ, kong pơlê kô tơkŭm liăn tơmeăm vâ kum pôi tá ăm ai rơpŏng kơtiê  xếo tung mâu rơpŏng ki ai hnoăng tơnêi têa ƀă mơngế ai hnoăng.

 “Mơ-eăm troh tâi hơnăm 2024 kô ai troăng hơlâ vâ bro hlá mơ-eá tŏng kum klêi tâi tâng ăm mâu rơpŏng ai hnoăng tơnêi têa ki dế kơtiê xơpá ‘na hngêi ối, má péa nếo tơbleăng tối hluăn kơtiê. Hluăn kơtiê akố mê ai hên tơdroăng ki xiâm, ki xiâm ‘na hên tơdroăng ai hên tơdroăng pơkâ mê cho tơrŭm ƀă mâu kơvâ cheăng tơrêm tơdroăng cheăng dêi Tíu mê pơkuâ vâ ai hnoăng pêi tơleăng mơnhên ƀă mâu mâu rơpŏng ôh tá ai ngế tro hơnăm pêi cheăng lơ ôh tá ai tơmeăm pêi pro mê pâ thế chêh ‘mot inâi tung khu vâ châ kơjo kum liăn kâ rêm khế ƀă chêh inâi lo ing inâi rơpŏng kơtiê. Kong pơlê kô ai troăng rơhlâ pơkâ nhên tơtro vâ tơleăng mơnhên kum mâu rơpŏng ai hnoăng tơnêi têa”.