Kơxo hâi lơ 10/11, a tơring Ea Sup, kong pơlê Dak Lak, teăng mâ kăn xiâm pơkuâ Mố đô̆i gak tơkăng kong dêi kong pơlê Dak Lak, kơ koan teăng mâ Rơ’jíu Việt Nam a Tây Nguyên, Agribank ai tíu pêi  cheăng a Peăng kơnhŏng kong pơlê Dak Lak, Kŏng ti Honda Dak Lak, Kŏng ti pro phon Vân Nguyên rơtế ƀă mâu khu tŏng kum pơcháu “Hngêi tơtô tíu tơkăng kong” ăm mâu rơpŏng kơtiê xơpá a cheăm Ea Bung.

Hngêi mê rơdâ lối 90m2 châ diâp ăm prế on veăng pôa Hoàng Lý, ối a thôn 8 cheăm tơkăng kong Ea Bung. Hngêi ối kố ai tâi tâng kơxô̆ liăn pro tâi lối 150 rơtuh liăn, tung mê lối 80 rơtuh liăn châ mâu khu mơdró veăng tơno; ki u ốdi cho mâu nhŏng o tung rơpŏng hngêi. Kăn teăng mâ Đỗ Quang Thấm - Kăn hnê ngăn chính ủy Khu xiâm pơkuâ ngăn Mố đô̆i gak tơkăng kong dêi kong pơlê Dak Lak ăm ‘nâi, mâu hơnăm hdrối, tíu pêi cheăng hiăng pêi tơdroăng “Hngêi tơtô tíu tơkăng kong” hiăng pro châ 5 toăng kơjo kum ăm mâu rơpŏng kơtiê acheăm tíu tơkăng kong Ea Bung.