Vi ƀan Măt trâ̆n tơnêi têa Việt Nam kong pơlê Dak Lak nếo tơkŭm hôp tối mơgêi 20 hơnăm Hâi hôp tơrŭm môi tuăn tâi tâng hdroâng kuăn ngo pơla hơnăm 2003-2023. Tiô Vi ƀan Măt trâ̆n tơnêi têa Việt Nam kong pơlê Dak Lak, luâ 20 hơnăm tơrŭm cheăng, Hâi hôp tơrŭm môi tuăn hdroâng kuăn ngo hiăng chôa ‘lâng tơbleăng troh lâp lu tung tơdroăng rêh ối dêi kuăn pơlê a mâu pơlê cheăm.

Ƀă troăng rơhlâ tơniăn ƀă ‘nâi kơdĭng, tơƀrê, rêm hơnăm, tâi tâng mâu kơpong kuăn pơlê ối tung kong pơlê xuân châ tơkŭm po Hâi hôp. Hên kơpong kuăn pơlê ối tơkŭm po pơcháu hngêi tuăn pâ, lăm pôu, hbru tơmeăm ăm mâu rơpŏng ai hnoăng la kơtiê, rơpŏng kơtiê xơpá; khĕn kơdeăn mâu khu pú hên, mâu ngế ki pêi cheăng kơhnâ ai hiâm mơno lĕm tro tung kuăn pơlê.

Măt trâ̆n tơnêi têa rêm râ a Dak Lak hiăng mơhnhôk veăng tơlo lối 280 rơtal liăn ăm Liăn ‘măn kơdĭng xua mơngế kơtiê, veăng kum mơjiâng pro vâ chê 5.500 toăng hngêi rŭm tuăn ƀă lối 2.000 tơmeăm khoăng mơjiâng pro ăm kuăn pơlê. Malối 2 hơnăm tâ tú pơreăng kân COVID-19, kong pơlê hiăng xo hên tơdroăng veăng kum hbrâ mơdât pơreăng ƀă kơxô̆ liăn, tơmeăm lối 55,6 rơtal liăn.