Tiô Kŏng ti On tơhrik Dak Lak, mâu khế apoăng hơnăm 2024 tơdroăng ki vâ xúa on tơhrik dêi kong pơlê tâk hên tâ mâu hơnăm hdrối. Ki nhên, tung khế 2 tơdroăng ki vâ xúa tâk 30% tâng pơchông ƀă hơnăm 2023.

Mâu hâi apoăng khế 3 ki mơ’no xúa a kơlo 510MW ƀă kô châ troh 550 MW tung hâi la ngiâ. ‘Nâi hdrối tơdroăng kố, ing apoăng rơnó tôu, Kŏng ti hiăng hnê mơhno mâu on tơhrik ối tung kong pơlê séa ngăn đi đo ƀă ‘mêng rơnêu teăm tơdrêng mâu troăng kơxái ki ‘no on tơhrik luâ túa pơkâ, biê̆n áp phụ tải, aptomat hạ thế ƀă hên ki ê vâ mơ’no on tơhrik tơniăn; séa ngăn troăng kơxái ƀă trạm biến áp, mơdêk tần suất ki vê ngăn ki tôu a mâu tíu ki mơ’no, malối cho mâu tơmeăm ki ai on tơhrik têi vâ teăm châ hlo tơdroăng ki ôh tá tơniăn ƀă teăm ‘mêng rơnêu drêng trâm.

Pôa Trần Tấn Phùng, Kăn phŏ pơkuâ Kŏng ti On tơhrik Dak Lak ăm ‘nâi, tíu pêi cheăng xuân hiăng hbrâ rơnáu mâu tơdroăng ki ôh tá tơniăn tâng ai drêng tơdroăng ki vâ xúa on tơhrik rế tâk hên ƀă kô ai túa pơkâ tơleăng tơƀrê, rak tơniăn ‘no tơhrik ăm tơdroăng pêi pro mâu kế tơmeăm khoăng ƀă tung tơdroăng rêh ối.