Nếo klêi pro mâu mơ-éa ki kal a tíu tơkŭm môi tíu pro tâi tâng mơ-éa kuăn pơlê a tíu pêi cheăng Vi ƀan cheăm Ea Tiêu, tơring Čư Kuin, kong pơlê Dak Lak, ngoh Trần Vũ Hải Đăng tối ăm ‘nâi, ngoh bu mơdoh dâng 30 phut ăm tơdroăng pro mơ-éa:

“Hâi kố a troh cheăm Ea Tiêu vâ pro hlá mơ-éa mơnhên kĭ tá hâi xo on veăng, mê á hlo kăn ƀô̆, kŏng nhân viên a kố tŏng kum pêi tá hiâm mơno, hnê mơhno nhên chêh môi tiah lâi, pro mơ-éa rĕng vâ kuăn pơlê ôh tá mơdoh ton chôu pêi cheăng drêng troh pro mơ-éa’’.

Tiô kơxô̆ tơbleăng dêi Vi ƀan tơring Čư Kuin, rêm hơnăm rêm cheăm tung tơring tơdah sap ing 13.000 troh 16.000 roh hô sơ. Vâ pro tơ’lêi hlâu ăm mâu khu tơrŭm cheăng, ngế krê drêng troh pro hô sơ, mâu cheăm hiăng tĕm tơbleăng Khu mơ-éa vâ pro ối tung hnoăng chiâng pro a kơƀăng tĕm tối tơbleăng dêi tíu pêi cheăng kơ koan ƀă tung trâng điê̆n tưh dêi cheăm; xing xoăng ăm mâu ngế pêi cheăng ối tung khu pơkuâ tơdroăng cheăng ƀă kăn pơkuâ cheăm pêi pro hnoăng a Khu tơdah ƀă mơdrếo ăm kuăn pơlê.  

Mâu cheăm xuân xúa troăng pêi ‘’Rơkê pơkâ pêi kum kuăn pơlê’’ ƀă ‘’Hâi má 5 kuăn pơlê ôh tá chêh, khu râ kăn pơkuâ ôh tá tơkêa hâi troh’’ djâ mâu tơdroăng châ tơƀrê hên. Pôa Nguyễn Kim May, Kăn phŏ pơkuâ hnê ngăn cheăng Đảng, Kăn hnê ngăn Vi ƀan cheăm Ea Ktur, tơring Čư Kuin tối ăm ‘nâi:

“Ngin hiăng pro krâ camera séa ngăn kŏng chưk a tíu pêi cheăng tơkŭm môi tíu ai tŭm tâi tâng xuân môi tiah ‘nâi tơdroăng kuăn pơlê tro vâ pro hlá mơ-éa, ing mê mơdêk hnoăng kăn ƀô̆ kŏng chưk tung kơ koan. Mâu troăng pro mơ-éa ngin đi đo ƀeăn ƀĕng rơkê, pro tơ’lêi hlâu lĕm má môi, tơniăn ăm kuăn pơlê tung tơdroăng pêi pro mơ-éa, mê cho tơdroăng hâi khế ngin kơdroh tơkêa tiô pơkâ luât, pro tơ’lêi hlâu lĕm má môi ăm kuăn pơlê mê ngin hbrâ pro ăm kuăn pơlê rĕng kêi đeăng’’.

Pôa Võ Tấn Huy, Kăn hnê ngăn Vi ƀan tơring Čư Kuin tối ăm ‘nâi, vâ mơjiâng tơdroăng pro hlá mơ-éa rơkê, xêt khât, châ tơƀrê, Vi ƀan tơring hiăng tơbleăng pơkâ pêi ‘na pơhlêh pro mơ-éa tơnêi têa dêi rêm hơnăm. Rêm hneăng, Vi ƀan tơring tơkŭm po mơgêi, tơpui tơno tơdroăng pro mơ-éa vâ hlê plĕng pêi pro tơdroăng, pơkâ pêi, mơnhên mâu tơdroăng châ tơƀrê, mâu tơdroăng ối pá puât vâ tăng troăng pêi, hnoăng cheăng tơtro ăm tung la ngiâ pơtối. Tơdrêng amê, tơring pêi pro tơdroăng kĭ tơkêa pêi pro hnoăng ƀă Kăn hnê ngăn Vi ƀan mâu cheăm tung tơring. Tơring xuân mơjiâng pơkâ pêi xúa măng pơlê pơla cho Zalo vâ pro tíu ki trâm mâ pơla kuăn pơlê ƀă khu râ kăn pơkuâ tơring.

Pôa Võ Tấn Huy tối ăm ‘nâi:

“Môi tung mâu tơdroăng ki xiâm ki tơring tơmâng mê cho pơhlêh ‘na pro mơ-éa kum ăm kuăn pơlê, pơhlêh ‘na mơ’no liăn rôe kơmăi kơmok ing tơring troh cheăm tiô troăng tơ’lêi hlâu, tiô rơxông nếo ăm kuăn pơlê. Tơdrêng mê, tơrŭm ƀă Tíu pơtroh kơthô troăng internet vâ tơbleăng mâu tơdroăng vâ pêi pro ing phôn râng kŏng. Tơring xuân hiăng hnê mơhno tung tơdroăng pêi pro troăng hơlâ, mơjiâng khu kăn ƀô̆ rơkê, tá hiâm mơno, pôu râng hnoăng cheăng tung tơdroăng pêi, ing mâu tơdroăng pêi dêi pơhlêh pro mơ-éa mê hnoăng cheăng cho la ngiâ khu râ kăn pêi cheăng xúa điê̆n tưh, xuá kŏng nghê̆, vâ pêi pro tro tơdroăng kố mê cho tơdroăng pơhlêh pêi cheăng xúa kŏng ngê̆’’.

Tung pơla kố nah, Tơdroăng pơhlêh tung pro mơ-éa tŏng kum kuăn pơlê kong pơlê Dak Lak châ pêi pro tâi tâng tung 6 tơdroăng xiâm dêi tơdroăng tâi tâng pơhlêh pro mơ-éa kum kuăn pơlê tơnêi têa hneăng hơnăm 2021 – 2030 dêi Chin phuh, Kong pơlê hiăng ai pơhlêh hên tung hnê mơhno, pơkuâ vâ mơdêk tơdroăng ki môi tuăn dêi kuăn pơlê, khu tê mơdró. Ki rơhêng vâ tối cho tơdroăng mơdêk pêi pro tơdroăng pêi cheăng tơnêi têa kơlo 3, kơlo 4.

Tung hơnăm 2022, kong pơlê Dak Lak hiăng diâp 32 râ ‘na kơlo têk chu môi tuăn dêi kuăn pơlê, ối má 27 tung lâp tơnêi têa. Vâ tơdroăng pơhlêh tung pro mơ-éa kum kuăn pơlê châ tơƀrê tung la ngiâ, pôa Nguyễn Tuấn Hà, kăn phŏ hnê ngăn Vi ƀan kong pơlê Dak Lak tối ăm ‘nâi:

“Khu pêi cheăng kŏng chưk, ki má lối cho ngế ối a ko kal ƀeăn ƀĕng rơkê tung tơmiât pêi, pêi tơdroăng cheăng khât păng ‘nâng. Má péa nếo, Khu hnê mơhno thăm séa ngăn tơdroăng pơhlêh pro mơ-éa kum kuăn pơlê, kum tung tơdroăng pro mơ-éa tŏng kum kuăn pơlê, pêi tiô pơkâ, tah lôi môi tơdroăng pá puât, tơvâ tơvân. Má pái nếo, pơtối séa ngăn vâ kơdroh, pro tơ’lêi hlâu pro mơ-éa, pơhlêh nếo tơdroăng pêi pro tơkŭm môi tíu, môi tíu tơdjêp tâi tâng tung pro mơ-éa kum kuăn pơlê tiô troăng mơdêk hôm tung tơdroăng tơdah kum kuăn pơlê’’.

Ƀă tơdroăng pêi pro tơdâng tơ’mô mâu troăng pêi, rơtế mâu troăng tơmiât pêi rơkê, tơdroăng pơhlêh pro mơ-éa tung kong pơlê Dak Lak hiăng ai pơhlêh hên; ing mê, pro tơ’lêi hlâu, djâ tơdroăng môi tuăn ăm khu pú hên, ngế krê troh tê pro, kum mơjiâng tơdroăng tơdah pro mơ-éa kum kuăn pơlê rơkê, tiô rơxông nếo, châ tơƀrê, tơxâng tiô pơkâ, hnoăng cheăng tung rơxông nếo.