Tơring Čư̆ Kuiñ cho môi tung mâu tơring a Dak Lak ai krâm kuăn pơlê tiô khôp. Tung mê mơngế ki tiô khôp Pâ Xeăng (lối 67%), Tin Lành (lối 26%) ƀă khôp Phop (vâ chê 7%). Ƀă tơdroăng pơkâ tâk kơxô̆ mơngế mot đảng viên cho mâu ki tiô khôp, hâi lơ 14/12/2017 Khu kăn Đảng tơring Čư̆ Kuiñ hiăng mơjiâng pơkâ tơdroăng tơkêa bro kơxô̆ 02 ‘na “Tăng tơ’mot ăm tâk kơxô̆ đảng viên cho mâu ki tiô khôp ƀă hlối mơhno xing xoăng xúa kăn ƀô̆ cho mâu ki tiô khôp cheăng ‘na tơdroăng kal kí a pơlê cheăm”.

Tơdroăng Tơkêa kơxô̆ 02 cho pro pơ’lêh ‘na hlê plĕng tung kăn ƀô̆, đảng viên ƀă kuăn pơlê, malối cho tung hdroâng kuăn ngo ‘na troăng rơhlâ ki môi tuăn, tơtro dêi Đảng tung pêi pro tiô luât pơkâ loi tĭng tiô khôp. Sap ing mê loi khat a hnoăng pơkuâ dêi Đảng, tơmâng khât, rak ngăn, pơkuâ dêi Tơnêi têa. Pakĭng mê, xuân veăng  ‘no hnoăng pơ’lêh mâ ngế đảng viên tung Đảng ƀô̆, mơdêk hnoăng cheăng pơkuâ, ivá tơplâ dêi khu tơrŭm cheăng Đảng ƀă đảng viên a mâu kơpong ki kuăn pơlê tiô khôp.

Tơbleăng pêi mâu pơkâ ƀă mâu pơkâ tung tơdroăng Tơkêa bro kơxô̆ 02 dêi khu kăn Đảng tơring, mâu Đảng ƀô̆ a cheăm bêng hiăng pơ’lêh tơdroăng pơkâ  tiô kơ hơnăm. Môi tiah Đảng ƀô̆ cheăm Hòa Hiệp pơ’lêh tơdroăng cheăng ƀă tơdroăng Pơkâ chuyên đề kơxô̆ 12 ‘na mơdêk hnoăng cheăng pơkuâ hnê mơhno dêi Đảng ƀă tơdroăng tăng tơ’mot mơngế mot đảng viên. Tung mê, ‘nâi nhên pơkâ “Mơdêk tơdroăng tăng mơngế, ăm hriâm tơ’nôm, tơ’mot mơngế mot đảng viên nếo cho mâu kuăn ngo ƀă mâu ngế ki tiô khôp”.

Sap ing mê mâu chi ƀô̆ tung tâi tâng Đảng ƀô̆ cheăm hiăng tơbleăng pêi kơtăng ƀă hên troăng rơhlâ ƀă tơdroăng pêi pro pơrá phá. Pôa Trần Văn Du, Kăn hnê ngăn Chi ƀô̆ thôn Giang Sơn, cheăm Hòa Hiệp, tơring Čư̆ Kuiñ, kong pơlê Dak Lak ăm ‘nâi:

“Chi ƀô̆ mơhnhôk tơdroăng pêi pro, klâ xoăng pơkâ  ‘na đảng viên tung chi ƀô̆ vâ pêi hnoăng cheăng hnê ăm mơngế ki nếo mot. Pakĭng mê xing xoăng mâu kăn ƀô̆, khu grup xuâ thế hnê tơdroăng pơkâ mê”.

Sap mâu tơdroăng mơhnhôk, tơdroăng pêi cheăng ai pơxúa khât a pơlê cheăm, mâu chi ƀô̆ rah xo mâu kuăn pơlê ki kơhnâ rơkê tung kơpong tiô khôp vâ ăm hriâm tơ’nôm vâ hlê plĕng, klêi mê tơ’mot mâu ki mê mot Đảng, vâ rế hên kăn ƀô̆, đảng viên tơ’nôm ăm pơlê cheăm. Pôa Trần Văn Thục, Kăn hnê ngăn Đảng ủy cheăm Hòa Hiệp, tơring Čư̆ Kuiñ, kongpơlê Dak Lak ăm ‘nâi:

“Ngin hiăng tơkŭm hôp chuyên đề ‘na tơdroăng tăng tơ’mot mơngế mot đảng viên, tung mê, tơmâng khât tơdroăng tơ’mot mơngế mot đảng viên tung kơpong hdroâng kuăn ngo ki tiô khôp, xuân môi tiah tơ’mot mâu hdroâng kuăn ngo mot đảng viên. ‘Na ki ton ta ah ai xiâm ki pơ’lêh ăm mâu kăn ƀô̆ tung khu cheăng kal kí, mê troh nôkố hơnăm hiăng hên xuân hiăng vâ pơtê há ’’.

Tiô jâ Phúc Binh Niê Kđăm, kăn hnê ngăn Đảng tơring Čư̆ Kuiñ ƀă hên tơdroăng kơdô mơ-eăm mâu tơdroăng tơvâ tơvân, mơhnhôk pêi cheăng rơkê mâu tơdroăng pơkâ dêi Tíu xiâm tung tơ’mot mơngế mot Đảng, troh nôkố, Đảng ƀô̆ tơring Čư̆ Kuiñ ai 33 khu tơrŭm cheăng Đảng dêi râ xiâm, tung mê ai 25 đảng ƀô̆, 08 chi ƀô̆ pơlê cheăm bêng, ƀă lối 4.400 ngế đảng viên. Kơxô̆ mơngế đảng viên cho kuăn ngo ki khôp rế hên, tơdroăng mê hiăng kum veăng pơ’lêh tung tơdroăng cheăng dêi đảng viên, mơdêk hnoăng cheăng pơkua , ivá tơplâ dêi mâu khu tơrŭm cheăng Đảng:

“Kơxô̆ mơngế ƀă ki tơƀrê tung pêi cheăng dêi đảng viên cho mâu ngế ki tiô khôp chôa mơnhông tơƀrê. Tung hơnăm 2016, tâi tâng kơxô̆ đảng viên ki tiô khôp tung lâp tơring ai 108 ngế. Klêi tơbleăng pêi tơdroăng tơkêa bro ta troh nôkố, tâi tâng kơxô̆ đảng viên mâu ki khôp tung tơring ai 245 ngế, châ 5,5% tung kơxô̆ tâi tâng đảng viên lâp tơring.  Tơring xuân hiăng xing xoăng xúa 13 ngế đảng viên ki tiô khôp cho kăn ƀô̆ xiâm ƀă mâu ngế pro xiâm, pro phŏ mâu khu grup cheăng kal kí rêh ối pơlê pơla râ cheăm”.

Mâu tơdroăng pêi pro tung tơdroăng tơ’mot đảng viên cho mơngế ki tiô khôp hiăng mơhno ki tơtro ƀă ki ai khât a tơring Čư̆ Kuiñ, cho kông ki tơdjêp, hmâ achê pơla “tơdroăng khôp” ƀă “tơdroăng rêh ối”. Ing mê, ivá rơdêi ki tơrŭm môi tuăn pơla mâu hdroâng kuăn ngo, mâu ngế loi tĭng tiô khôp châ mơdêk, veăng ‘no hnoăng mơnhông cheăng kâ rêh ối, mơdât khu ki hriăn pro tơklâ, khu kơneăm ki vâ xo tơdroăng khôp vâ pro tơklâ kuăn pơlê, pro chiâng ai tơdroăng ôh tá tơrŭm pơla mâu hdroâng kuăn ngo ki rêh ối a pơlê cheăm tơring.