Ƀuôn Mlok Ƀ, cheăm Krông Jing, tơring MDrak, kong pơlê Dak Lak ai 160 rơpŏng ƀă lối 500 pơ’leăng mâ mơngế, tâi tâng to mơngế Rơđế. Hơnăm 2022 nah, lâp tung pơlê ai vâ chê 100 rơpŏng kơtiê nôkố kơxô̆ rơpŏng kơtiê hiăng chu ối 80 rơpŏng. Tơdroăng rêh ối tơmeăm khoăng, tuăn mơno dêi kuăn pơlê hiăng pơ’lêh tâ hdrối nah. Khoh ai môi tiah mê cho kơnôm ai Khu kăn pơkuâ hnê ngăn Đảng, mâu kăn, khu râ hiăng tơbleăng pêi tơdrêng mâu tơdroăng tung pêi mâu troăng rơhlâ dêi Đảng, Tơnêi têa.

Malối ing 3 tơdroăng pơkâ dêi tơnêi têa: Mơjiâng thôn pơlê nếo; săm kơtiê krá tơniăn; mơnhông cheăng kâ, rêh ối kơpong hdroâng kuăn ngo ƀă kong ngo. Jâ H’Hương Hwing, Kăn pơkuâ hnê ngăn chi ƀô̆ ƀuôn Mlok Ƀ ăm ‘nâi:

 “Tơdroăng cheăng pơkuâ môi tiah kăn pơlê, mâu kơvâ cheăng, khu râ dêi pơlê đi đo tơkŭm a tơdroăng pơkâ dêi mâu kăn hnê mâu chi ƀô̆ hnê ngăn kuăn pơlê, ối a chê kuăn pơlê, hnê mơnhông cheăng kâ, ‘nâi xúa khoa hok kih thuât tung păn ro, păn chu, ‘nâi tơdroăng tung pơlê, tơdroăng cheăng tơrêm rơnó... Ing mê, hnê ăm kuăn pơlê ki ối tung pơlê vâ pêi pro”.

Cheăm Ea Sol, tơring Ea Hleo ai 12 to thôn ƀă 7 pơlê, 13 hdroâng kuăn ngo rơtế rêh ối tơdjuôm. Pơxiâm mơjiâng thôn pơlê nếo sap hơnăm 2011, apoăng nah tŭm tơdroăng, malối troăng prôk tung thôn ôh tá lĕm, pá puât tung tơdroăng vâ prôk lăm cheăng kâ, kơxô̆ liăn tơnêi têa ‘no vâ mơjiâng pro ôh tá ai. Hlo ti mê, Đảng ủy, mâu kăn pơkuâ ngăn cheăm Ea Sol hiăng mơdêk hnoăng cheăng hnê tối, tơdjâ tơrŭm môi tuăn tung kuăn pơlê, rơtế dêi rơpó mơjiâng thôn pơlê nếo.

Mơhnhôk tăng liăn ing tơdroăng kuăn pơlê ki lâi vâ pleăng dêi hnoăng cheăng, kế tơmeăm ki veăng tơrá. Pôa Ksơr Y Gư, kăn phŏ  pơkuâ hnê ngăn Đảng ủy, Kăn hnê ngăn Vi ƀan cheăm Ea Sol, tơring Ea Hleo ăm ‘nâi:  

“Cheăm mơhnhôk tơ’noăng mơjiâng thôn pơlê nếo a tơdế thôn pơlê  kố ƀă thôn pơlê ki tá. Klêi tơbleăng tơ’noăng, ngiâ méa cheăm hiăng hlo pơ’lêh hên xua ai tơmeăm khoăng, malối troăng kân pơlê nếo klêi ‘mâi rơnêu bro, po rơdâ nếo klêi mê pro troh mâu troăng kân sap ing cheăm troh a pơlê ‘’.       

Xuân môi tiah hên kơpong kuăn ngo ki ê ki ối tung kong pơlê Dak Lak, hdrối nah, cheăm Yang Tao, tơring Lăk ai kơxô̆ rơpŏng kơtiê, lâp tung cheăm lối 2.500 rơpŏng mê hdroâng kuăn ngo ki rêh ối tung cheăm châ 96%. Vâ kum kuăn pơlê hluăn kơtiê tơdrêng ƀă tơdroăng tơmâng hên tơdroăng dêi Đảng ƀă Tơnêi têa, tơring Lăk hiăng tăng ‘măn hên kơxô̆ liăn ki vâi o pêi cheăng vâ mơnhông cheăm Yang Tao xông tơƀrê tung cheăng kâ rêh ối, troh nôkố kô hlo ki pơ’lêh tung tơrêm rơpŏng kuăn pơlê a kố.

Jâ H’Loan Uông, kăn phŏ hnê ngăn Đảng, Kăn hnê ngăn Vi ƀan cheăm Yang Tao, tơring Lăk hâk phiu tối:

 “Tung cheăm Yang Tao hlo hiăng pơ’lêh khât. Tơdroăng pơ’lêh mê ing hdrê pêt, hdrê mơnăn păn hdrối nah ai hên mâu rơpŏng kuăn pơlê tơmâng troh tơdroăng păn mơnăn tá păn kơpôu, păn ro, păn chu ƀă păn í, pêap la troh nôkố rơpŏng ki lâi xuân hiăng ‘nâi pơ’lêh tung păn mơnăn mơnôa. Hngêi ki lâi xuân păn ro, rơpŏng ki lâi ôh tá păn ro kô păn í pêap’’.

Tiô pơkâ Hneăng hôp kân Đảng ƀô̆ kong pơlê Dak Lak hneăng hơnăm 2020-2025 rêm hơnăm, xăm sap 1-2% rơpŏng kơtiê. Rơpŏng kơtiê tung kơpong hdroâng kuăn ngo xăm sap 3-4%. Rơpŏng kơtiê a mâu tơring xăm chôa i iâ sap ing 4 troh 5%. Vâ kâi pêi pro tiô pơkâ, a hneăng hôp mơgêi tơdế hneăng pêi pro tiô pơkâ Hneăng hôp kân Đảng ƀô̆ kong pơlê Dak Lak nếo achê kố, pôa Nguyễn Đình Trung, Ngế cheăng tung tíu xiâm Đảng, Kăn pơkuâ hnê ngăn Đảng ủy kong pơlê Dak Lak tối nhên:

 “Pơtối hnê mơhno mơdêk tâ nếo hnoăng cheăng dêi rêm râ Đảng, hlê pêi khât, pêi kơtăng mâu troăng rơhlâ dêi Đảng, luât tơnêi têa ‘na mơnhông cheăng kâ rêh ối ƀă krá tơniăn. Pêi hdrối ‘na xing xoăng liăn ki vâ pêi tơdroăng tơkêa bro, luât pơkâ tŏng kum ƀă kơpong kuăn ngo, kơpong hngế hngo, kơpong tíu tơkăng kong vâ pê klêi mâu pơkâ, kơxô̆ tơdroăng cheăng ki pơcháu, hnoăng cheăng ki tơdroăng Pơkâ tơbleăng a hneăng hôp mâu kăn Đảng ƀô̆ kong pơlê rôh má 17 hiăng tơbleăng’’.

Kong pơlê Dak Lak xuân dế mơdêk rơdêi pêi mâu tơdroăng pơkâ dêi tơnêi têa ‘na xăm kơtiê krá tơniăn, mâu luât pơkâ xăm kơtiê, mê cho: ăm mung liăn, mơhnhôk pêi chiâk, pêt kong rak ngăn kong, păn ká xi xóng, hriâm tơdroăng cheăng, ‘na pơkeăng pơlât, hnê hriâm. Tơmâng khât tâ nếo troh tơdroăng cheăng mâu kăn ƀô̆  kơpong hdroâng kuăn ngo. Mơnhông rế hên mơngế ki rơkê tung hdroâng kuăn ngo vâ ai tiô pơkâ pêi mâu tơdroăng cheăng nôkố.