Tung hngêi tuăn pâ nếo pro klêi rơdâ vâ chê 70m2, kơnâ 200 rơtuh liăn, nâ Nguyễn Thị Tặng, đảng viên dêi Đảng bộ bêng Thành Công, pơlê kong kơdrâm Ƀuôn Ma Thuột hâk phiu. Ƀă tâi tâng kơxô̆ liăn pêi lo dêi 2 on veăng lối 10 rơtuh liăn/khế, rơpŏng hngêi nâ Tặng bú bê vâ rôe tơmeăm xúa tung rêh ối, ăm dêi 2 ngế kuăn hriâm.

Kơnôm kơjo kum teăm 70 rơtuh ing kơxô̆ liăn ‘măn Kơdng ‘’đảng viên kơdĭng pro tiô hnê mơhno ki lĕm dêi Hồ Chí Minh’’ dêi pơlê kong kơdrâm Ƀuôn Ma Thuột ƀă hnoăng veăng kum dêi nhŏng o tung rơpŏng hngêi, nôkố tơdroăng púi vâ mơjiâng pro hngêi lĕm dêi nâ Tặng nếo ai tiô púi vâ.

“Hâi la lâi tơmiât troh hâi ki kố, ai hngêi ối tiah kố, a bú tơmiât púi tơná bú châ rôe tơnêi tê, ‘na hngêi a ôh tá tơmiât troh xua kơxô̆ liăn vâ mơjiâng pro hngêi gá hên, ƀă kơxô̆ liăn pê lo má on veăng chĕm drêh dêi 2 ngế kuăn. Tung hngêi ối ai ngế nôu hiăng krâ. Ai hngêi ối tiah kố tâ hơniâp ro ‘nâng ƀă rơrêk tung hiâm mơno, teăng mâ rơpŏng hngêi mơnê hên kơ mâu vâi pú đảng viên tung tâi tâng đảng bô̆ ki veăng tŏng kum ăm rơpŏng hngêi á’’.

Xua hơnăm hiăng hên, ivá rế pá kâi hro, cheăng kâ pá puât mê pôa Nguyễn Văn Châu 62 hơnăm, 30 hơnăm cheăng Đảng a Tôh dân phô̆ 5, bêng Tự An, pơlê kong kơdrâm Ƀuôn Ma Thuột xuân hâi kâi vâ ‘mâi nêu pro dêi hngêi ki hiăng ton hiăng tơ’nhiê mơjiâng pro kơtăn kố 30 hơnăm, mơhé hơnăm kố hlo hiăng tơ’nhiê hên tíu.

Hlo ti mê, khế 4/2021, châ tŏng kum 25 rơtuh liăn ing kơxô̆  “Liăn đảng viên ‘măn kơdĭng pro tiô troăng ki lĕm Hồ Chí Minh” dêi pơlê kong kơdrâm Ƀuôn Ma Thuột tơ’nôm ing liăn ‘măn kơdĭng, rơpŏng hngêi hiăng châ ‘mâi rơnêu pro dêi hngêi lĕm tâ.

“Hdrối nah hngêi hiăng tơ’nhiê tơ ‘nhĕng, kong mêi xi kơchoh châ khu râ kăn Đảng pơlê kong kơdrâm tơmâng hiăng veăng kum, péa hơnăm kố a xuân hiăng kơdroh iâ ki pá puât drêng kong mêi khía, xua ivá pá hro ôh tá mo dâi. A  mơnê hên ‘nâng ‘’.

Châ tơbleăng pêi pro sap hơnăm 2013 troh nôkố, Liăn đảng viên ‘măn kơdĭng pêi pro tiô troăng ki lĕm Hồ Chí Minh dêi pơlê kong kơdrâm Ƀuôn Ma Thuột  hiăng pro tro, tơ’mot hên kăn ƀô̆, đảng viên ƀă mâu kuăn pơlê veăng. Vâ ai liăn măn kơdĭng, mâu đảng ủy, chi ủy, chi ƀô̆ hnê tối, mơhnhôk mâu kăn ƀô̆, kŏng chứk, viên chưk cho đảng viên dêi kơ koan, tíu pêi cheăng, tíu pêi cheăng ki pin veăng mơ’no liăn tiô kơ ivá tơná: Khu má 1, veăng tơlo ki iâ 30.000 liăn/khế, khu má 2 veăng tơlo ki iâ gá 15.000 liăn/khế, khu má 3 veăng tơno ki iâ gá 6.000liăn/khế ƀă khu má 4 veăng tơlo ngăn vâi ai xêh.

Ki pơtối hơnăm 2013 troh nôkố, Liăn đảng viên ‘măn kơdĭng châ xo lối 8,6 rơtal liăn. Ing mê, kơjo kum mơjiâng pro ƀă ‘mâi rơnêu 15 toăng hngêi, kum mơnhông cheăng kâ 11 ngế, kum khăm pơlât 697 ngế ƀă mâu tơdroăng veăng kơjo kum ki ê. Pôa Trần Văn Châu, Kăn phŏ hnê mơhnhôk cheăng Đảng pơlê kong kơdrâm Ƀuôn Ma Thuột, kong pơlê Dak Lak ăm ‘nâi:

“Liăn ‘măn kơdĭng mê a hlo ai pơxúa ƀă tro ‘nâng. Má môi cho  kum  mâu đảng viên ki trâm xơpá hliăn tiâ, xía vâ tơdrêng, klêi mê, kum mâu đảng viên kơtiê ki vâ mơnhông pêi cheăng kâ la oh tá ai liăn vâ ‘no mê ngin xuân hiăng veăng kum vâi mơnhông tung pêi cheăng, klêi mê nếo mâu đảng viên ki hngêi ối hiăng  tơ’nhiê  ôh tá ai liăn vâ pro hngêi mê xuân châ khu pơkuâ rak liăn séa ngăn ƀă kum teăm tơdrêng, vâi hlo ‘nâi khu cheăng Đảng đi đo veăng ƀă vâi’’.

Ăm hlo, ing kơxô̆ liăn ‘măn kơdĭng chôa iâ mê hiăng chiâng liăn ‘măn kơdĭng ki kân. Kố cho tơdroăng pêi pro ki lem, ai pơxúa, vâ pơ’lêh tơdroăng hriâm ƀă pêi pro tiô troăng ki lĕm dêi Đảng ƀô̆ ƀă kuăn pơlê kong kơdrâm Ƀuôn Ma Thuột, veăng kum mâu đảng viên kơtiê, đảng viên tơkâ luâ xơpá, mơ-eăm mơnhông tung rêh ối.